សេចក្តីព្រាងច្បាប់ស្តីពីសិទ្ធិទទួលបានព័ត៌មានបាន និងកំពុងស្ថិតក្រោមការត្រួតពិនិត្យរបស់ក្រសួងយុត្តិធម៌ មុនពេលសេចក្តីព្រាងច្បាប់នេះត្រូវបញ្ជូនទៅគណៈរដ្ឋមន្ត្រីរបស់លោកនាយករដ្ឋមន្ត្រី ហ៊ុន ម៉ាណែត ធ្វើការពិនិត្យ ផ្តល់យោបល់ រួចបញ្ជូនទៅរដ្ឋសភាដើម្បីអនុម័ត។
នៅមុនការបោះឆ្នោតជាតិ ឆ្នាំ ២០២៣ កន្លងទៅ អតីតនាយករដ្ឋមន្ត្រីគឺលោក ហ៊ុន សែន បានទទូចឲ្យក្រសួងព័ត៌មានបញ្ចប់ការតាក់តែងសេចក្តីព្រាងដែលគេស្គាល់ថា «A2I Law»។
បើតាមរបាយការណ៍ប្រចាំឆ្នាំរបស់ក្រសួងព័ត៌មានដែលវីអូអេទទួលបាន សម្រាប់ទិសដៅនៅឆ្នាំ ២០២៤ នេះ ក្រសួងនឹងបញ្ចប់សេចក្តីព្រាងច្បាប់ស្តីសិទ្ធិទទួលបានព័ត៌មានដែលកំពុងស្ថិតនៅក្នុងដែនសមត្ថកិច្ចរបស់ក្រសួងយុត្តិធម៌។
នាយកប្រតិបត្តិនៃសមាគមសម្ព័ន្ធអ្នកសារព័ត៌មានកម្ពុជា ឬហៅកាត់ថា ខេមបូចា លោក ណុប វី ប្រាប់វីអូអេថា សេចក្តីព្រាងច្បាប់ស្តីពីសិទិ្ធទទួលបានព័ត៌មានមានភាពខុសគ្នាពីច្បាប់ស្តីពីរបបសារព័ត៌មាន ពាក់ព័ន្ធនឹងសិទ្ធិទទួលបានព័ត៌មានរបស់ប្រជាពលរដ្ឋ។ លោកយល់ថា បើសិនសេចក្តីព្រាងនេះបានក្លាយជាច្បាប់ នោះវានឹងរួមចំណែកដល់ការកសាងប្រជាធិបតេយ្យនៅកម្ពុជា។
លោកប្រាប់វីអូអេថា៖ «ច្បាប់ស្តីពីសិទ្ធិទទួលបានព័ត៌មានជាច្បាប់មួយដែលប្រជាពលរដ្ឋទូទៅអាចមានសិទ្ធិស្នើសុំព័ត៌មានពីស្ថាប័នសាធារណៈរបស់រដ្ឋ ហើយការស្នើសុំព័ត៌មានហ្នឹងមានការចែងអំពីគោលការណ៍ នីតិវិធីច្បាស់លាស់ ចែងអំពីការទទួលខុសត្រូវរបស់មន្ត្រីទទួលបន្ទុកផ្នែកព័ត៌មានរបស់ស្ថាប័នរដ្ឋ ត្រូវផ្តល់ព័ត៌មាន និងនីតិវិធីផ្សេងៗទៀត។ អ៊ីចឹង វាមានភាពលម្អិត ហើយវាមានប្រយោជន៍សម្រាប់ឲ្យប្រជាពលរដ្ឋចូលរួមនៅក្នុងដំណើរការប្រជាធិបតេយ្យនៅក្នុងសង្គម»។
អតីតនាយករដ្ឋមន្ត្រី លោក ហ៊ុន សែន លើកឡើងក្នុងជំនួបមួយជាមួយអ្នកកាសែតកាលពីខែមករា ឆ្នាំ ២០២៣ ថា សេចក្តីព្រាងដែលមានបំណងអនុញ្ញាតឲ្យសាធារណជនមានលទ្ធភាពទទួលបានកំណត់ត្រា និងឯកសារនានារបស់រដ្ឋាភិបាលនឹងត្រូវអនុម័តនៅឆ្នាំ ២០២០ ប៉ុន្តែក្រសួងព័ត៌មានថា ការរាតត្បាតជំងឺកូវីដ១៩បានធ្វើឲ្យមានការពន្យារពេលការប្រជុំអំពីសេចក្តីព្រាងច្បាប់នេះ។
