ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ជីវិត​រស់​នៅ​ប្រចាំ​ថ្ងៃ​ក្នុង​ទីក្រុង Los Angeles មាន​ភាព​ប្រក្រតី​ ទោះ​ជា​មាន​ការ​គំរាម​កំហែង​ពី​ប្រទេស​កូរ៉េ​ខាងជើង


នេះ​ជា​ផែ Santa Monica ដែល​មាន​ចម្ងាយ​២៥គ.ម.​ពី​ក្រុង Los Angeles។
នេះ​ជា​ផែ Santa Monica ដែល​មាន​ចម្ងាយ​២៥គ.ម.​ពី​ក្រុង Los Angeles។

ជម្លោះ​ទ្វេ​ភាគី​រវាង​កូរ៉េ​ខាង​ជើង និង​សហរដ្ឋ​អាមេរិក​កំពុង​បន្ត ហើយ​ភាព​តាន​តឹង​ទំនង​​ជា​ចេះ​តែ​កើន​ឡើង។ ប្រទេស​កូរ៉េ​ខាង​ជើង​​​​អះអាង​ថា​ខ្លួន​មាន​​កាំជ្រួច​ផ្លោង​របស់​ខ្លួន​អាច​ពាំ​នាំ​ក្បាល​គ្រាប់​នុយក្លេអ៊ែរ​​ ទៅ​ដល់​ភាគ​ខាង​លិច​​សហរដ្ឋ​អាមេរិក។ VOA បាន​សម្ភាសន៍​ពលរដ្ឋ និង​អ្នក​ទេសចរណ៍​នៅ​ក្នុង​ទី​ក្រុង Los Angeles ដើម្បី​ចង់​ដឹង​ថា​តើ​ពួក​គេ​មាន​អារម្មណ៍​ថា ​ការ​គំរាម​កំហែង​របស់​កូរ៉េ​ខាង​ជើង​ជា​ការ​ពិត​ឬយ៉ាង​ណា។

វិស្សមកាល​រដូវក្ដៅ​នៅ​តំបន់​ឆ្នេរ​សមុទ្រ​ដ៏​ល្បី​ល្បាញ Sata Monica ជិត​ចប់​ហើយ។ ​សម្រាប់​ពល​រដ្ឋ​រស់​នៅ​ក្នុង​ទី​ក្រុង Los Angeles ក៏​ដូចជាអ្នក​ទេសចរណ៍ មិន​បាន​គិត​ដល់​សក្ដានុពល​នៃ​ការ​គំរាម​កំហែង​ដោយ​ការ​វាយ​ប្រហារ​ដោយ​អាវុធ​នុយក្លេអ៊ែរ​នៅ​ផ្នែក​ម្ខាង​ទៀត​នៃ​មហាសមុទ្រ​ប៉ាស៊ីហ្វិក​នោះ​ទេ។​ ប៉ុន្តែនាង Lital Gilad បាន​គិត​ដល់​រឿង​នេះ។

នាង​ Lital Gilad បាន​និយាយ​ថា៖ «ខ្ញុំ​បារម្ភ​ពី​រឿង​នេះ។ ខ្ញុំ​គិត​ថា​វា​ជា​ការ​គំរាម​កំហែង​ពិត​ប្រាកដ​មួយ រឿង​នេះ​ស្ថិត​ក្នុង​ចិត្ត​ខ្ញុំ។ ខ្ញុំ​មាន​កូន ហើយ​ច្បាស់​ណាស់​ថា​ខ្ញុំ​មិន​ចង់​ឲ្យ​មាន​រឿង​អាក្រក់​កើត​ឡើង​ឡើយ»។

លោក Scott Gibbons ដែល​ជា​អ្នក​ទេសចរណ៍​មក​ពី​ប្រទេស​អូស្ត្រាលី​បាន​ឲ្យ​ដឹង​ថា៖ «វា​ហាក់​ដូច​ជា​ភាគី​ទាំង​ពីរ​កំពុង​តែ​ឈ្លោះ​ប្រកែក​គ្នា ហើយ​ខ្ញុំ​គិត​ថា​ស្ថាន​ភាព​ដែល​គួរ​ឲ្យ​ខ្លាច​បំផុត នោះ​គឺអ្នក​ដែល​កំពុង​ប្រឈម​មុខ​ដាក់​គ្នា​នេះ គ្មាន​នរណា​ម្នាក់​ជាមនុស្ស​ចិត្ត​ត្រជាក់​នោះ​ទេ»។

លោកបាន​និយាយ​ថា សក្ដានុពល​នៃ​ការ​គំរាម​វាយ​ប្រហារ​នេះ មិន​ធ្វើ​ឲ្យ​ប៉ះ​ពាល់​ដល់​វិស្សមកាល​របស់​លោក​ទេ។​

«គ្រប់​រឿង​អាច​កើត​ឡើង​គ្រប់​ពេល ហើយ​បើ​សិន​ជា​អ្នក​បារម្ភ​ពី​វា​ខ្លាំង​ពេក នោះ​ជីវិត​របស់​អ្នក​នឹង​មិន​ទទួល​បាន​ភាព​រីក​រាយ​ទេ»។

