រដ្ឋមន្រ្តីការបរទេសសហរដ្ឋអាមេរិកលោក Antony Blinken បានស្ថិតនៅក្នុងទីក្រុងប៊ែរឡាំង ប្រទេសអាល្លឺម៉ង់ដើម្បីចរចាជាមួយមេដឹកនាំអាល្លឺម៉ង់នៅថ្ងៃពុធ ម៉ោងក្នុងស្រុក ហើយនឹងចូលរួមសន្និសីទស្តីពីអនាគតនយោបាយរបស់ប្រទេសលីប៊ី។
ប្រទេសអាល្លឺម៉ង់ និងអង្គការសហប្រជាជាតិកំពុងរៀបចំសន្និសីទក្រុងប៊ែរឡាំងដើម្បីបង្កើតកិច្ចខិតខំប្រឹងប្រែងឲ្យឈប់ប្រយុទ្ធគ្នានៅក្នុងប្រទេសលីប៊ី និងគាំទ្ររដ្ឋាភិបាលមានស្ថិរភាព។
បន្ទាប់ពីជំនួបនៅពេលព្រឹកជាមួយលោក Heiko Maas រដ្ឋមន្ត្រីការបរទេសអាល្លឺម៉ង់ លោក Blinken បាននិយាយថា៖ «យើងមានឱកាសដែលមិនធ្លាប់មានក្នុងប៉ុន្មានឆ្នាំថ្មីៗនេះដើម្បីជួយប្រទេសលីប៊ីឲ្យក្លាយជាប្រទេសមានសុវត្ថិភាព សន្តិសុខ និងអធិបតេយ្យភាពពិតប្រាកដ»។
ថ្លែងទៅកាន់អ្នកយកព័ត៌មានជាមួយលោក Maas លោក Blinken បានមានប្រសាសន៍ថា មានការមូលមតិគ្នាស្តីពីវិធានការល្អបំផុតដើម្បីជួយប្រទេសលីប៊ី ជាពិសេសធ្វើឲ្យប្រាកដថា មានការអនុវត្តបទឈប់បាញ់ និងការចាកចេញរបស់កងទ័ពបរទេសពីប្រទេសនេះ។
លោក Richard Norland បេសកជនពិសេសរបស់សហរដ្ឋអាមេរិកសម្រាប់ប្រទេសលីប៊ី បានប្រាប់ក្រុមអ្នកយកព័ត៌មានកាលពីថ្ងៃចន្ទថា សន្និសីទនេះនឹងផ្តល់សន្ទុះដល់វិធានការចាំបាច់សម្រាប់ការបោះឆ្នោតនៅក្នុងខែធ្នូ រួមមានការបង្កើតមូលដ្ឋានរដ្ឋធម្មនុញ្ញនិងច្បាប់សម្រាប់ការបោះឆ្នោតផងដែរ៕
