គណៈកម្មការជំនាញទី១០របស់រដ្ឋសភាដែលមានឈ្មោះថា គណៈកម្មការអង្កេត បោសសម្អាត និងប្រឆាំងអំពើពុករលួយ បានចាប់ផ្តើមកោះហៅអង្គការក្រៅរដ្ឋាភិបាលមួយដែលឃ្លាំមើលអំពើពុករលួយមករាយការណ៍អំពីស្ថានភាពអំពើពុករលួយនៅកម្ពុជា មុនពេលដែលគណៈកម្មការនេះ កោះហៅអង្គភាពប្រឆាំងនឹងអំពើពុករលួយមកសាកសួរ។
លោក ហូរ វ៉ាន់ ប្រធានគណៈកម្មការអង្កេត បោសសម្អាត និងប្រឆាំងអំពើពុករលួយមានប្រសាសន៍ប្រាប់ក្រុមអ្នកកាសែតបន្ទាប់ពីកិច្ចប្រជុំបិទទ្វារនៅថ្ងៃសុក្រនេះថា តាមរបាយការណ៍របស់អង្គការតម្លាភាពកម្ពុជាបានរកឃើញថា ស្ថាប័នតុលាការជាប់ពាក់ព័ន្ធនឹងអំពើពុករលួយខ្លាំងជាងគេដែលទាមទារឱ្យមានការអនុវត្តច្បាប់ប្រឆាំងអំពើពុករលួយ ទើបអាចលុបបំបាត់អំពើពុករលួយនៅកម្ពុជាបាន។
លោកមានប្រសាសន៍ថា ដើម្បីប្រយុទ្ធប្រឆាំងអំពើពុករលួយមានប្រសិទ្ធភាពត្រូវតែផ្តោតទៅលើឆន្ទៈដ៏មោះមុតគ្រប់អង្គភាព គ្រប់ស្ថាប័នដើម្បីចាប់ដៃគ្នាកាត់បន្ថយអំពើពុករលួយនេះឱ្យបាននៅក្នុងប្រទេសកម្ពុជារបស់យើង។
លោកនិយាយថា៖ «បង្កើនការត្រួតពិនិត្យការអនុវត្តច្បាប់ហើយបន្តទៅទៀតគឺយើងត្រូវវិភាគលើពាក្យបណ្តឹងដែលយើងបានទទួលហើយនឹងការពិនិត្យមើលអង្គភាពប្រឆាំងនឹងអំពើពុករលួយអនុវត្តច្បាប់ហ្នឹងកន្លងមកមានការជោគជ័យបានប៉ុណ្ណាហើយនៅខ្វះខាតប៉ុណ្ណាយើងនឹងជួបគ្នា»។
យោងតាមរបាយការណ៍របស់អង្គការតម្លាភាពកម្ពុជាឲ្យដឹងថា អំពើពុករលួយលក្ខណៈទ្រង់ទ្រាយតូចកើតមានជាទូទៅក្នុងវិស័យឯកជន និងវិស័យសាធារណៈ ឬក្នុងស្ថាប័នរដ្ឋ ដែលបង្កឲ្យមានអយុត្តិធម៌ និងវិសមភាពក្នុងការយកចិត្តទុកដាក់។
ក្រៅពីការវាយតម្លៃលើប្រព័ន្ធតុលាការ របាយការណ៍របស់អង្គការតម្លាភាពកម្ពុជាក៏បានធ្វើការសិក្សាលើស្ថាប័នប្រឆាំងអំពើពុករលួយ ស្ថាប័នព័ត៌មាន សង្គមស៊ីវិល និងវិស័យឯកជនផងដែរ។
របាយការណ៍នេះបានបន្ថែមថា អង្គភាពប្រឆាំងអំពើពុករលួយរបស់រដ្ឋាភិបាលមានភាពសកម្មនៅក្នុងការអប់រំសាធារណជនអំពីអំពើពុករលួយនិងការប្រយុទ្ធប្រឆាំងនឹងអំពើពុករលួយ។ ក្រៅពីនោះការស៊ើបអង្កេតលើអំពើពុករលួយនៅមានភាពស្រអាប់។
លោក ព្រាប កុល ប្រធានអង្គការតម្លាភាពកម្ពុជាមានប្រសាសន៍ថា ស្ថានភាពអំពើពុករលួយបច្ចុប្បន្ននេះឃើញថា មានយុទ្ធនាការប្រយុទ្ធប្រឆាំងយ៉ាងស្វិតស្វាញ មានចលនាសង្គមក្រោកឈរឡើងប្រឆាំងនឹងអំពើពុករលួយគ្រប់មជ្ឈដ្ឋានទាំងអស់ ក៏ប៉ុន្តែនៅមានឧបសគ្គមួយចំនួនទៀតដែលត្រូវកែលម្អទាក់ទងទៅនឹងយុទ្ធនាការប្រយុទ្ធប្រឆាំងនឹងអំពើពុករលួយ។
លោកបានបញ្ជាក់ថា «ហើយអ្វីដែលយើងសង្កេតឃើញនោះគឺថា សង្គមមួយនៅពេលដែលប្រជាពលរដ្ឋគាត់ចាប់ផ្តើមប្រឆាំងនឹងអំពើពុករលួយ គឺសម្ពាធឬក៏ការដាក់ទម្ងន់ទៅរដ្ឋាភិបាលកាន់តែកើនឡើង។ ពេលខ្លះយើងអាចថា អំពើពុករលួយបានថយថុះ ក៏ប៉ុន្តែនៅពេលដែលប្រជាពលរដ្ឋគាត់ស្គាល់អំពើពុករលួយច្រើនគាត់មើលឃើញកាន់តែច្រើន គាត់យកចិត្តទុកដាក់កាន់តែច្រើន។ ដូច្នេះយើងមិនអាចវាស់ឱ្យត្រូវពីកម្រិតនៃអំពើពុករលួយទេ។ អ្វីដែលយើងធ្វើបាន គឺយើងមើលទៅតាមការមើលឃើញរបស់ប្រជាពលរដ្ឋនិងសង្គមទាំងមូល»។
គណៈកម្មការអង្កេត បោសសម្អាត និង ប្រឆាំងអំពើពុករលួយនៅពេលខាងមុខនេះ គ្រោងកោះហៅអង្គភាពប្រឆាំងអំពើពុករលួយមកសាកសួរម្តងវិញ មុននឹងដាក់សេចក្តីស្នើសុំឱ្យទៅឆ្លើយបំភ្លឺក្នុងសភា។
លោកនាយករដ្ឋមន្ត្រីហ៊ុន សែន ធ្លាប់បានទទួលស្គាល់ថា មានអំពើពុករលួយនៅក្នុងប្រទេសកម្ពុជា ក៏ប៉ុន្តែលោកស្តីបន្ទោសថា អំពើពុករលួយមួយចំនួនកើតចេញពីឈ្មួញអ្នករកស៊ី ឬបុគ្គលមួយចំនួន ដែលផ្តល់ឲ្យមន្ត្រីសាធារណៈជាមុន៕
