សកម្មជនល្បីឈ្មោះម្នាក់និងជាអ្នករិះគន់រដ្ឋាភិបាលឡាវត្រូវបានគេបាញ់សម្លាប់នៅឯហាងកាហ្វេមួយកន្លែងក្នុងរដ្ឋធានីវៀងចន្ទន៍ ប្រទេសឡាវ ដោយរូបភាពនៃអំពើឃាតកម្មនេះត្រូវបានប្រព័ន្ធផ្សព្វផ្សាយរដ្ឋបង្ហោះអនឡាញ។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន AFP។
ប្រទេសឡាវត្រូវបានគេរិះគន់ជាយូរមកហើយថាមានប្រវត្តិសិទ្ធិមនុស្សមិនល្អ និងថាបានបរាជ័យក្នុងការធ្វើការស៊ើបអង្កេតឱ្យបានត្រឹមត្រូវលើការបាត់ខ្លួនអ្នករិះគន់រដ្ឋាភិបាល។
អង្គការសិទ្ធិមនុស្ស Human Rights Watch និងអង្គការសិទ្ធិមនុស្ស Amnesty International បានថ្កោលទោសអំពើឃាតកម្មនេះនិងបានជំរុញអាជ្ញាធរឡាវឱ្យធ្វើការស៊ើបអង្កេតឱ្យបានត្រឹមត្រូវ។
រូបភាពក្នុងកាមេរ៉ាសុវត្ថិភាពដែលទីភ្នាក់ងារព័ត៌មានរដ្ឋ KPL បានបង្ហោះតាមអនឡាញកាល ពីថ្ងៃចន្ទបានបង្ហាញឱ្យឃើញខ្មាន់កាំភ្លើងពាក់អាវពណ៌ត្នោតនិងមួកខ្មៅបាញ់ទៅលើលោក Anousa «Jack» Luangsuphom ពីរដងកាលពីថ្ងៃសៅរ៍សប្ដាហ៍មុន។
ខ្មាន់កាំភ្លើងបានដើរចូលក្នុងហាងកាហ្វេបានមួយភ្លែតក្នុងបំណងហាក់មើលឱ្យច្បាស់ថាលោក Anousa ពិតជានៅទីនោះឬក៏អត់ មុនពេលទាញកាំភ្លើងខ្លីចេញពីចង្កេះហើយដើរចូលក្នុងហាងនោះម្ដងទៀតបាញ់ពីរគ្រាប់ទៅលើលោក។
លោក Anousa បានដួលលើដីហើយនៅពេលនោះស្ត្រីពីរនាក់ដែលនៅក្នុងហាងកាហ្វេនោះបានស្រែករកជំនួយ ហើយខ្មាន់កាំភ្លើងបានរត់គេចខ្លួន។
រូបភាពវីដេអូនេះបានបង្ហាញថា ខ្មាន់កាំភ្លើងបានប្រើកន្សែងដៃដោយប្រុងប្រយ័ត្នដើម្បីបើកនិងបិទទ្វារហាងកាហ្វេនោះ ក្នុងបំណងហាក់ធ្វើយ៉ាងណាមិនឱ្យបន្សល់ទុកនូវស្នាមក្រយៅដៃ។
សេចក្ដីរាយការណ៍របស់ទីភ្នាក់ងារព័ត៌មាន KPL បានបញ្ជាក់ថាប៉ូលិសកំពុងធ្វើការស៊ើបអង្កេតលើហេតុការណ៍នេះនិងតាមស្វែងរកជនសង្ស័យ។
លោក Anousa គឺជាម្ចាស់ទំព័រ Facebook «Driven by Keyboard» ដ៏មានប្រជាប្រិយមួយ ដែលតែងតែបង្ហោះអំពីទស្សនៈរិះគន់លើរដ្ឋាភិបាលឡាវ។
អង្គការAmnesty Internationalបានបញ្ជាក់ថា មិត្តភក្តិម្នាក់របស់លោកAnousa បាននិយាយថាការបាញ់ប្រហារនេះបានធ្វើឱ្យសកម្មជន ៧ នាក់ទៀតដែលនៅសល់មិនហ៊ាននិយាយរិះគន់រដ្ឋាភិបាល៕
