- ដោយ ស៊ុន ណារិន
លោក ហ៊ុន សែន៖ ការឈប់សម្រាកចូលឆ្នាំ ត្រូវលុបចោលដើម្បីបញ្ចៀសការធ្វើដំណើរនិងជួបជុំគ្នា
ភ្នំពេញ — លោកនាយករដ្ឋមន្រ្តី ហ៊ុន សែន នៅថ្ងៃអង្គារនេះ បានប្រកាសថា រដ្ឋាភិបាលសម្រេចលុបចោលការឈប់សម្រាកថ្ងៃចូលឆ្នាំខ្មែរសម្រាប់អ្នកធ្វើការរដ្ឋ និងឯកជន ក្នុងនោះមានកម្មកររោងចក្ររាប់ម៉ឺននាក់ផងដែរ ដើម្បីបញ្ចៀសការធ្វើដំណើរទៅស្រុកកំណើត និងការជួបជុំគ្នាដែលអាចនាំមកនូវហានិភ័យនៃការឆ្លងវីរុសកូរ៉ូណា។
លោក ហ៊ុន សែន បានថ្លែងបែបនេះនៅសន្និសីទសារព័ត៌មានមួយ ដែលធ្វើឡើងនៅវិមានសន្តិភាព នៅព្រឹកថ្ងៃអង្គារនេះដើម្បីបង្ហាញវិធានការរបស់រដ្ឋាភិបាលពាក់ព័ន្ធបច្ចុប្បន្នភាពនៃជំងឺកូវីដ១៩នៅកម្ពុជា។
នាយករដ្ឋមន្រ្តីថ្លែងថាបើទោះចំនួនឆ្លងវីរុសកូរ៉ូណាក្នុងប្រទេសកម្ពុជានៅមានតិចក៏ពិតមែនប៉ុន្តែ«ហានិភ័យនៅខ្ពស់ណាស់»សម្រាប់កម្ពុជា។
លោកមានប្រសាសន៍ថា៖ «យើងមិនត្រូវភ្លេចខ្លួនថា យើងជាប្រទេសដែលមានអ្នកជំងឺឆ្លងតិច។ថ្ងៃខ្លះ គឺយើងគ្មានអ្នកឆ្លងទាល់តែសោះ មានតែអ្នកជា ហើយបែរជាសប្បាយរីករាយនោះទេ។ ហានិភ័យនៅខ្ពស់ណាស់សម្រាប់ប្រទេសរបស់យើង»។
- ដោយ ស៊ុន ណារិន
លោកហ៊ុន សែន៖ វីរុសកូរ៉ូណាស្ថិតក្នុងហានិភ័យខ្ពស់ណាស់សម្រាប់កម្ពុជា
ភ្នំពេញ — លោកនាយករដ្ឋមន្រ្តី ហ៊ុន សែន នៅថ្ងៃអង្គារនេះ បានថ្លែងថា លទ្ធភាពរាតត្បាតនៃវីរុសកូរ៉ូណានៅកម្ពុជា ស្ថិតក្នុងហានិភ័យខ្ពស់នៅឡើយ បើទោះក្នុងរយៈពេលប៉ុន្មានថ្ងៃនេះ ករណីឆ្លងថ្មីមិនមាននោះទេ។
លោក ហ៊ុន សែន បានថ្លែងបែបនេះនៅសន្និសីទសារព័ត៌មានមួយ ដើម្បីបង្ហាញវិធានការរបស់រដ្ឋាភិបាលពាក់ព័ន្ធបច្ចុប្បន្នភាពនៃជំងឺកូវីដ១៩នៅកម្ពុជា ដែលធ្វើឡើងនៅវិមានសន្តិភាព នៅព្រឹកថ្ងៃអង្គារនេះ។
លោក ហ៊ុន សែន បញ្ជាក់ថា បើទោះចំនួនឆ្លងនៅមានតិចនៅកម្ពុជា ប៉ុន្តែ«ហានិភ័យនៅខ្ពស់ណាស់» សម្រាប់កម្ពុជា។
