ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

លីកាដូ​ជំរុញ​រដ្ឋាភិបាលបិទ​មណ្ឌល​ព្រៃ​ស្ពឺ ក្រោយ​​​មា​ន​​អ្នក​ជាប់​ឃុំ​​ទី​នោះ​​​​​​​ស្លាប់​ជា​បន្ត​បន្ទាប់


រូបឯកសារ៖ ទិដ្ឋភាព​នៅ​ខាង​ក្រៅ​ក្រសួង​សង្គមកិច្ច អតីត​យុទ្ធជន និង​យុវនីតិ​សម្បទា នៅ​តាម​បណ្តោយ​មហាវិថី​ព្រះមុនីវង្ស​ក្នុង​រាជធានី​ភ្នំពេញ នៅថ្ងៃ​ទី​៨ ខែ​សីហា​ ឆ្នាំ​២០១៥​។ (ស៊ូ ពិសែន/វីអូអេ)
រូបឯកសារ៖ ទិដ្ឋភាព​នៅ​ខាង​ក្រៅ​ក្រសួង​សង្គមកិច្ច អតីត​យុទ្ធជន និង​យុវនីតិ​សម្បទា នៅ​តាម​បណ្តោយ​មហាវិថី​ព្រះមុនីវង្ស​ក្នុង​រាជធានី​ភ្នំពេញ នៅថ្ងៃ​ទី​៨ ខែ​សីហា​ ឆ្នាំ​២០១៥​។ (ស៊ូ ពិសែន/វីអូអេ)

អង្គ​ការ​សម្ព័ន​ខ្មែរ​ជំរឿន និង​ការ​ពារ​សិទ្ធិមនុស្ស​ ហៅ​កាត់​ថាលីកាដូ​បាន​ជំរុញឱ្យ​ក្រសួង​សង្គម​កិច្ច​បិទ​ចោល​មណ្ឌល​ព្រៃ​ស្ពឺ ក្រោយ​មា​នអ្នក​ជាប់​ឃុំ​នៅ​ទីនោះ​បាន​ស្លាប់​ជា​បន្ត​បន្ទាប់​ ដែលស្លាប់​ជាង​១០​នាក់​នៅ​ខែ​កក្កដា ​ដល់ខែ​សីហា ឆ្នាំ​២០​២២​ ​ដោយ​សារការ​ឈឺ​ធ្ងន់ធ្ងរ​ មិន​ទទួល​ការព្យាបាល​បាន​ត្រឹមត្រូវ ដោយ​ដេក​ស្លាប់​នៅ​លើ​ឥដ្ឋ​ក្នុង​បន្ទប់​ឃុំ​ឃាំង ហើយ​ការ​ឃុំ​ឃាំង​នោះ​មិន​មាន​ស្តង់​ដារ​ត្រឹម​ត្រូវ។ នេះ​តាម​សេចក្តី​ថ្លែង​ការ​ណ៍​របស់​អង្គ​ការ​លីកាដូ ​ចុះ​ថ្ងៃ​ទី​៧ ខែ​ធ្នូ​នេះ។

​បើ​តាម​អង្គការ​លីកាដូ​ មនុស្ស​ពីរ​នាក់​បាន​ស្លាប់​នៅ​ក្នុង​ខែសីហា ដោយ​សារ​ការ​ឃុំ​ខ្លួន​មិន​បាន​ត្រឹម​ត្រូវ​នៅ​មណ្ឌល​សង្គម​កិច្ច​ព្រៃស្ពឺ ដែល​ស្ថិត​ក្រោម​ការ​គ្រប់​គ្រង​របស់ក្រសួង​សង្គម​កិច្ច​ អតីត​យុទ្ធជន និង​យុវនីតិ​សម្បទា ដែលបើក​ដំណើរ​ការតាំង​ពី​ឆ្នាំ​២០​០៤​មក។ អង្គ​ការ​នេះ​បន្ថែមថា​នៅ​ចន្លោះ​ខែ​កក្កដា ដល់​ខែ​សីហា ឆ្នាំ២០២២ មនុស្ស​ជាង​១០​នាក់ ​បាន​ស្លាប់​នៅ​មណ្ឌល​ព្រៃ​ស្ពឺនេះ។

