ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ព័ត៌មានចុងក្រោយ៖ ពុំ​មាន​ករណី​ឆ្លង​វីរុស​ថ្មី​ជាង​២​សប្តាហ៍ ​ប៉ុន្តែ​ WHO ​ជំរុញ​​ឲ្យ​កម្ពុជា​បន្ត​​ប្រុង​ប្រយ័ត្ន​ខ្ពស់

វីរុសកូរ៉ូណា ឬកូវីដ១៩ ដែលជាជំងឺរលាកផ្លូវដង្ហើមដ៏ប្រល័យមួយ កំពុងឆ្លងរាលដាលនៅបណ្តាប្រទេសជាង ១២០ ទូទាំងពិភពលោក។ អង្គការសុខភាពពិភពលោក (WHO) បានប្រកាសជាផ្លូវការថា វីរុសនេះគឺជារោគរាតត្បាតសកល ដែលតម្រូវឲ្យមានការយកចិត្តទុកដាក់ខ្លាំងពីរដ្ឋាភិបាលនៃបណ្តាប្រទេសនីមួយៗ ក្នុងការតាមដាន ស្វែងរក ធ្វើតេស្ត ព្យាបាល និងប្រមូលផ្តុំប្រជាពលរដ្ឋរបស់ខ្លួន ដើម្បីទប់ស្កាត់ការឆ្លងរាលដាលកាន់តែខ្លាំងឡើងនៃវីរុសកូរ៉ូណានេះ។ វីរុសកូរ៉ូណា ឬកូវីដ១៩ បានផ្ទុះឡើងនៅទីក្រុងវូហាន ខេត្តហ៊ូបេ ប្រទេសចិន កាលពីចុងឆ្នាំ ២០១៩។ មកទល់ពេលនេះ វីរុសនេះបានសម្លាប់មនុស្សយ៉ាងហោចណាស់ជិត ៧ពាន់នាក់ ហើយបណ្តាលឲ្យមនុស្សជាង ១៦ម៉ឺននាក់ឆ្លងវីរុសនេះ នៅទូទាំងពិភពលោក។


ស្ត្រីម្នាក់ប្រើក្រមាធ្វើជាម៉ាស់ការពារ ខណៈបុគ្គលិកប្រចាំអង្គការមូលនិធិកុមារកម្ពុជា (CCF) កំពុងបាញ់ថ្នាំសម្លាប់មេរោគដើម្បីជួយទប់ស្កាត់ការឆ្លងរាលដាលនៃវីរុសកូរ៉ូណាប្រភេទថ្មី នៅតំបន់ស្ទឹងមានជ័យ ជាយរាជធានីភ្នំពេញ ថ្ងៃទី២៤ ខែមីនា ឆ្នាំ២០២០។
01:30 17.3.2020

កម្ពុជាអំពាវនាវស្វែងរកគ្រូពេទ្យស្ម័គ្រចិត្ត ខណៈករណីឆ្លងវីរុសកូរ៉ូណាកំពុងកើនឡើង

នៅរាត្រីថ្ងៃច័ន្ទនេះ ក្រសួងសុខាភិបាលកម្ពុជា​បាន​ប្រកាស​ស្វែងរក​គ្រូពេទ្យ និងអ្នក​ជំនាញ​វេជ្ជវិទ្យា​ស្ម័គ្រ​ចិត្ត​ ដើម្បី​ចូលរួម​បំពេញ​កិច្ចការ​ចាំបាច់​នានា​ក្នុងការ​ទប់ស្កាត់​ការ​ឆ្លង​រាលដាល​នៃ​វីរុស​កូរ៉ូណា​ ឬកូវីដ​១៩ នៅក្នុងប្រទេស។​ នេះ​បើ​យោង​តាម​សេចក្តី​ប្រកាសព័ត៌មាន​ថ្មី​មួយ​របស់​ក្រសួង។

ការ​អំពាវនាវ​នេះ​ធ្វើឡើង បន្ទាប់​ពី​រដ្ឋាភិបាល​កម្ពុជា​បាន​សម្រេច​ប្រកាស​បិទ​សាលារៀន និងគ្រឹះស្ថាន​អប់រំ​ទូទាំង​ប្រទេស ខណៈ​ករណី​ឆ្លង​វីរុស​ក្នុងប្រទេស​បាន​កើន​ដល់ ១២ករណី ក្នុងនោះ​រួមមាន​ជនជាតិ​ខ្មែរ​យ៉ាង​តិច៣នាក់។

