លោកប្រធានាធិបតីបារាំង Emmanuel Macron បាននិយាយកាលពីថ្ងៃអង្គារថា សហភាពអឺរ៉ុបតែងតែបើកទ្វារសម្រាប់អង់គ្លេសឲ្យនៅជាសមាជិកសហភាពអឺរ៉ុប បន្ទាប់ពីលោកស្រីនាយករដ្ឋមន្ត្រី Theresa May បាននិយាយថា កិច្ចប្រជុំលើការចាកចេញរបស់អង់គ្លេសពីសហភាពអឺរ៉ុបនឹងត្រូវចាប់ផ្តើមនៅសប្តាហ៍ក្រោយនេះ។
លោក Macron បានថ្លែងនៅក្នុងសន្និសីទសារព័ត៌មានមួយថា «ពិតណាស់ ទ្វារតែងតែបើក ដរាបណាការចរចាលើការចាកចេញរបស់អង់គ្លេសពីសហភាពអឺរ៉ុបនៅមិនទាន់បញ្ចប់»។
ប៉ុន្តែលោកក៏បានសង្កត់ធ្ងន់ថា លោកគោរពទៅលើសេចក្តីសម្រេចអធិបតេយ្យរបស់ប្រជាជនអង់គ្លេសឲ្យចាកចេញពីសហភាពអឺរ៉ុបនៅក្នុងការបោះឆ្នោតប្រជាមតិរបស់ខ្លួនកាលពីមួយឆ្នាំមុន ដោយបានបន្ថែមថា ការចាប់ផ្តើមកិច្ចប្រជុំនេះគឺជាព្រឹត្តិការណ៍ដ៏សំខាន់មួយ។
លោកបានថ្លែងនៅឯវិមាន Elysee ថា «យើងត្រូវតែច្បាស់លាស់និងត្រៀមទុកជាមុន ហើយនៅពេលដែលដំណើរការចាកចេញរបស់អង់គ្លេសពីសហភាពអឺរ៉ុបចាប់ផ្តើម យើងត្រូវតែច្បាស់ថា វាពិបាកជាងមុនក្នុងការដើរថយក្រោយវិញ»។
អត្ថាធិប្បាយរបស់លោក Macron ត្រូវបានលើកឡើងដូចៗគ្នា ដោយរដ្ឋមន្ត្រីក្រសួងហិរញ្ញវត្ថុអាល្លឺម៉ង់លោក Wolfgang Schaeuble កាលពីថ្ងៃអង្គារ។
លោកស្រី May បានលើកឡើងជាថ្មីទៀតអំពីផែនការរបស់លោកស្រី ក្នុងការអនុវត្តទៅតាមអ្វីដែលលោកស្រីបានគ្រោងទុក ដើម្បីចាប់ផ្តើមពិភាក្សានៅសប្តាហ៍ក្រោយ ខណៈការចរចាលើការបង្កើតរដ្ឋាភិបាលនៅតែបន្ត៕
