រដ្ឋមន្ត្រីការពារជាតិស.រ.អា.គឺលោក James Mattis បានកោតសរសើរការប្រឹងប្រែងរបស់ប្រទេសចិនធ្វើការជាមួយសហគមន៍អន្តរជាតិនៅវេទិកាសន្តិសុខប្រចាំឆ្នាំអំពីកូរ៉េខាងជើង ដែលធ្វើឡើងនៅប្រទេសសិង្ហបុរីនៅថ្ងៃសៅរ៍នេះ។
ប៉ុន្តែនៅពេលពិភាក្សាអំពីបញ្ហាសមុទ្រចិនខាងត្បូង លោក James Mattis បាននិយាយថាការពង្រឹងកម្លាំងយោធារបស់ប្រទេសចិននៅលើកោះដែលចិនធ្វើនៅទីនោះ និងការដែលចិនមិនអើពើនឹងសណ្តាប់ធ្នាប់អន្តរជាតិគឺជារឿងមិនអាចទទួលយកបាន។ លោក Mattis និយាយថា យើងមិនអាចទទួលស្គាល់សកម្មភាពរបស់ប្រទេសចិនដែលរំលោភលើផលប្រយោជន៍របស់សហគមន៍អន្តរជាតិធ្វើឲ្យខូចច្បាប់ជាមូលដ្ឋានដែលជាប្រយោជន៍របស់ប្រទេសទាំងអស់ជាពេលសព្វថ្ងៃនេះ។
លោក Mattis និយាយដូច្នេះក្នុងសុន្ទរកថាទៅកាន់ប្រតិភូនិងបណ្តាញព័ត៌មាននៅឯកិច្ចពិភាក្សានៅ Shangri-La។ លោកបាននិយាយថានៅពេលការប្រកួតប្រជែងគ្នារវាងប្រទេសមហាអំណាចសេដ្ឋកិច្ចទាំងពីរនឹងកើតមាននោះទំនាស់មិនអាចចៀសវាងបានទេ។
លោក Mattis បន្តថាការធ្វើកោះសិប្បនិម្មិតនិងទីតាំងយោធាដែលមិនអាចប្រកែកបាននៅក្នុងដែលទឹកអន្តរជាតិនោះបានធ្វើឲ្យប៉ះពាល់ស្ថិរភាពក្នុងតំបន់។
លោកបានកត់សម្គាល់ទៀតថា ការបង្កើនកម្លាំងយោធាចិននៅចុងឆ្នេរមានសភាពខុសពីអ្វីដែលប្រទេសផ្សេងៗទៀតបានធ្វើ។
សកម្មភាពរបស់ចិនមានការខុសប្លែក មិនត្រឹមតែលក្ខណៈនៃសព្វាវុធបនីយកម្មនៅលើកោះនោះទេ តែចិនថែមទាំងមិនអើពើនឹងច្បាប់អន្តរជាតិហើយមិនមើលងាយផលប្រយោជន៍ប្រទេសដទៃ ហើយមានៈបដិសេធដំណោះស្រាយដែលមិនបង្កទំនាស់។
តាំងពីលោកចូលកាន់តំណែង លោក Donald Trump ប្រធានាធិបតីស.រ.អា.បានកំណត់ថា បញ្ហាកូរ៉េខាងជើងគឺជាអាទិភាពហើយក្នុងសុន្ទរកថារបស់លោក។ លោក Mattis បានបន្ទរកង្វល់របស់រដ្ឋបាលលោក Trump អំពីគ្រោះថ្នាក់ដែលប្រទេសកូរ៉េខាងជើងអាចបង្កឡើងនៅក្នុងតំបន់ និងក្នុងពិភពលោក៕