នាយកផ្នែកតស៊ូមតិនៃមជ្ឈមណ្ឌលសិទ្ធិមនុស្សកម្ពុជាលោក សួន យុធ្យា ស្នើឲ្យក្រសួងយុត្តិធម៌ពិនិត្យឲ្យបានល្អិតល្អន់លើសេចក្តីព្រាងច្បាប់ស្តីពីសិទ្ធិទទួលបានព័ត៌មាននេះ ហើយត្រូវពិចារណាដាក់បញ្ចូលមតិយោបល់របស់អង្គការសង្គមស៊ីវិល ដើម្បីធានាថា សេចក្តីព្រាងនេះនឹងត្រូវអនុម័តឲ្យទៅជាច្បាប់ ដោយមានការគោរពតាមបទដ្ឋានសិទ្ធិមនុស្សជាតិ និងអន្តរជាតិ។
លោកបន្ថែមថា សេចក្តីព្រាងច្បាប់នេះមានសារៈសំខាន់ដល់ការឆ្លើយតបនឹងចំណុចអវិជ្ជមានមួយចំនួនដូចជាអំពើពុករលួយ និងបង្កើនគណនេយ្យភាពនៃការដឹកនាំរដ្ឋ។
លោកថ្លែងថា៖ «ច្បាប់នេះ វាមានប្រយោជន៍ច្រើន។ វាមានប្រយោជន៍ច្រើនមែនទែន ទាក់ទងនឹងអំពើអវិជ្ជមានផ្សេងៗ ដូចជាទាក់ទងទៅនឹងប្រឆាំងអំពើពុករលួយ បង្កើតឲ្យមានការចូលរួមពីប្រជាពលរដ្ឋ ក្នុងការធ្វើសេចក្តីសម្រេចចិត្ត ហើយនឹងដំណើរការនៃការប្រព្រឹត្តទៅរបស់រដ្ឋាភិបាល។ អ៊ីចឹង ច្បាប់ហ្នឹង វាមានប្រយោជន៍ជាចម្បង ជាចម្បងហ្នឹងច្រើន។ អ៊ីចឹង បើសិនជាច្បាប់ សេចក្តីព្រាងច្បាប់ ដែលយើងរាល់ថ្ងៃនេះ របស់យើងនេះ ដល់ក្រសួងយុត្តិធម៌ អ៊ីចឹងលោកគួរតែពិនិត្យមើលឲ្យបានគ្រប់ជ្រុងជ្រោយ ជាពិសេសច្បាប់ហ្នឹងទៀតសោត ត្រូវតែមានការទទួលយកធាតុចូលពីអង្គការសង្គមស៊ីវិល»។
ច្បាប់ស្តីពីសិទ្ធិទទួលបានព័ត៌មាននេះនឹងដាក់សម្ពាធឲ្យស្ថាប័នរដ្ឋបញ្ចេញព័ត៌មាន និងទិន្នន័យកាន់តែច្រើនដល់សាធារណជន ហើយពលរដ្ឋ និងអ្នកសារព័ត៌មានអាចស្នើសុំព័ត៌មានពីស្ថាប័នទាំងនោះ។ ការផ្តល់ទិន្នន័យ និងការបញ្ចេញព័ត៌មានពីសំណាក់ស្ថាប័នរដ្ឋត្រូវបានអ្នកតាមដានមើលឃើញថា នៅមានលក្ខណៈរឹតត្បិតនៅឡើយ។
ក្នុងរបាយការណ៍ប្រចាំឆ្នាំរបស់ក្រសួងព័ត៌មាន ក្រៅពីខិតខំបញ្ចប់ការធ្វើច្បាប់ស្តីពីសិទ្ធិទទួលបានព័ត៌មាន ក្រសួងនេះមានគោលដៅមួយចំនួនទៀត គឺបញ្ចប់សេចក្តីព្រាងអនុក្រឹត្យស្តីពីការរៀបចំនិងការប្រព្រឹត្តទៅរបស់ក្រសួងព័ត៌មានក្នុងបរិបទបរិវត្តកម្មឌីជីថល និងកសាងសមត្ថភាព និងគុណភាពមូលធនមនុស្ស និងពង្រឹងសមត្ថភាពវិជ្ជាជីវៈ និងជំនាញក្នុងអង្គភាពផ្សាយរបស់រដ្ឋ ដើម្បីដើរទាន់ទីផ្សារឌីជីថលក្នុងវិស័យព័ត៌មាន និងផ្សព្វផ្សាយ។