​មនុស្ស​ដែល​ត្រូវ​បាន​ឃុំ​ខ្លួន​នៅ​មណ្ឌល​ព្រៃ​ស្ពឺ​ ​ភាគ​ច្រើន​គឺ​មក​ពី​ក្រុម​មនុស្ស​ដែល​មិន​ត្រូវ​បាន​គេ​អើពើ​ដូច​ជា​ ​ជន​អនាថា អ្នក​សុំទាន​ ​អ្នកប្រើ​ប្រាស់​គ្រឿង​ញៀន​ ​និង​អ្នក​ប្រកបរបរ​ផ្លូវ​ភេទ​ជាដើម។ ពួក​គេ​មិន​ត្រូវ​បាន​ចោទ​ប្រកាន់​ពី​បទល្មើស​ណាមួយ​ទេ​ ​ប៉ុន្តែ​ត្រូវ​បាន​ឃុំ​ខ្លួន​ដោយ​មិន​ច្បាស់លាស់ និង​ត្រូវ​បាន​ហាម​ឃាត់​មិន​ឱ្យ​ចា​ក​ចេញ​។ នេះ​បើ​តាម​អង្គការ​លី​កា​ដូ។

​អង្គ​ការ​ដែល​ធ្វើ​ការ​ពាក់​ព័ន្ធ​សិទ្ធិ​មនុស្ស​នេះ​ ទាម​ទារ​ឱ្យ​ក្រសួង​សង្គមកិច្ច​បិទ​មណ្ឌល​ព្រៃ​ស្ពឺ​។ ហើយ​អង្គ​ការ​នេះ​ក៏​បាន​ទាម​ទារ​ឱ្យ​បិទ​មណ្ឌល​នេះ​ម្តង​រួច​មក​ហើ​យ ​កាលពី​ឆ្នាំ​២០​០៨​មក​ ដើម្បី​កុំ​ឱ្យ​មាន​ករណី​មនុស្ស​ស្លាប់បន្ត​ទៀត​ និងបញ្ចប់​ស្ថាន​ភាព​អាក្រក់​ដែល​ប្រឈម​ដោយ​មនុស្សជា​ប់​ឃុំ​នៅ​ទីនោះ​។

ក្នុង​សេច​ក្តី​ថ្លែង​ការណ៍​នេះ ​អង្គ​ការ​លីកាដូ​បញ្ជាក់​ថា៖ ​«​មណ្ឌល​ព្រៃ​ស្ពឺ​ ​ក៏ដូចជា​ទីតាំង​ទាំង​អស់​ផ្សេង​ទៀត​នៃ​ការ​ឃុំ​ខ្លួន​មិន​ត្រឹមត្រូវ​ ​គួរតែ​ត្រូវ​បាន​បិទ​ឱ្យ​បាន​ឆាប់​រហ័ស​ ​និង​ជា​រៀង​រហូត ហើយ​អ្នក​ដែល​ត្រូវ​បាន​ចោទ​ប្រកាន់​ពី​ការ​ធ្វេសប្រហែស​ ​ឬ​ការ​រំលោភ​បំពាន​ ​ត្រូវ​ទទួលខុសត្រូវ​ចំពោះមុខ​ច្បាប់។ ប្រវត្តិ​នៃ​ការ​រំលោភបំពាន​ ​និង​ការ​ស្លាប់​នៅ​មណ្ឌល​ព្រៃ​ស្ពឺ​ ​គឺ​អូស​បន្លាយពេល​ច្រើន​ពេក​ហើយ និង​បង្កើត​ឱ្យ​មាន​ការ​រំលោភ​បំពាន​បន្ថែម​ទៀត​ ​ប្រសិន​បើ​មណ្ឌល​នេះ​មិន​ត្រូវ​បាន​បិទ​ដំណើរ​ការ​នោះ​ទេ។ សូម​បិទ​មណ្ឌល​ព្រៃ​ស្ពឺ»។

