សមាជិកព្រឹទ្ធសភាអាមេរិកខាងគណបក្សសាធារណរដ្ឋ នៅថ្ងៃអង្គារ បានរាំងខ្ទប់សេចក្តីព្រាងច្បាប់សិទ្ធិបោះឆ្នោតដ៏សំខាន់មួយ។
សមាជិកព្រឹទ្ធសភាកំពូលខាងគណបក្សប្រជាធិបតេយ្យគឺលោក Chuck Schumer មេដឹកនាំសំឡេងភាគច្រើន បានរៀបចំគម្រោងបោះឆ្នោតស្តីពីច្បាប់សម្រាប់ពលរដ្ឋ ឬ For the People Act ប៉ុន្តែការអនុម័តតម្រូវឲ្យមានសំឡេងគាំទ្រ៦០សំឡេងដើម្បីយកសេចក្តីព្រាងច្បាប់នេះមកពិភាក្សា ហើយដោយសារគណបក្សសាធារណរដ្ឋ ដែលមានសំឡេងពាក់កណ្តាលនៃព្រឹទ្ធសភាដែលមានសមាជិក១០០រូប បានប្រឆាំងជំទាស់នោះ ដូច្នេះសេចក្តីព្រាងច្បាប់នេះត្រូវជាប់គាំង។
លោក Lindsey Graham សមាជិកព្រឹទ្ធសភាគណបក្សសាធារណរដ្ឋមកពីរដ្ឋ South Carolina និងជាបុគ្គលមានឥទ្ធិពលមួយរូប បានហៅសេចក្តីព្រាងច្បាប់នោះថា «ជាគំនិតឆ្កួតៗ»។ នេះបើតាមសេចក្តីថ្លែងការណ៍របស់លោក ដែលត្រូវបានផ្សព្វផ្សាយ បន្ទាប់ពីលោកបោះឆ្នោតប្រឆាំងនឹងច្បាប់នេះ។
សមាជិកគណបក្សប្រជាធិបតេយ្យមានគម្រោងនឹងធ្វើការកែប្រែសេចក្តីព្រាងច្បាប់នេះ ដែលដឹកនាំដោយលោក Joe Manchin សមាជិកព្រឹទ្ធសភាគណបក្សប្រជាធិបតេយ្យ ដែលមានទស្សនៈកណ្តាលនិយម មកពីរដ្ឋ West Virginia។ លោកបានប្រកាសប្រឆាំងច្បាប់នេះ ដែលត្រូវបានបោះឆ្នោតគាំទ្រដោយរដ្ឋសភា។ ការផ្លាស់ប្តូរដែលលោកបានស្នើឡើងរួមបញ្ចូលការបន្ថែមតម្រូវការអត្តសញ្ញាណបណ្ណអ្នកបោះឆ្នោតជាតិ ហើយនឹងលុបចោលមាត្រា ដែលចែងអំពីការធ្វើវិភាគទានសាធារណៈសម្រាប់យុទ្ធនាការបោះឆ្នោត។
ប៉ុន្តែការស្នើសុំឲ្យមានការផ្លាស់ប្តូរនេះមិនទទួលបានការគាំទ្រពីគណបក្សសាធារណរដ្ឋទេ។
ការជំរុញរបស់គណបក្សប្រជាធិបតេយ្យឲ្យមានកំណែទម្រង់ការបោះឆ្នោតនេះកើតមានឡើងនៅពេលសភាក្នុងរដ្ឋគ្រប់គ្រងដោយគណបក្សសាធារណរដ្ឋជាច្រើនបានអនុម័តវិធានការតឹងរ៉ឹងថ្មី ក្រោយការបោះឆ្នោតឆ្នាំ២០២០ដែលលោកប្រធានាធិបតី Donald Trump បានអះអាងដោយគ្មានភស្តុតាងម្តងហើយម្តងទៀតអំពីការលួចបន្លំក្នុងការបោះឆ្នោត៕
