ប៉ូលិសនៅក្នុងក្រុងឡុងដ៍បាននិយាយថា នៅថ្ងៃអង្គារនេះបុរសម្នាក់បានបើកឡានទៅបុកពួកអ្នកថ្មើរជើង និងពួកអ្នកជិះកង់នៅមុនពេលបុករបាំងមួយចំនួននៅខាងក្រៅសភានៃប្រទេសអង់គ្លេស បណ្តាលឱ្យមនុស្សមួយចំនួនត្រូវរបួស។
អាជ្ញាធរបាននិយាយថា ពួកប៉ូលិសបានចាប់ខ្លួនបុរសអ្នកបើករថយន្តនេះពីបទសង្ស័យថាប្រព្រឹត្តភេរវកម្ម។ ប៉ូលិសបានថ្លែងថា គ្មានមនុស្សឯទៀតនៅក្នុងរថយន្តនោះទេ ហើយថាពួកគេមិនបានរកឃើញអាវុធអ្វីឡើយ។
សេវាឡានពេទ្យក្រុងឡុងដ៍បាននិយាយថា ពួកគេបានព្យាបាលនិងបានដឹកមនុស្សពីរនាក់ទៅកាន់មន្ទីរពេទ្យមួយហើយថា ជនទាំងពីរនាក់នេះរងរបួសមិនមានគ្រោះថ្នាក់ដល់ជីវិតទេ។
អាជ្ញាធរបានបិទតំបន់នៅជុំវិញកន្លែងកើតហេតុនោះ និងស្ថានីយរថភ្លើងក្រោមដីមួយនៅជិតសភា។ គ្មានការប្រជុំសភាអង់គ្លេសនៅពេលនោះទេ។
កាលពីឆ្នាំទៅមិញ បុរសម្នាក់បានបើករថយន្តបុកអ្នកថ្មើរជើងនៅលើស្ពាន Westminster នៅជិតសភាបណ្តាលឱ្យមនុស្សបួននាក់ស្លាប់នៅទីនោះនៅមុនពេលគាត់ចាក់សម្លាប់ប៉ូលិសម្នាក់នៅខាងក្រៅសភា។ ប៉ូលិសបានបាញ់សម្លាប់អ្នកវាយប្រហារនោះ៕
