លោក Dmytro Kuleba រដ្ឋមន្ត្រីការបរទេសអ៊ុយក្រែន បានសង្កត់ធ្ងន់ទៅកាន់ប្រទេសជាសមាជិកអាស៊ាន ឲ្យគាំទ្រដល់អ៊ុយក្រែនទាំងខាងនយោបាយនិងសម្ភារៈ ដើម្បីជួយដល់ការប្រយុទ្ធតស៊ូរបស់អ៊ុយក្រែនប្រឆាំងនឹងរុស្ស៊ី។ ជាមួយគ្នានោះ លោកក៏បានចោទរដ្ឋាភិបាលរុស្ស៊ីថាកំពុងលែង «ល្បែងទុរភិក្ស» ជាមួយនឹងពិភពលោក ដោយរារាំងការដឹកជញ្ជូនគ្រាប់ធញ្ញជាតិនិងផលិតផលកសិកម្មផ្សេងៗទៀតរបស់អ៊ុយក្រែន។ លោក Kuleba បានថ្លែងដូច្នេះទៅកាន់ក្រុមអ្នកសារព័ត៌មាន នៅក្នុងសន្និសីទសារព័ត៌មានមួយ ក្រោយកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធនានា នៅថ្ងៃសៅរ៍នេះ។ នេះបើយោងតាមសេចក្តីរាយការណ៍របស់ទីភ្នាក់ងារព័ត៌មាន The Associated Press៕
- ដោយ Reuters
លោក Joe Biden ប្រធានាធិបតីសហរដ្ឋអាមេរិក បានថ្លែងអរគុណនាយករដ្ឋមន្ត្រីកម្ពុជា លោក ហ៊ុន សែន ដែលជាប្រធានអាស៊ានប្តូរវេន ចំពោះសេចក្តីថ្លែងការណ៍សំខាន់ៗរបស់លោក អំពីសង្គ្រាមឈ្លានពានរបស់រុស្ស៊ីនៅអ៊ុយក្រែន។ ជាមួយគ្នានោះ លោក Biden ក៏សង្ឃឹមថានឹងឃើញលទ្ធិប្រជាធិបតេយ្យត្រូវបានស្តាឡើងវិញនៅប្រទេសមីយ៉ាន់ម៉ា ដែលកំពុងស្ថិតក្រោមការគ្រប់គ្រងរបស់របបយោធា។ លោក Joe Biden បានថ្លែងដូច្នេះ មុនជំនួបទ្វេភាគីជាមួយលោក ហ៊ុន សែន។ នេះបើយោងតាមសេចក្តីរាយការណ៍របស់ទីភ្នាក់ងារព័ត៌មាន Reuters៕
- ដោយ Associated Press
លោក Fumio Kishida នាយករដ្ឋមន្ត្រីជប៉ុន បានជួបពិភាក្សាជាមួយមេដឹកនាំអាស៊ាននៅរសៀលថ្ងៃសៅរ៍នេះ ក្នុងអំឡុងកិច្ចប្រជុំកំពូលអាស៊ាន ជប៉ុន ហើយបានប្រកាសថា រដ្ឋាភិបាលជប៉ុននឹងផ្តល់កម្ចីជាទឹកប្រាក់ចំនួន ២.១០០ លានដុល្លារអាមេរិក ដើម្បីជួយដល់ការស្តាសេដ្ឋកិច្ចឡើងវិញរបស់អាស៊ានពីវិបត្តិកូវីដ១៩។ ការប្រកាសផ្តល់កម្ចីនេះធ្វើឡើង ស្របពេលដែលការឈ្លានពានរបស់រុស្ស៊ីលើអ៊ុយក្រែនបានបណ្តាលឲ្យតម្លៃថាមពលនិងស្បៀងអាហារឡើងថ្លៃ។ លោក Kishida ក៏បានបញ្ជាក់សាជាថ្មីអំពីការគាំទ្ររបស់លោកចំពោះទស្សនវិស័យរបស់អាស៊ានលើតំបន់ឥណ្ឌូប៉ាស៊ីហ្វិក ហើយក៏បានស្នើឲ្យមានកិច្ចសហប្រតិបត្តិការបន្ថែមទៀតរវាងជប៉ុននិងអាស៊ាន។ នេះបើយោងតាមសេចក្តីរាយការណ៍របស់ទីភ្នាក់ងារព័ត៌មាន The Associated Press៕
- ដោយ Associated Press
លោក Joe Biden ប្រធានាធិបតីសហរដ្ឋអាមេរិក និងមេដឹកនាំអាស៊ាន បានជួបពិភាក្សាគ្នាក្នុងកិច្ចប្រជុំកំពូលអាស៊ាន អាមេរិកលើកទី ១០ នៅរសៀលថ្ងៃសៅរ៍ នៅរាជធានីភ្នំពេញ។ លោក Biden បានថ្លែងថា ការសហការជាមួយ «អាស៊ានដែលត្រូវបានពង្រឹងអំណាចនិងមានសាមគ្គីគ្នា» នៅតែស្នូលនៃយុទ្ធសាស្ត្រអាមេរិក នៅក្នុងតំបន់ឥណ្ឌូប៉ាស៊ីហ្វិក។ នេះបើយោងតាមសេចក្តីរាយការណ៍របស់ទីភ្នាក់ងារព័ត៌មាន The Associated Press៕
