នៅរសៀលថ្ងៃចន្ទនេះ ព្រះសពរបស់ព្រះមហាក្សត្រិយានី Elizabeth ទី ២ នៃចក្រភពអង់គ្លេសត្រូវបានដង្ហែទៅដល់ព្រះរាជដំណាក់ Windsor Castle ដើម្បីរៀបចំពិធីបញ្ចុះព្រះសព បន្ទាប់ពីព្រះរាជពិធីបុណ្យព្រះសពរបស់ព្រះអង្គបានធ្វើឡើងនៅឯព្រះវិហារ Westminster Abbey នៅក្នុងទីក្រុងឡុងដ៍មក។
ព្រះសពរបស់ព្រះអង្គត្រូវបានតម្កល់ជាផ្លូវរដ្ឋតាំងពីថ្ងៃពុធសប្ដាហ៍មុនមកនៅឯសាល Westminster នៃសភាចក្រភពអង់គ្លេស ហើយមនុស្សរាប់ពាន់នាក់បានដើរកាត់មឈូសរបស់ព្រះអង្គដើម្បីសម្ដែងការគោរព។
បន្ទាប់មក មឈូសរបស់ព្រះអង្គត្រូវបានដង្ហែពីសាល Westminster ទៅកាន់ព្រះវិហារ Westminster Abbey កាលពីព្រឹកថ្ងៃចន្ទនេះ មុនពេលត្រូវបានដង្ហែទៅដល់ព្រះរាជពិធីបញ្ចុះព្រះសពរបស់ព្រះអង្គនៅឯព្រះរាជដំណាក់ Windsor Castle នៅរសៀលថ្ងៃចន្ទនេះ។
កម្រងរូបភាព៖ ព្រះរាជពិធីបុណ្យព្រះសពព្រះមហាក្សត្រិយានី Elizabeth ទី២ នៃចក្រភពអង់គ្លេស
ប្រមុខរដ្ឋរាប់រយនាក់ ដែលក្នុងនោះរួមមានទាំងប្រធានាធិបតីសហរដ្ឋអាមេរិកលោក Joe Biden និងលោកស្រី Jill Biden ដែលជាភរិយាផងដែរ និងឥស្សរជនជាន់ខ្ពស់នានាមកពីជុំវិញពិភពលោក បានចូលរួមនៅក្នុងព្រះរាជពិធីបុណ្យព្រះសពរបស់ព្រះអង្គ។
នៅក្នុងព្រះរាជពិធីបុណ្យព្រះសពរបស់ព្រះអង្គនៅឯព្រះវិហារ Westminster Abbey ព្រះគ្រូ David Hoyle ដែលជាព្រះចៅអធិការព្រះវិហារ Westminster Abbey បានធ្វើជាអធិបតីលើព្រះរាជពិធីនេះ។ ចំណែកឯព្រះគ្រូ Justin Welby ដែលជាប្រធានគណៈបព្វជិតនៃព្រះវិហារ Canterbury គឺជាអ្នកសម្ដែងព្រះធម្មទេសនា។ រីឯនាយករដ្ឋមន្ត្រីចក្រភពអង់គ្លេសអ្នកស្រី Liz Truss វិញ គឺជាអ្នកអានព្រះគម្ពីរ។
បន្ទាប់ពីព្រះរាជពិធីបុណ្យព្រះសពរបស់ព្រះមហាក្សត្រិយានីបានបញ្ចប់រួចរាល់នៅឯព្រះវិហារ Westminster Abbey មក ព្រះមហាក្សត្រ Charles ទី ៣ ដែលជាបុត្រារបស់ព្រះអង្គ និងសមាជិករាជវង្សានុវង្សផ្សេងទៀត បានយាងដោយថ្មើរជើងអមមឈូសរបស់ព្រះអង្គទៅដល់ព្រះរាជដំណាក់ Windsor Castle ដើម្បីរៀបចំពិធីបញ្ចុះព្រះសពរបស់ព្រះអង្គ។
ព្រះសពរបស់ព្រះមហាក្សត្រិយានី Elizabeth ទី ២ នឹងត្រូវបញ្ចុះជាលក្ខណៈឯកជនជិតព្រះសពរបស់ព្រះអង្គម្ចាស់ Philip ដែលជាព្រះស្វាមីរបស់ព្រះអង្គ នៅល្ងាចថ្ងៃចន្ទនេះនៅឯព្រះវិហារ St. George's Chapel នៅក្នុងបរិវេណព្រះរាជដំណាក់ Windsor Castle៕