ការរង់ចាំរបស់ប្រធានក្រុមជម្រើសជាតិកីឡាបាល់ទាត់អាហ្សង់ទីន លោក Lionel Messi ដើម្បីបានកិត្តិនាមដ៏ត្រចះត្រចង់ក្នុងប្រវត្តិសាស្ត្រការប្រកួតបាល់ទាត់ពិភពលោក បានមកដល់ទីបញ្ចប់ហើយកាលពីយប់ថ្ងៃអាទិត្យម្សិលមិញ នៅក្នុងព្រឹត្តិការណ៍ការប្រកួតបាល់ទាត់វគ្គផ្តាច់ព្រ័ត្រក្នុងប្រទេសកាតា ក្រោយពីក្រុមកីឡាបាល់ទាត់អាហ្សង់ទីន បានយកឈ្នះលើក្រុមកីឡាបាល់ទាត់បារាំង ដោយការស៊ុតបាល់ប៉េណាំងទីចម្ងាយ១១ម៉ែត្រ ក្រោយការប្រកួតស្មើគ្នាក្នុងម៉ោងធម្មតានិងម៉ោងបន្ថែមរួចមក។ នេះបើយោងតាមការផ្សាយរបស់ទូរទស្សន៍ CNN និងទីភ្នាក់ងារព័ត៌មាននានា។
នេះជាការប្រកួតបាល់ទាត់វគ្គផ្តាច់ព្រ័ត្រដ៏គួរឱ្យចងចាំបំផុតមួយ ដោយក្រុមទាំងពីរមានប្រៀបរៀងៗខ្លួនម្តងម្នាក់ និងមានលក្ខណៈតឹងតែងខ្លាំង ក្នុងទីលានប្រកួតក្នុងរយៈពេល១២០នាទី មុនពេលដែលកីឡាករអាហ្សង់ទីនលោក Gonzalo Montiel ស៊ុតគ្រាប់បាល់ប៉េណាំងទីជ័យជម្នះចុងក្រោយចូលទៅខាងអ្នកចាំទីបារាំង ក្រោយការប្រកួតមានពិន្ទុស្មើគ្នា៣ទល់នឹង៣ ក្រោយម៉ោងបន្ថែម៣០នាទីទៀតនោះ។
នេះជាការលេងក្នុងការប្រកួតកីឡាបាល់ទាត់ពិភពលោកលើកទី៥ របស់ប្រធានក្រុមកីឡាបាត់ទាត់អាហ្សង់ទីន លោកLionel Messi ដោយនៅវគ្គផ្តាច់ព្រ័ត្រជាមួយប្រទេសបារាំងនេះ លោកស៊ុតបាល់បញ្ចូលទីបាន២គ្រាប់ ប៉ុន្តែកីឡាករខ្សែប្រយុទ្ធដ៏ឆ្នើមរបស់ប្រទេសបារាំងលោកKylian Mbappé បានស៊ុតបាល់ចូលខាងអាហ្សង់ទីន រហូតដល់ចំនួន៣គ្រាប់ ដែលនេះមានជាលើកដំបូងក្នុងវគ្គផ្តាច់ព្រ័ត្របាល់ទាត់ពិភាពលោកចាប់តាំងពីឆ្នាំ១៩៦៦មក។
ការស៊ុតបាល់ពិន័យប៉េណាំងទី១១ម៉ែត្របានជោគជ័យរបស់លោក Messi និងការស៊ុតមួយគ្រាប់ទៀតរបស់កីឡាករអាហ្សង់ទីនលោក Angel di Maria ក្នុងការប្រកួតវគ្គទី១មួយនោះ បានធ្វើឱ្យគ្រាប់បាល់របស់ក្រុមអាហ្សង់ទីនមានប្រៀបខ្លាំងនៅលើទីលានប្រកួត ប៉ុន្តែការស៊ុតបញ្ជូលទីបាន២គ្រាប់វិញនៃកីឡាករខែ្សប្រយុទ្ធរបស់បារាំងគឺលោកMbappé នៅជិតចុងម៉ោងនៃវគ្គបញ្ចប់ ដែលក្នុងនោះមួយគ្រាប់បានមកដោយការស៊ុតបាល់ប៉េណាំងទីពិន័យ១១ម៉ែត្រនោះ បានធ្វើឱ្យការប្រកួតឈានទៅដល់ការបន្ថែមម៉ោង៣០នាទីទៀត។
ការប្រកួតវគ្គផ្តាច់ព្រ័ត្រកាលពីម្សិលមិញ គឺជាការប្រកួតលើកទី២៦ ក្នុងការប្រកួតកីឡាបាល់ទាត់ពិភពលោករបស់ប្រធានក្រុមជម្រើសជាតិអាហ្សង់ទីន លោកLionel Messi ដែលមានអាយុ៣៥ ឆ្នាំ ដែលនេះជាលទ្ធផលនៃពានរង្វាន់បាល់ទាត់ពិភពលោក ដែលរូបលោកនិងប្រទេសរបស់លោកបានទន្ទឹងរង់ចាំអស់អស់ពេលជាយូរមកហើយ។ លទ្ធផលនៃជ័យជម្នះនេះ បានធ្វើឱ្យប្រធានក្រុមជម្រើសជាតិអាហ្សង់ទីនរូបនេះ មានកិត្តិនាមល្បីល្បាញដូចអតីតតារាបាល់ទាត់អាហ្សង់ទីនកាលពីអតីតតកាលគឺលោក Diego Maradona ផងដែរ ក្រោយពីប្រទេសអាហ្សង់ទីនបានឈ្នះពានរង្វាន់បាល់ទាត់ពិភពលោកលើកទី២ក្នុងឆ្នាំ១៩៨៦ បន្ទាប់ពីទទួលបានពានរង្វាន់នេះជាលើកទី១ ក្នុងឆ្នាំ១៩៧៨នោះ៕