លោកមានប្រសាសន៍ថា៖ «ដូច្នេះហើយ យើងអត់ត្រូវសប្បាយភ្លេចខ្លួន ដែលនាំមកនូវហានិភ័យសម្រាប់ប្រទេសយើងនោះទេ។ យើងត្រូវមានវិធានការបន្ត»។
លោកបន្ថែមថា រដ្ឋាភិបាលត្រូវដាក់នូវ «យុទ្ធសាស្រ្តនៃការតស៊ូរយៈពេលវែង» ប្រឆាំងនឹងវីរុសកូរ៉ូណានេះ។
ក្រសួងសុខាភិបាលនៅថ្ងៃអង្គារនេះ បានប្រកាសថា រកឃើញករណីឆ្លងវីរុសកូរ៉ូណា១នាក់ទៀត ដែលជាជនបរទេស នាំឲ្យករណីឆ្លងទូទាំងប្រទេសកើនឡើងទៅដល់១១៥។ ក្រសួងបញ្ជាក់ថា ជនបរទេសនោះ គឺជាស្រ្តីទេសចរជនជាតិវៀតណាម អាយុ២៧ឆ្នាំ មកពីប្រទេសវៀតណាម។ ស្រ្តីម្នាក់នោះកំពុងសម្រាកព្យាបាលនៅមន្ទីរពេទ្យមិត្តភាពខ្មែរសូវៀត។
បើតាមក្រសួងសុខាភិបាល ស្រ្តីរូបនោះបានចេញពីក្រុងបាវិត ខេត្តស្វាយរៀង ទៅវៀតណាម កាលពីថ្ងៃទី២ ខែមីនា ហើយត្រឡប់មកកម្ពុជាវិញនៅថ្ងៃទី១០ ខែមីនា។ ស្រ្តីនោះមានមិត្តប្រុសជនជាតិចិន ដែលបានចេញពីកម្ពុជា នៅថ្ងៃទី៣ ខែមេសា។ ក្រសួងមិនបានបញ្ជាក់ថាតើបុរសជាជនជាតិចិននោះ ចេញទៅប្រទេសណានោះទេ។
បើតាមសេចក្តីប្រកាសព័ត៌មានដដែល មនុស្ស៥នាក់ទៀតបានជាសះស្បើយពីជំងឺ។ គិតត្រឹមថ្ងៃអង្គារនេះ សរុបអ្នកជាសះស្បើយ មានទៅដល់៥៨នាក់។
រហូតមកដល់ត្រឹមថ្ងៃទី៣១ ខែមីនា កម្ពុជាបានធ្វើតេស្តមនុស្សចំនួន៥៧៦៨នាក់ ទាំងជនជាតិកម្ពុជា និងជនបរទេស ក្នុងនោះមានជនបរទេសដែលធ្វើដំណើរកម្សាន្តតាមនាវាអន្តរជាតិ Westerdam ដែលសុំចតនៅកម្ពុជា។ នេះបើតាមអ្នកនាំពាក្យក្រសួងសុខាភិបាល លោក លី សូវ៉ាន់ ប្រាប់VOAកាលពីសប្តាហ៍មុន។
ការធ្វើតេស្តរកវីរុសកូរ៉ូណាក្នុងតំបន់អាស៊ីអាគេ្នយ៍ ក្នុងនោះមានប្រទេសកម្ពុជាផងដែរ ត្រូវបានអ្នកជំនាញសុខាភិបាលក្នុងតំបន់សង្ស័យថាការធ្វើតេស្តមានកម្រិតទាបនេះ ប្រហែលជាមិនអាចបង្ហាញអំពីអត្រាពិតប្រាកដនៃអ្នកឆ្លងជំងឺកូវីដ១៩បានទេ។ ក្រុមអ្នកជំនាញបារម្ភថា បើសិនជាការបង្ហាញចំនួនមិនពិតប្រាកដនៃអ្នកឆ្លងជំងឺកូវីដ១៩ បង្កឲ្យមានភាពមិនសូវខ្វាយខ្វល់នោះ នោះវាអាចធ្វើឲ្យវីរុសនេះកាន់តែរីករាលដាល។