នៅក្នុង​សេចក្តី​ប្រកាស​ព័ត៌មាន​ចុងក្រោយ​នោះ ក្រសួង​សុខាភិបាល​បាន​ឲ្យដឹង​ថា ដោយសារ​មាន​ការ​ស្នើសុំ​ធ្វើតេស្ត​រក​វីរុស​កូរ៉ូណា​កាន់តែ​កើន​ឡើង ក្រសួង​បាន​ពង្រីក​គម្រោង​ព្យាបាល និង​ធ្វើ​តេស្ត​របស់​ខ្លួន​មួយ​កន្លែង​ទៀត នៅ​អតីត​មណ្ឌល​សុខភាព​ចាក់​អង្រែ ក្នុង​សង្កាត់​ចាក់អង្រែក្រោម ខណ្ឌ​មានជ័យ រាជធានីភ្នំពេញ ដែល​មាន​ចំណុះ​គ្រែ​ចំនួន ១០០ បន្ថែម​ទៀត។

អានព័ត៌មានលម្អិត

14:56 17.3.2020

ចំនួន​ករណីឆ្លង៖​ សរុប​ ២៤ ករណី​ត្រឹម​ព្រឹក​ថ្ងៃទី១៧ ខែ​មីនា​ ឆ្នាំ​២០២០

កម្ពុជា​បាន​រក​ឃើញ​ពលរដ្ឋ​កម្ពុជា​ចំនួន​ ១២​នាក់​ទៀត ​ឆ្លង​វីរុសកូវីដ​១៩​ (COVID-19) ដែល​ចំនួន​សរុប​នៃ​ការ​ឆ្លង​នេះ​បានឡើង​ទៅ​ដល់ ២៤​ករណី​នៅទូទាំង​ប្រទេស​ កើន​ទ្វេ​ដង​ក្នុង​រយៈពេល​មួយ​ថ្ងៃ​។​ ​នេះ​បើ​តាម​សេចក្តីប្រកាស​ព័ត៌មានក្រសួង​សុខាភិបាល​នៅ​ថ្ងៃ​អង្គារ​នេះ​។

មក​ទល់ព្រឹក​នេះ​ គេរក​ឃើញ​ចំនួន១៣ករណី ដែល​កើត​លើ​អ្នកដែល​បានត្រឡប់​មក​ពី​ការ​ចូលរួម​ពិធី​សាសនា​មួយ​នៅ​ប្រទេស​ម៉ាឡេស៊ី​ នៅ​ក្បែរ​ទីក្រុង​កូឡា​ឡាំ​ពួ​រ។​ ពិធី​សាសនានោះ​ប្រព្រឹត្ត​ទៅ​នៅ​ចន្លោះពី​ថ្ងៃ​ទី​២៨ ខែ​កុម្ភៈ​ ដល់​ខែទី០១​ ខែ​មីនា​ ឆ្នាំ​២០២០​។ នៅ​តំបន់​អាស៊ី​គេ​រកឃើញ​ អ្នកឆ្លង​កូវីដ១៩​ ​រាប់រយ​ករណី​ដែលបាន​ពាក់ព័ន្ធ​នឹង​ការ​ជួប​ជុំគ្នា​ក្នុង​ពិធីសាសនា​ ដែលមានមនុស្ស​ប្រមាណ​ ១៦ ០០០​ នាក់​មក​ពី​បណ្តាប្រទេស​ផ្សេងចូលរួម នេះ​បើតាម​សារ​ព័ត៌មាន​ក្នុង​ស្រុក​របស់​ប្រទេស​ម៉ាឡេស៊ី​។​

ក្រសួង​កំពុង​តាមដានរក​អ្នក​ដែល​បាន​ទៅ​ចូលរួម​ពិធី​សាសនា​នោះ​ ហើយ​ដែល​បាន​ត្រឡប់មក​កម្ពុជា​វិញ​ នៅដើម​ខែ​មីនា និង​កំពុង​បន្ត​ស្រាវ​ជ្រាវ​រកអ្នក​ប៉ះពាល់​សកម្មជាមួយ​ពួកគេ​។

