គណបក្ស Democratic Progressive Party ដែលជាគណបក្សកាន់អំណាចនៅកោះតៃវ៉ាន់ បានឈ្នះការបោះឆ្នោតនៅអាណត្តិទី ៣ ជាបន្តទៀតកាលពីថ្ងៃសៅរ៍។ លោក Lai Ching-te ដែលជាបេក្ខជនរបស់គណបក្សនេះនិងដែលបច្ចុប្បន្នជាអនុប្រធានាធិបតីតៃវ៉ាន់ បានឈ្នះសំឡេងឆ្នោតចំនួន ៤០%។
លោកបានយកឈ្នះលើលោក Hou You-ih ដែលជាបេក្ខជនប្រធានាធិបតីខាងគណបក្សគួមីងតាង (Kuomintang) ដែលជាគណបក្សប្រឆាំងមានភាពរាក់ទាក់ជាមួយចិន ក៏ដូចជាបានយកឈ្នះលើលោក Ko Wen-je ដែលជាបេក្ខជនប្រធានាធិបតីខាងគណបក្ស Taiwan People’s Party។
លោក Lai បានបញ្ជាក់នៅក្នុងសុន្ទរកថាទទួលបានជ័យជម្នះរបស់លោកថា ជ័យជម្នះរបស់លោកកាលពីថ្ងៃសៅរ៍គឺជាជ័យជម្នះមួយសម្រាប់សហគមន៍ប្រជាធិបតេយ្យនៅលើពិភពលោក។
លោកបានថ្លែងនៅក្នុងពិធីមួយដែលមានអ្នកសារព័ត៌មានទាំងក្នុងស្រុកនិងអន្តរជាតិជាង ១០០ នាក់ចូលរួមថា៖ «យើងកំពុងប្រាប់សហគមន៍អន្តរជាតិថា រវាងលទ្ធិប្រជាធិបតេយ្យនិងលទ្ធិអាជ្ញាធិបតេយ្យ យើងនឹងឈរនៅខាងលទ្ធិប្រជាធិបតេយ្យ»។
លោក Lai បានកត់សម្គាល់ថា ប្រជាជនតៃវ៉ាន់បានតតាំងយ៉ាងជោគជ័យប្រឆាំងនឹងការប៉ុនប៉ងរបស់កម្លាំងខាងក្រៅនៅក្នុងការជ្រៀតជ្រែកចូលក្នុងការបោះឆ្នោតនេះ។ លោកលើកឡើងដូច្នេះចង់សំដៅលើយុទ្ធវិធីជាទូទៅដែលចិនបានប្រើក្នុងអំឡុងយុទ្ធនាការឃោសនាបោះឆ្នោតប្រធានាធិបតីតៃវ៉ាន់រាប់ខែមុនការបោះឆ្នោត។
លោកបានបញ្ជាក់ដូច្នេះថា៖ «យើងជឿជាក់ថាមានតែពលរដ្ឋតៃវ៉ាន់ទេដែលមានសិទ្ធិក្នុងការជ្រើសរើសប្រធានាធិបតីរបស់ខ្លួន»។
លោក Lai បានបន្ថែមថា ដោយសារលោកនិងបេក្ខជនអនុប្រធានាធិបតីអ្នកស្រី Hsiao Bi-Khim ទទួលបានសំឡេងឆ្នោតច្រើនជាងគេនៅក្នុងការបោះឆ្នោត នេះមានន័យថាតៃវ៉ាន់នឹងបន្ត «ដើរលើមាគ៌ាត្រឹមត្រូវឆ្ពោះទៅមុខ»។
លោកបានសង្កត់ធ្ងន់ថា៖ «យើងនឹងមិនដើរត្រឡប់ក្រោយឬមើលក្រោយនោះទេ»។
ដោយបញ្ជាក់ជាថ្មីអំពីការប្តេជ្ញារបស់លោកនៅក្នុងការរក្សាសន្តិភាពនិងស្ថិរភាពនៅទូទាំងច្រកសមុទ្រតៃវ៉ាន់ លោក Lai បានសម្តែងនូវឆន្ទៈក្នុងការចូលរួមជាមួយចិនផ្អែកលើមូលដ្ឋាននៃសេចក្តីថ្លៃថ្នូរនិងសមភាព។
លោកបាននិយាយដូច្នេះថា៖ «យើងនឹងប្រើការផ្លាស់ប្ដូរយោបល់ជំនួសឱ្យការរារាំង ប្រើកិច្ចសន្ទនាជំនួសឱ្យការប្រឈមមុខដាក់គ្នា ហើយបន្តការពិភាក្សានិងកិច្ចសហប្រតិបត្តិការជាមួយចិនប្រកបដោយភាពជឿជាក់»។
លោក Hou ខាងគណបក្សគួមីងតាងបានថ្លែងសុន្ទរកថាបន្ទាប់ពីលោកបានចាញ់ក្នុងការបោះឆ្នោតនៅម៉ោង ៨ យប់ ម៉ោងនៅកោះតៃវ៉ាន់ ដោយលោកបានសុំទោសដែលលោកមិនអាចជួយគណបក្សគួមីងតាងឱ្យត្រឡប់មកកាន់អំណាចវិញ ប៉ុន្តែលោកបានសង្កត់ធ្ងន់ថាលោកបានធ្វើអ្វីៗគ្រប់យ៉ាងទាំងអស់ដែលលោកអាចធ្វើបាននៅក្នុងយុទ្ធនាការឃោសនាបោះឆ្នោតកន្លងមក។
លោក Hou បានថ្លែងប្រាប់ក្រុមអ្នកគាំទ្រលោកដែលខកចិត្តថា៖ «ខ្ញុំបានធ្វើឱ្យអ្នកទាំងអស់គ្នាខកចិត្ត ហើយខ្ញុំមកទីនេះដើម្បីសម្តែងការសុំទោសអស់ពីដួងចិត្តរបស់ខ្ញុំ»។ លោកបានឱនសំុទោសចំនួនពីរដង៕
ប្រែសម្រួលដោយអ្នកនាង ស្រេង លក្ខិណា
វេទិកាបញ្ចេញមតិ