កិច្ចប្រជុំកំពូលអាស៊ាននៅកម្ពុជាបានបញ្ចប់
កិច្ចប្រជុំកំពូលអាស៊ានលើកទី ៤០ និងទី ៤១ បានបញ្ចប់នៅថ្ងៃអាទិត្យនេះ ដោយកម្ពុជាបានផ្ទេរតួនាទីជាប្រធានអាស៊ានដល់ឥណ្ឌូណេស៊ី។ លោកនាយករដ្ឋមន្ត្រី ហ៊ុន សែន បានប្រគល់ញញួរតំណែងប្រធានអាស៊ានដល់លោកប្រធានាធិបតី Joko Widodo ក្នុងពិធីផ្ទេរតួនាទី ដោយមានការចូលរួមពីលោក Justin Trudeau នាយករដ្ឋមន្ត្រីកាណាដាផងដែរ។ ក្នុងសេចក្តីថ្លែងការណ៍កាលពីថ្ងៃសុក្រ អាស៊ានបានព្រមព្រៀងគ្នាទទួលយកប្រទេសទីម័រខាងកើតជាសមាជិកទី ១១ របស់អាស៊ាន។ នៅរយៈពេល ៧ ថ្ងៃខាងមុខ កិច្ចប្រជុំកំពូលនានានឹងធ្វើឡើងនៅតំបន់អាស៊ីអាគេ្នយ៍ រួមមានកិច្ចប្រជុំកំពូលនៃក្រុមប្រទេសមានសេដ្ឋកិច្ចជឿនលឿនទាំង ២០ ហៅថា G-20 ដែលធ្វើឡើងនៅកោះបាលី ឥណ្ឌូណេស៊ី និងវេទិកាកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC) នៅទីក្រុងបាងកក ប្រទេសថៃ៕
- ដោយ Reuters
ប្រធានាធិបតីសហរដ្ឋអាមេរិកលោក Joe Biden បានថ្លែងកាលពីថ្ងៃអាទិត្យថា បណ្តាញទាក់ទងគ្នារបស់សហរដ្ឋអាមេរិកជាមួយប្រទេសចិន អាចនៅបើកចំហ ដើម្បីទប់ស្កាត់មិនឲ្យជម្លោះ ក្នុងពេលកិច្ចប្រជុំកំពូលអាស៊ាននៅកម្ពុជាបានបញ្ចប់។ លោកបានថ្លែងដូច្នេះនៅមុនជំនួបទ្វេភាគីជាមួយប្រធានាធិបតីចិនលោក Xi Jinping នៅកោះបាលីនៃប្រទេសឥណ្ឌូណេស៊ី ក្នុងអំឡុងកិច្ចប្រជុំកំពូលនៃក្រុមប្រទេសមានសេដ្ឋកិច្ចជឿនលឿនទាំង ២០ ហៅថា G-20។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន Reuters៕
លោក Fumio Kishida នាយករដ្ឋមន្ត្រីជប៉ុន បានថ្លែងប្រាប់បណ្តាមេដឹកនាំនៅតំបន់អាស៊ីនៅថ្ងៃអាទិត្យថា ចិនកំពុងធ្វើសកម្មភាពកាន់តែច្រើននិងឥតឈប់ឈរដែលរំលោភលើអធិបតេយ្យភាពរបស់ប្រទេសជប៉ុន ហើយបញ្ឆេះភាពតានតឹងថែមទៀតនៅក្នុងតំបន់។ ថ្លែងក្នុងកិច្ចប្រជុំកំពូលអាស៊ីបូព៌ាលើកទី ១៧ លោក Kishida ថា ការធានាឲ្យបាននូវសន្តិភាពនិងស្ថិរភាពនៅតំបន់កោះតៃវ៉ាន់មានសារៈសំខាន់សម្រាប់សន្តិសុខក្នុងតំបន់ ដោយលោកក៏បាន«ក្តីបារម្ភធ្ងន់ធ្ងរ»លើស្ថានភាពសិទ្ធិមនុស្សរបស់ក្រុមជនជាតិអ៊ុយហ្គ័រ (Uyghur)។ នេះបើយោងតាមសេចក្តីថ្លែងការណ៍មួយដែលចេញផ្សាយដោយក្រសួងការបរទេសជប៉ុន ហើយត្រូវបានរាយការណ៍ដោយទីភ្នាក់ងារព័ត៌មាន Reuters៕
- ដោយ Reuters
ប្រធានាធិបតីឥណ្ឌូណេស៊ីប្តេជ្ញាថាមិនធ្វើឲ្យតំបន់អាស៊ីអាគ្នេយ៍ក្លាយជាសមរភូមិប្រយុទ្ធជួរមុខនៃសង្គ្រាមត្រជាក់ថ្មីមួយជាដាច់ខាត ខណៈភាពតានតឹងកំពុងកើនឡើងរវាងសហរដ្ឋអាមេរិកនិងចិន។ ខណៈឥណ្ឌូណេស៊ីក្លាយជាប្រធានអាស៊ាន លោក Joko Widodo បានថ្លែងថា អាស៊ានមិនអាចក្លាយជា «ភ្នាក់ងាររបស់មហាអំណាចណាមួយឡើយ»។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន Reuters។ លោកបញ្ជាក់ថា តំបន់អាស៊ីអាគេ្នយ៍ដែលមានពលរដ្ឋសរុបជាង ៧០០ លាននាក់ «ចាំបាច់ត្រូវតែជាតំបន់ដ៏ថ្លែថ្នូរមួយ» ហើយ «ប្រកាន់ខ្ជាប់នូវតម្លៃមនុស្សធម៌និងលទ្ធិប្រជាធិបតេយ្យ»។ គោលការណ៍ទាំងនេះកំពុងប្រឈមនឹងបញ្ហាក្តោបក្តាប់យោធានៅមីយ៉ាន់ម៉ា និងក្តីបារម្ភអំពីបញ្ហាសិទ្ធិមនុស្សនៅកម្ពុជា។ កាលពីថ្ងៃអាទិត្យ ក្នុងកិច្ចប្រជុំកំពូលអាស៊ីបូព៌ា លោកនាយករដ្ឋមន្ត្រី ហ៊ុន សែន ក៏បានថ្លែងថា ភាពតានតឹងសកលបច្ចុប្បន្នកំពុងក្លាយជាបន្ទុកដល់ប្រទេសជាច្រើនក្នុងតំបន់៕