អ្នក​ទេសចរណ៍​ម្នាក់ទៀត នាង Felicia Walker បញ្ចេញ​មតិ​ស្រដៀង​គ្នា​នេះ​ដែរ នៅ​ពេល​សួរ​ថា តើ​នាង​ព្រួយ​បារម្ភ​ពី​ការ​បាញ់​គ្រាប់​មីស៊ីល​របស់​កូរ៉េ​ខាង​ជើង​ដែរ​ឬទេ។​

នាង Felicia Walker បាន​ឆ្លើយ​ថា៖ «ខ្ញុំ​បារម្ភ​ខ្លះ​ដែរ។ ប៉ុន្តែ​ខ្ញុំ​មានការ​ជឿ​ជាក់​ខ្លាំង ដូច្នេះ​ខ្ញុំ​ជឿ​ថា​គ្រប់​យ៉ាង​នឹង​ស្ថិត​ក្នុង​ភាព​ប្រក្រតី»។​

ចម្ងាយ​ប្រមាណ​ ២០ គីឡូម៉ែត្រ ពី​តំបន់​ទីប្រជុំ​ជន​ក្នុង​ទី​ក្រុង Los Angeles គឺជា​តំបន់​មួយ​ដែល​មាន​ឈ្មោះ​ថា Koreatown។ តំបន់​នេះ​នៅ​ក្នុង​សង្កាត់​មួយ​ដែល​មាន​ចំនួន​ប្រជាជន​កូរ៉េ​ច្រើន​ជាង​គេ​បំផុត​នៅ​ក្នុង​សហរដ្ឋ​អាមេរិក។

នាង​ Young Ja Bae និយាយ​ថា ​នាង​បារម្ភ​ពី​រឿង​នេះ។

នាង​និយាយ​ថា៖ «យើង​គួរ​តែ​វាយ​ប្រហារមុន។ យើង​ត្រូវ​តែ​ចាត់​វិធាន​ការ​អ្វី​មួយ។ ពួក​គេ​ [កូរ៉េ​ខាង​ជើង] មិន​ដឹង​ថា​ពួក​គេ​កំពុង​លេង​ជា​មួយ​អ្នក​ណា​នោះ​ទេ។ យើង​នឹងមិន​បណ្ដោយ​ឲ្យ​វា​កើត​ឡើង​ឡើយ»។

លោក Daniel Son បារម្ភ​ខ្លាំង​ពី​សាច់​ញាតិ​របស់​លោក​ដែល​រស់​នៅ​ក្នុង​ប្រទេស​កូរ៉េ​ខាង​ត្បូង។

លោក Daneil Son និយាយ​ថា៖ «ខ្ញុំ​គិត​ថា​ពួក​គេ​ស្ថិត​ក្នុងគ្រោះ​ថ្នាក់​ជាង​យើង ពី​ព្រោះ​ប្រទេស​កូរ៉េ​ខាង​ត្បូងនៅ​ជិត​ប្រទេសកូរ៉េ​ខាង​ជើង​ណាស់»។

មិត្តភក្តិ​របស់​លោក Son ដែល​ជា​ជន​ជាតិ​ចិន​គឺ​លោក David Lee និយាយ​ថា​លោក​គ្មាន​ការ​ព្រួយ​បារម្ភ​អ្វី​ឡើយ។

លោក Lee ដែល​ជា​អ្នក​រស់​នៅ​ទីក្រុង Los Angeles បាន​និយាយ​ថា៖ «ទោះបី​ជា​ប្រទេស​កូរ៉េ​ខាងជើង​ខ្លាំង​ខាង​ផ្នែក​យោធា ខ្ញុំ​មាន​អាម្មណ៍​ថា ពួក​គេ​មិន​ល្ងង់​ដល់​ថ្នាក់ ​វាយ​ប្រហារ​សហរដ្ឋ​អាមេរិក​នោះទេ ពីព្រោះបើ​សិនជា​ពួក​គេ​វាយ​ប្រហារ​ស​ហរដ្ឋ​អាមេរិក ពិភព​លោក​ទាំង​មូល​នឹង​ស្ថិត​ក្នុង​ភាព​វឹកវរ»។

សួរ​ថា​តើ​លោក​ប្រធានាធិបតី​ Donald Trupm អាច​គ្រប់​គ្រង​ស្ថានការណ៍​បាន​ដែរ​ឬ​ទេ នាង Young Ja Bae ឆ្លើយ​ថា៖ «ខ្ញុំ​ជឿ​ថា​លោក​គ្រប់​គ្រង​បាន»។

ប៉ុន្តែ​លោក David Lee ឆ្លើយ​ថា៖ «លោក Trump ​ប្រាកដ​ជា​មិន​មែន​ជា​បេក្ខជន​ល្អ​បំផុត​សម្រាប់ការ​ដោះ​ស្រាយ​ជម្លោះ​រវាង​ប្រទេស​ និង​ប្រទេស​នោះ​ទេ»។

សម្រាប់​ពេល​នេះ នៅ​ក្នុង​ទី​ក្រុង​ Los Angeles ជីវិត​រស់​នៅ​ប្រចាំថ្ងៃ​របស់​ប្រជាជន​ដំណើរ​ការ​ទៅ​ធម្មតា ស្រប​ពេល​ដែល​ទាំង​អ្នក​រស់​នៅ​ទី​នោះ និង​អ្នក​ទេសចរណ៍​តាមដាន​ព័ត៌មាន​ច្រើន​ជាង​មុន៕

ប្រែ​សម្រួល​ដោយ៖ សឿន វឌ្ឍនា

XS
SM
MD
LG