ក្រោយការរាលដាលនៃវីរុសកូរ៉ូណានៅកម្ពុជាជាបន្តបន្ទាប់ រដ្ឋាភិបាលបានប្រកាសបិទការជួបជុំទ្រង់ទ្រាយធំ ដូចជាការប្រគំតន្រ្តី កន្លែងច្រៀងកម្សាន្ត ខារ៉ាអូខេ ក្លឹបកម្សាន្ត បៀរហ្គាឌិន និងកាស៊ីណូជាដើម៕
- ដោយ ស៊ុន ណារិន
កម្ពុជារកឃើញជនបរទេស១នាក់ឆ្លងវីរុសកូរ៉ូណា ករណីសរុបកើនដល់១១៥
ភ្នំពេញ — ក្រសួងសុខាភិបាលបានប្រកាសថា រកឃើញករណីឆ្លងវីរុសកូរ៉ូណា១នាក់ទៀត ដែលជាជនបរទេស នាំឲ្យករណីឆ្លងទូទាំងប្រទេសកើនឡើងដល់ទៅ១១៥។ នេះបើយោងតាមសេចក្តីប្រកាសព័ត៌មានរបស់ក្រសួងសុខាភិបាលដែលចេញផ្សាយនៅព្រឹកថ្ងៃអង្គារនេះ។
ក្រសួងបញ្ជាក់ថា ជនបរទេសនោះ គឺជាស្រ្តីទេសចរជនជាតិវៀតណាម អាយុ២៧ឆ្នាំ មកពីប្រទេសវៀតណាម។ ស្រ្តីម្នាក់នោះកំពុងសម្រាកព្យាបាលនៅមន្ទីរពេទ្យមិត្តភាពខ្មែរសូវៀត។ បើតាមក្រសួងសុខាភិបាល ស្រ្តីរូបនោះបានចេញពីក្រុងបាវិត ខេត្តស្វាយរៀង ទៅវៀតណាម កាលពីថ្ងៃទី២ ខែមីនា ហើយត្រឡប់មកកម្ពុជាវិញនៅថ្ងៃទី១០ ខែមីនា។ ស្រ្តីនោះមានមិត្តប្រុសជនជាតិចិន ដែលបានចេញពីកម្ពុជា នៅថ្ងៃទី៣ ខែមេសា។ ក្រសួងមិនបានបញ្ជាក់ថាតើបុរសជាជនជាតិចិននោះ ចេញទៅប្រទេសណានោះទេ។
បើតាមសេចក្តីប្រកាសព័ត៌មានដដែល មនុស្ស៥នាក់ទៀតបានជាសះស្បើយពីជំងឺ។ គិតត្រឹមថ្ងៃអង្គារនេះ សរុបអ្នកជាសះស្បើយ មានទៅដល់៥៨នាក់៕
- ដោយ ស៊ុន ណារិន
កម្មករកាត់ដេររៀបរាប់ការលំបាក និងបំណុល ដោយសាររោងចក្រផ្អាកដំណើរការ
ភូមិពង្រ ស្រុកបរសេដ្ឋ ខេត្តកំពង់ស្ពឺ — ជិត៥ឆ្នាំមកហើយ ដែលអ្នកស្រីស៊ឹម ស្រីអូនត្រូវក្រោកពីព្រឹកព្រលឹម គឺចាប់ផ្តើមចេញដំណើរតាមរថយន្ត នៅម៉ោង៥កន្លះ ទៅធ្វើការរោងចក្រ ដែលមានទីតាំងស្ថិតនៅតាមបណ្តោយផ្លូវ៤១ ក្នុងស្រុកសំរោងទង ខេត្តកំពង់ស្ពឺ។ ប៉ុន្តែរយៈពេលជាងមួយសប្តាហ៍មកហើយ អ្នកស្រីនៅផ្ទះមើលថែកូនស្រីឈ្មោះ លាង ក្វាន់ តា អាយុ១ឆ្នាំកន្លះ ដោយសារអ្នកស្រីត្រូវបានព្យួរការងាររោងចក្រ ដែលអ្នកស្រីពឹងផ្អែកសម្រាប់ជីវភាពរស់នៅរាប់ឆ្នាំមកហើយ។