​នាយក​ទទួល​បន្ទុក​កិច្ចការ​ទូទៅ​នៃ​អង្គ​ការ​កាពារ​សិទ្ធិ​មនុស្ស​លីកាដូ​ លោក អំ សំអាត​ ប្រាប់​វីអូអេ​នៅ​ថ្ងៃ​ពុធ​នេះ​ថា​ មណ្ឌល​ព្រៃ​ស្ពឺ ជា​ក​ន្លែ​ងដែលយកជនអនាថា អ្នក​គ្មាន​ទីជម្រក​ ឬ​គ្មាន​មុខ​របរ ជា​ដើម ទៅ​បណ្តុះ​បណ្តាល​វិជ្ជា​ជីវៈ​ ប៉ុន្តែ​មិន​អាច​បិទ​សិទ្ធិ​ពួកគេ​បាន​ទេ ឧទាហរណ៍​ដូចជា​បើ​សិនអ្នក​ណា​ម្នាក់​មិន​ស្ម័គ្រ​ចិត្ត​ស្នាក់​នៅ​ទីនោះ​ ហើយ​ត្រូវ​បានបិទ​សិទ្ធិ​សេរី​ភាពមិន​ឱ្យ​ចេញ​ គឺ​មាន​ន័យ​ថា ជា​ការឃុំឃាំង​ និង​រំលោភ​សិទ្ធិ​សេរី​ភាព​យ៉ាង​ធ្ងន់​ធ្ងរ​ហើយ​។ លោក​បន្ថែម​ថា ជន​អនាថា ឬ​អ្នក​គ្មានទី​ជម្រក​ដែល​មានជំងឺ​ធ្ងន់​ធ្ងរ​ពីខាង​ក្រៅ ​អាជ្ញាធរ​គួរ​យក​ទៅ​ដាក់​ព្យាបាល​នៅ​មន្ទីរ​ពេទ្យ​រដ្ឋ ដោយមិន​មែន​យក​ទៅ​ទុក​ព្យាបាល​នៅ​មណ្ឌល​នេះ រហូត​ដល់​ធ្វើ​ឱ្យ​មនុស្ស​ស្លាប់​ឡើយ។

លោក​ថ្លែង​ថា៖ ​«​[ទីមួយ​]​ មណ្ឌល​សំចត បាន​ន័យ​ថា​ជា​កន្លែង​បណ្តោះអាសន្ន​ សម្រាប់មនុស្ស​ ឬក៏ជា​មណ្ឌល​មួយ​ ​សម្រាប់​បណ្តុះ​បណ្តាល​វិជ្ជា​ជីវៈ​ ទៅ​ដ​ល់​អ្នក​ដែល​ជា​ជន​អនា​ថា​ ដែល​គាត់​គ្មាន​មុខរបរ​ គ្មាន​ទី​ជម្រក។ ហើយ​ពេល​បណ្តុះ​បណ្តាល​វិជ្ជាជីវៈហើយ ​ធ្វើ​សមា​ហរ​ណ​កម្ម​ទៅ​ស្រុក​កំណើត​ឬ​កន្លែង​ណា​មួយ​ដែល​អាច​ឱ្យ​គាត់​អាច​មាន​លំនឹង​ក្នុង​ការ​ប្រកប​អាជីវ​កម្ម»។

លោក​បន្ត​ថា​៖ ​«​ទីពីរ ​មណ្ឌល​សំចត​មិន​មែន​ជា​កន្លែង​ឃុំឃាំង​ទេ អ៊ីចឹង​នៅពេល​ដែល​គេមិន​ព្រម​ស្នាក់​នៅ​ក្នុង​មណ្ឌល យើង​មិនអាច​ឃុំឃាំង​គេទេ​ ​កាល​ណា​ឃុំឃាំង​ វា​ជា​រឿង​ខុសច្បាប់ ជា​ការ​រំលោភ​ទៅ​លើ​សិទ្ធិ​មនុស្ស​ធ្ងន់​ធ្ងរ​។ ​ហើយ​ទីបី ប្រសិន​បើ​មនុស្ស​ដែល​មាន​ជំងឺ​ ពីក្រៅទៅទៀត អាហ្នឹង​មិនគួរ​បញ្ជូន​ទៅ​មណ្ឌលហ្នឹង​ទេ គឺគួរ​បញ្ជូន​ទៅមន្ទីរពេទ្យរដ្ឋ​ណា​មួយ ​ឬកន្លែងថែទាំ​សុខភាព​ណាមួយ ដើម្បី​ព្យាបាល​គាត់»។