អ្នកនាំពាក្យក្រសួងព័ត៌មានលោក ទេព អស្នារិទ្ធ ប្រាប់វីអូអេថា ដើម្បីចូលរួមអនុវត្តឲ្យបានជោគជ័យនូវកម្មវិធីនយោបាយ និងយុទ្ធសាស្ត្របញ្ចកោណដំណាក់កាលទី១របស់រាជរដ្ឋាភិបាលកម្ពុជា ក្រសួងព័ត៌មាន បានដាក់ចេញនូវទិសដៅការងារឆ្នាំ២០២៤ ដោយកំណត់នូវអាទិភាពសំខាន់ៗ រាប់បញ្ចូលទាំងការរៀបចំវិធានការច្បាប់ និងបទដ្ឋានគតិយុត្ត ដែលជាបេសកកម្មចម្បងរបស់ក្រសួងព័ត៌មាន។
លោកលើកឡើងថា៖ «ក្រសួងបានបន្តយកចិត្តទុកដាក់លើការរៀបចំសេចក្តីព្រាងច្បាប់និងលិខិតបទដ្ឋានគតិយុត្តនានាឲ្យស្របតាមកាលៈទេសៈ ការវិវឌ្ឍ និងទម្រង់ការរបស់សង្គមក្នុងគោលបំណងដើម្បីរៀបចំប្រព័ន្ធ និងយន្តការគ្រប់គ្រងសណ្តាប់ធ្នាប់ព័ត៌មាន លំហព័ត៌មាន សន្តិសុខព័ត៌មាន និងការប្រឆាំងព័ត៌មានក្លែងក្លាយ សំដៅធានាសិទ្ធិទទួលបានព័ត៌មាន សេរីភាពសារព័ត៌មាន លើកកម្ពស់ព័ត៌មានប្រកបដោយគុណភាព សុវត្ថិភាពក្នុងការប្រើប្រាស់ព័ត៌មាន»។
បើតាមលោក ទេព អស្នារិទ្ធ ក្នុងការរៀបចំ និងពង្រឹងបទប្បញ្ញត្តិច្បាប់ និងលិខិតបទដ្ឋានគតិយុត្ត ក្រសួងបាន និងបន្តផ្តោតការយកចិត្តទុកដាក់ដើម្បីសម្រេច ក្នុងក្របខណ្ឌទិសដៅការងារឆ្នាំ ២០២៤ ការរៀបចំសេចក្តីព្រាងអនុក្រឹត្យស្តីពីការរៀបចំ និងការប្រព្រឹត្តទៅរបស់ក្រសួងព័ត៌មាន ការពិនិត្យ និងរៀបចំឡើងវិញនូវច្បាប់ស្តីពីរបបសារព័ត៌មាន និងការរៀបចំ «ធម្មនុញ្ញសារព័ត៌មាន»ដែលជាស្តង់ដារប្រតិបត្តិក្រមសីលធម៌វិជ្ជាជីវៈរបស់ជាតិមួយ សម្រាប់គ្រប់ភាគីទាំងអស់គោរព និង អនុវត្តតាម ក៏ដូចជាការរៀបចំលិខិតបទដ្ឋាន និងយន្តការគតិយុត្តពាក់ព័ន្ធផ្សេងៗទៀតផងដែរ។
វីអូអេមិនទាន់អាចសុំការអត្ថាធិប្បាយពីអ្នកនាំពាក្យក្រសួងយុត្តិធម៌លោក ជិន ម៉ាលីន បានទេនៅថ្ងៃព្រហស្បតិ៍នេះ។
សេចក្តីព្រាងច្បាប់ស្តីពីសិទិ្ធទទួលបានព័ត៌មានត្រូវបានរៀបចំឡើងតាំងពីឆ្នាំ ២០១៥ និងមានការពិភាក្សាផ្លាស់ប្តូរយោបល់ជាច្រើនលើកច្រើនសាររវាងភាគីពាក់ព័ន្ធ តែនៅមិនអាចធ្វើឲ្យវាក្លាយជាច្បាប់បាន ដោយសារមានចំណុចជាច្រើនដែលត្រូវកែសម្រួល ក្នុងនោះមានការលើកសំណើពីភាគីសង្គមស៊ីវិលឲ្យទម្លាក់ចោលមាត្រា ១៥.៤ ដែលចែងអំពីការលុបចោលអត្ថបទចេញផ្សាយរួច និងការដកចេញចំណុចទី៧នៃមាត្រា២០ដែលចែងអំពីព័ត៌មានសម្ងាត់៕
វេទិកាបញ្ចេញមតិ