កំពុងអង្គុយយោលកូនឲ្យគេងក្នុងអង្រឹងនៅក្រោមផ្ទះ អ្នកស្រីស៊ឹម ស្រីអូន អាយុ៣៩ឆ្នាំ កំពុងព្រួយបារម្ភអនាគតកូនរបស់អ្នកស្រីទាំង៤នាក់ ដែល៣នាក់នៅតូចៗនៅឡើយនិងកំពុងសិក្សា។
រស់នៅក្នុងភូមិពង្រ ឃុំស្វាយចចិប ស្រុកបរសេដ្ឋ ខេត្តកំពង់ស្ពឺ អ្នកស្រី ស៊ឹម ស្រីអូនជាកម្មកររោងចក្រជិត១០ឆ្នាំមកហើយ។ ប៉ុន្តែកាលពីពេលថ្មីៗនេះ អ្នកស្រី និងប្អូនស្រីដែលធ្វើការរោងចក្រផលិតកាបូបឈ្មោះថាWinning Dragon Leatherwear Cambodiaជាមួយគ្នា ត្រូវបានព្យួរការងារ ដែលធ្វើឲ្យអ្នកស្រីមានការព្រួយបារម្ភចំពោះបំណុលដែលជំពាក់គេ និងអនាគតកូនៗរបស់អ្នកស្រី។
កាលពីថ្ងៃអាទិត្យ ពេលកំពុងយោលកូនឲ្យគេងក្នុងអង្រឹង អ្នកស្រីបានថ្លែងប្រាប់VOAថា៖
«បារម្ភជាងគេ មានតែអត់លុយបង់រដ្ឋ[បង់ធនាគារ]តែប៉ុណ្ណឹង។ អត់លុយបង់គេ ខ្លាចតែគេមកទារមុខក្រោយ ប៉ុន្តែគេអត់មកទារ។គេគ្រាន់តែព្រមានយើងអីចឹងណា៎។ប៉ុន្តែខ្ញុំនៅមានសង្ឃឹមថា រកសងគេ តិចតួចអីចេះតែរកបង់គេ ។ អត់ការងារពីខាងហ្នឹង យើងរកផ្សេងពីហ្នឹងទៀតទៅ!»
ដោយសារវីរុសកូរ៉ូណា ដែលនាំមិនមានការបញ្ជាទិញ និងកង្វះវត្ថុធាតុដើមកម្មកររោងចក្ររាប់ម៉ឺននាក់ត្រូវបានព្យួរឬបញ្ឈប់ពីការងារតែម្តង។ ការណ៍នេះនាំឲ្យកម្មករព្រួយបារម្ភកាន់តែខ្លាំងពីការមិនមានចំណូលទៅថ្ងៃខាងមុខ ខណៈកំពុងភ័យខ្លាច ថាសងបំណុលគេមិនបាន។
អ្នកស្រីស៊ឹម ស្រីអូនត្រូវបានរោងចក្រឲ្យឈប់រយៈពេល២ខែ ចាប់ពីថ្ងៃទី២៧ខែមីនា ឆ្នាំ២០២០។ការបាត់បង់ការងារនេះធ្វើឲ្យអ្នកស្រីជួបការលំបាកក្នុងការសងបំណុលគេដែលអ្នកស្រីត្រូវបង់ប្រមាណ១៣០ដុល្លារក្នុងមួយខែ រយៈពេលជាង១២ខែទៀត។កាលពីឆ្នាំមុន អ្នកស្រីបានខ្ចីប្រាក់គេប្រមាណ២៥០០ដុល្លារអាមេរិក ដើម្បីទិញម៉ូតូឌ្រីមមួយគ្រឿង និងទុកខ្លះសម្រាប់ចាយវាយ។
អ្នកស្រីមិនច្បាស់ថាតើអ្នកស្រីនឹងទទួលបានការងារធ្វើនៅថ្ងៃខាងមុខឬយ៉ាងណានោះទេ។