លោក​បន្ថែម​ថា មណ្ឌល​ព្រៃ​ស្ពឺ​នេះ មាន​រយៈ​ពេល១៨ឆ្នាំ​ហើយ ​តាំង​ពី​២០​០៤​មក ប៉ុន្តែ​ការ​រៀប​ចំ​គឺ​មិន​ទាន់​ឃើញ​មាន​ភាព​ល្អ​ប្រសើរ​អ្វី​នៅ​ឡើយ​ទេ ​គឺ​មាន​ភាព​ចង្អៀត ហើយ​ការ​ផ្តល់​សេវា​នានា ​បូករួម​ការ​ផ្តល់​សេវា​ថែ​ទាំង​សុខ​ភាព​មិន​បាន​ត្រឹម​ត្រូវ​ ដែល​នៅ​តែ​បណ្តាល​ឱ្យ​មានមនុស្ស​ស្លាប់​ដដែល។ ដូច្នេះ​លោក​ថា​ដើម្បី​កុំ​ឱ្យ​មាន​បញ្ហា​នេះ​កើត​ឡើង​ទៀត​ និង​បញ្ចៀស​ការ​រិះ​គន់​នានា ​មណ្ឌល​ព្រៃ​ស្ពឺ​នេះ​ គួរតែបិទ​ទ្វារ​។​

លោក​ថ្លែង​ថា​៖«យើង​សុំ​ឱ្យបិទ​តែម្តង​នូវ​មណ្ឌល​នេះ ពី​ព្រោះ​រយៈ​ពេល​កែ​ប្រែរាប់​សិប​ឆ្នាំ​មក​ហើយ​ អត់​មាន​អី​កែ​ប្រែ​ទេ​។ អ៊ីចឹង​ដើម្បី​ធានា​ ​ទីមួយ ​ដើម្បី​កុំ​ឱ្យ​មាន​ការ​ចោទ​ប្រកាន់​អំពី​ការ​ឃុំ​ឃាំង​មនុស្ស​ ដោយ​ខុស​ច្បាប់​ ពីព្រោះ​មណ្ឌល​នេះ​មិន​មែន​ជា​មណ្ឌល​ឃុំឃាំង​ទេ។​ ហើយ​ទី​ពីរ​ កុំ​ឱ្យ​មាន​មនុស្ស​ស្លាប់​នៅ​ក្នុង​មណ្ឌល​ហ្នឹង​ច្រើន​តទៅទៀត»។

សេចក្តី​ថ្លែងការណ៍​របស់​អង្គ​ការ​នេះ​ចុះ​ថ្ងៃទី៧​ ខែ​ធ្នូ​នេះ​បន្ថែម​ថា​ មណ្ឌល​ព្រៃ​ស្ពឺ​បាន​អះអាង​ថា​ជា​មណ្ឌល​បណ្ដុះ​បណ្ដាល​វិជ្ជាជីវៈ​ ​និង​ត្រូវ​បាន​គ្រប់គ្រង​ដោយ​ក្រសួងសង្គមកិច្ច​ ​អតីត​យុទ្ធជន​ ​និង​យុ​វ​នីតិសម្បទា​ ​ប៉ុន្តែ​មណ្ឌល​នេះ​ដំណើរ​ការ​ជា​មណ្ឌល​ឃុំ​ខ្លួន​ដោយ​មិន​ត្រឹមត្រូវ​ ​ដើម្បី​លាក់បាំង​រូបភាព​ពី​ប្រជា​ពលរដ្ឋ​ដែល​មិន​ត្រូវ​បាន​គេ​អើពើ​ ​និង​អ្នក​ដែល​ប្រឈម​នឹង​ហា​និ​ភ័យ​ ​នៅ​រាជធានី​ភ្នំពេញ​ ​ខណៈ​ពួកគេ​ត្រូវ​បាន​បដិសេធ​សិទ្ធិ​ទទួល​បាន​ការ​ការពារ​ផ្លូវច្បាប់​ ​និង​តម្រូវ​ការចាំបាច់​ ​ដូចជា​អាហារ​បរិភោគ​ ​និង​ការថែទាំ​ឬ​ព្យាបាល​ជំងឺ​ឱ្យ​បាន​គ្រប់​គ្រាន់។​