អានព័ត៌មានលម្អិត

15:17 17.3.2020

ពង្រីក​ទីតាំង​ព្យាបាល​អ្នក​ជំងឺ​កូវីដ១៩ នៅ​ភ្នំពេញ

ក្រសួង​សុខាភិបាល​ប្រកាស​ថ្ងៃ​អង្គារ ​ទី១៧ ខែ​មករា​នេះ​ ប្រកាសថា ខ្លួន​នឹង​ប្រើប្រាស់​សណ្ឋាគារ​ Great DUKE ​(អតីតសណ្ឋាគារអាំងទែកុងទី​ណង់តាល់) ​ជាមន្ទីរពេទ្យ​សម្រាប់ពិនិត្យ​ថែទាំ​ និងព្យាបាល​អ្នកជំងឺកូវីដ​១៩។ កាល​ពី​យប់​ម្សិល​មិញ​ ក្រសួង​ក៏បាន​ប្រកាសដែរថា​ បាន​រៀបចំទីតាំង​សម្រាប់​ព្យាបាលអ្នកជំងឺ​កូវីដ​នៅ​អតីត​មណ្ឌលសុខភាព​ចាក់អង្រែ​ ជាអគារ​មួយ​ដែលអាច​ដាក់បាន​១០០​គ្រែ​។

15:19 17.3.2020

ក្រសួង​ប្រកាស​សុំ​កម្លាំង​បន្ថែម

​កន្លង​មក​ ក្រសួង​សុខាភិបាល​ធ្លាប់​បាន​បញ្ជាក់ថា ​ខ្លួន​បាន​ត្រៀម​មន្ត្រីជាង​២០០០​នាក់សម្រាប់​ទប់ស្កាត់​ការ​រីករាល​ដាល​នៃ​ជំងឺកូវីដ១៩។ ទោះ​ជាយ៉ាង​ណា​ ក្រសួង​សុខាភិបាលព្រឹក​នេះ ​បាន​អំពាវ​នាវ​សុំជំនួយ​ពីកង​កម្លាំង​សុខាភិបាលនៃ​កង​យោធពល​ខេមរភូមិន្ទ​របស់​ក្រសួង​ការពារ​ជាតិ​ និងកងកម្លាំង​សុខាភិបាល​នៃនគរបាល​ជាតិរបស់​ក្រសួង​មហាផ្ទៃ​។ នេះ​ជា​ការ​ប្រកាស​សុំកម្លាំង​បន្ថែម ​ធ្វើ​ឡើង​មួយ​ថ្ងៃ​ក្រោយ​ពី​ក្រសួង​បាន​ប្រកាស​ឲ្យ​មាន​ការចូលរួម​ពី​ក្រុម​គ្រូពេទ្យ​ស្ម័គ្រ​ចិត្តមួយក្រុម ​ដែលក្រុម​នោះដឹក​នាំ​ដោយ​កូនប្រុស​ច្បង​លោក​នាយករដ្ឋមន្ត្រី​ ហ៊ុន​ សែ​ន​ គឺ​លោក​ ហ៊ុន ម៉ាណែត​ និង​កូន​ប្រសារ​ស្រី​របស់​លោក​ គឺលោក​ស្រី ពេជ​ ចន្ទ​មុន្នី​។​ ក្រុម​គ្រូពេទ្យ​ស្ម័គ្រចិត្តនោះ តម្រូវ​ឲ្យទាក់ទង​ក្រសួង​ដើម្បី​ចុះ​ឈ្មោះ​ និង​ទទួល​បាន​ការ​បណ្តុះ​បណ្តាល​បន្ថែម មុននឹង​ចូលខ្លួនជួយការ​ងារវិស័យ​សុខាភិបាល​ប្រយុទ្ធ​នឹងការ​រាតត្បាតជំងឺ​កូវីដ​១៩​។​

ព័ត៌មាន​​​​​​ផ្សេង​​​ទៀត

XS
SM
MD
LG