បេក្ខជនប្រកួតប្រជែងតំណែងប្រធានាធិបតីនាំមុខគេ ចំនួន៩រូបខាងគណបក្សសាធារណរដ្ឋ បានប៉ះទង្គិចពាក្យសម្តីគ្នាអំពីបញ្ហាសន្តិសុខជាតិកាលពីថ្ងៃអង្គារ នៅក្នុងវេទិកាសួរដេញដោលគ្នាមួយ ដែលមានការសួរ និងឆ្លើយសំណួរយ៉ាងក្លៀវក្លាក្នុងចំណោមបេក្ខជនកំពូលៗរបស់គណបក្សនេះ។
វេទិកាសួរដេញដោលគ្នានៅក្នុងទីក្រុង Las Vegas រដ្ឋ Nevada នោះ បានធ្វើឡើង មិនដល់ពីរខែផង មុនពេលគេបើកមហាសន្និបាតរបស់គណបក្សនេះនៅរដ្ឋ Iowa។ មហាសន្និបាតបក្សនៅពេលនោះ គឺជាព្រឹត្តិការណ៍ដ៏សំខាន់ ក្នុងការតែងតាំងបេក្ខជនតំណាងឲ្យគណបក្សដំបូងគេនៅក្នុងរដូវកាលបោះឆ្នោតបឋម។
វេទិកាសួរដេញដោលគ្នាកាលពីថ្ងៃអង្គារដំបូងឡើយផ្តោតទៅលើការអំពាវនាវរបស់លោក Donald Trump ដែលជាបេក្ខជននាំមុនគេឲ្យហាមឃាត់ជាបណ្តោះអាសន្នកុំឲ្យអ្នកកាន់សាសនាឥស្លាមចូលក្នុងទឹកដីសហរដ្ឋអាមេរិក បន្ទាប់ពីមានការវាយប្រហារភេរវកម្មជាច្រើនក្នុងពេលថ្មីៗនេះ។
លោក Donald Trump ដែលជាតារាក្នុងកម្មវិធីជីវិតពិតតាមទូរទស្សន៍ និងជាសេដ្ឋីអចលនទ្រព្យផងនោះបានការពារសំណើររបស់លោក ដោយចាត់ទុកថាវាពិតជាសមហេតុផល។ លោកបានទទូចថា «យើងមិនមែននិយាយអំពីបញ្ហាសាសនាទេ។ យើងកំពុងនិយាយអំពីបញ្ហាសន្តិសុខ»។
ទោះបីជាមេដឹកនាំគណបក្សសាធារណរដ្ឋជាច្រើនរូប បានរិះគន់សំណើររបស់លោកTrump ក៏ដោយ ក៏បេក្ខជនភាគច្រើនដែលបានសួរដេញដោលគ្នាកាលពីថ្ងៃអង្គារនោះ ហាក់ដូចជាស្ទាក់ស្ទើរក្នុងការប្រឈមមុខជាមួយនឹងលោក Trump ដោយផ្ទាល់ជុំវិញបញ្ហាហាមប្រាមអ្នកកាន់សាសនាឥស្លាមកុំឲ្យចូលក្នុងទឹកដីអាមេរិកនេះ៕