​ការ​ស្លាប់​ចុងក្រោយ​នេះ​ ​កើតឡើង​អំឡុង​ពេល​មាន​ការ​កើន​ឡើង​អ្នកជាប់ឃុំ​នៅ​ក្នុងមណ្ឌល​ឃុំ​ខ្លួន​ដោយ​មិន​ត្រឹមត្រូវ​នេះ​ទៅ​លើ​បុរស​និង​ស្ត្រី​ដែល​មិន​ត្រូវ​បាន​គេ​អើពើ​ ​នៅ​ក្នុងមណ្ឌល​មួយ​ដែល​មនុស្សជា​ង​៤​០​០​នាក់​ ​ត្រូវ​បាន​ឃុំ​ខ្លួន​ ​គិត​ត្រឹម​ខែ​សីហា​ ​ឆ្នាំ​២​០​២​២​ ​។​ ​សាក្សី​មួយ​ចំនួន​បាន​រៀប​រាប់​ពី​ស្ថានភាព​ដូច​នរក​ ​រួម​មាន​បន្ទប់​ឃុំឃាំង​ដែល​ចង្អៀត​ណែន​ខ្លាំង​ ​កង្វះ​ចំណីអាហារ​ ​ការ​វាយដំ​ដោយសារ​មិន​ស្ដាប់​តាម​ការណែនាំ​ ​ខណៈ​ដែល​ការថែទាំ​សុខភាព​ គឺ​ទទួល​បានតែ​ថ្នាំ​ ​ប៉ា​រ៉ា​សេ​តា​ម៉ុ​ល​ ​តែប៉ុណ្ណោះ​ ​ទោះបីជា​មាន​ជំងឺ​ធ្ងន់ធ្ងរ​ក៏ដោយ។ នេះ​បើ​តាម​អង្គការ​លីកាដូ​។

​អគ្គ​នាយក​នៃ​អគ្គ​នាយកដ្ឋាន​បច្ចេកទេស​នៃ​ក្រសួង​សង្គម​កិច្ច ​អតីត​យុទ្ធជន ​និង​យុវនីតិ​សម្បទា​លោក ​តូច ចាន់នី ​លើក​ឡើង​ថា មណ្ឌល​ព្រៃ​ស្ពឺ ​ឬ​ហៅថា​មណ្ឌល​សំចត​សង្គម​កិច្ច​រាជ​ធានី​ភ្នំពេញនេះ​ មិន​អាច​បិទ​បាន​ទេ ព្រោះជា​កន្លែងប្រមូល​ជនអនាថា​ អ្នកគ្មា​នទីជម្រក រស់នៅ​តាម​ចិញ្ចើមថ្នល់​ ​ដែល​ហាល​ភ្លៀង​ ហាលខ្យល់​ ឬមិន​មាន​អាហារគ្រប់គ្រាន់ ឬ​ខ្វះ​អនាម័យ ឱ្យ​មក​ស្នាក់​នៅមណ្ឌលនេះបណ្តោះ​អាសន្ន ហើយ​ម្យ៉ាង​ការ​ប្រមូល​យក​មក​ដាក់​នៅ​មណ្ឌល​នេះ គឺដើម្បី​រក្សា​សណ្តាប់​ធ្នាប់ និង​សោ​ភ័​ណ​ភាព​ទីក្រុង​ភ្នំពេញ។

​លោក​ថា​ករណីមនុស្សស្លាប់ក្នុង​មណ្ឌល​ព្រៃ​ស្ពឺនេះពិត​ជា​មាន ប៉ុន្តែ​ដោយ​សារ​តែ​អ្នក​ដែល​មក​ស្នាក់​នៅទីនោះ ​ភាគ​ច្រើន​សុទ្ធ​តែ​ជា​អ្នក​មាន​ជំងឺ​ប្រចាំ​កាយ​ ឬ​ខ្លះ​ឈឺ​ធ្ងន់​ធ្ងរ​ទៅហើយ​ ដោយ​ក្នុង​នោះក៏​មាន​ពេទ្យ​ប្រចាំ​ការ​ និង​មាន​ការ​បញ្ជូន​ទៅពេទ្យ​រដ្ឋ​មួយ​ចំនួន​ផង​ដែរ​។

លោក​បញ្ជាក់​ថា៖ ​«ដូច​ដែល​ខ្ញុំបាន​បញ្ជាក់​ដដែល​ៗ ថា​អ្នកដែល​ចូលទីនេះ​ គឺអ្នកដែល​គាត់​មាន​ជំងឺ​ហើយ​ស្រេច​ហើយ​ អ្នកខ្លះធ្ងន់ធ្ងរ​មែន​ទែន អ៊ីចឹង​ទេ យើង​យក​ទៅ​សង្គ្រោះនៅតាម​មន្ទីរ​ពេទ្យ​រដ្ឋមួយ​ចំនួន​ទៅ។ អ៊ីចឹងទេ​ការ​បិទ​មណ្ឌល​នេះ សម្រាប់​ខ្ញុំ ​ទស្សនៈ​ខ្ញុំ​ គឺ​យើង​មិនអាច​បិទមណ្ឌ​លនេះបាន​ទេ តែយើង​ទុករក្សា ដើម្បី​កែ​លម្អ​ឱ្យកាន់​តែល្អទៅ ​ស្រប​ទៅ​តាម​ការ​គោរពសិទ្ធិមនុស្ស​ ការ​រស់​នៅ​ប្រកប​ដោយ​ស្តង់ដារ​ ​ហៅ​ថាបរិស្ថាន​ល្អ។ យើងនឹងព្យាយាម​កែ​លម្អ​»។​

បើ​តាម​លោក ​តូច ចាន់នី តួ​លេខអ្នក​ចេញ​ចូល​ស្នាក់​នៅ​មណ្ឌលនេះ គឺ​មាន​ការប្រែ​ប្រួល អាច​មាន​ចំនួន​១០០ ឬ២០០​នាក់ ឬតិច​ជាង​នេះ​។ លោក​បន្តថា អ្នក​ដែល​មក​ស្នាក់​នៅ​ក្នុង​មណ្ឌល​នេះ បើ​សិន​ជារក​ឃើញ​ក្រុម​គ្រួសារ ឬ​ស្រុក​កំណើត​ គឺ​គណៈ​កម្មការ​ជន​អនាថា​នឹង​ចាត់​ចែងប្រគល់​ទៅ​ក្រុម​គ្រួសារ​វិញ។

ក្នុង​ឆ្នាំ​២​០​១​៤​ ​អង្គការ​លី​កា​ដូ ​និង​អង្គការ​ឃ្លាំមើល​សិទ្ធិមនុស្ស​បាន​រាយការណ៍​ពី​ហេតុ​ការណ៍នៃ​ការ​រំលោភ​បំពាន​ពីសំណាក់​បុគ្គលិក​ទៅលើ​អ្នក​ជាប់ឃុំ​ ដូចជា​ការ​វាយដោយរំពាត់​ ​ការ​វាយដំ​ ​ការ​ឆក់​ ​និង​ការ​រំលោភបំពាន​ផ្លូវ​ភេទ​ ​ក៏ដូចជា​ការ​បង្ខំ​ពួកគេ​ឱ្យ​ធ្វើការ​ជាដើម។ ​ពួកគេក៏បាន​បញ្ជាក់​ពី​ការ​ស្លាប់​របស់​អ្នកជាប់ឃុំ​ដែល​គួរតែ​អាច​ការពារ​បាន​ ​ដោយ​សារ​អ្នក​ស្លាប់​ទាំង​នោះ​ត្រូវ​បាន​បដិសេធ​ក្នុង​ការ​ទទួល​បានការ​ព្យាបាល​ជំងឺ។

បន្ទាប់ពី​ទទួល​បាន​ព័ត៌មាន​អំពី​ការ​ស្លាប់​ថ្មីៗ​នេះ អង្គការ​លី​កា​ដូ​បាន​ដាក់​លិខិត​ស្នើសុំ​ការអនុញ្ញាត​ ​នៅ​ចុងខែ​តុលា​ ​ឆ្នាំ​២​០​២​២​ ​ដើម្បី​បញ្ជូន​ក្រុម​គ្រូពេទ្យ​ ​រួម​មាន​វេជ្ជបណ្ឌិត​ ​ដើម្បី​វាយ​តម្លៃ​ ​និង​ព្យាបាល​អ្នក​ជាប់​ឃុំ​នៅ​ក្នុងមណ្ឌល។ លិខិត​ស្នើសុំ​ ​ដែល​បាន​ដាក់​ទៅ​មន្ទីរសង្គមកិច្ច​ ​អតីត​យុទ្ធជន​ ​និង​យុ​វ​នីតិសម្បទា​ ​នៅ​ក្នុង​រាជ​ធានី​ភ្នំពេញ ​នៅ​តែ​មិន​មាន​ការ​ឆ្លើយ​តប​ ​ហើយ​នៅ​តែ​មាន​ការ​រឹតត្បិត​ក្នុង​ការ​ចូល​ទៅ​កាន់​មណ្ឌល​ព្រៃ​ស្ពឺ​នេះ​៕

XS
SM
MD
LG