ភ្ជាប់​ទៅ​គេហទំព័រ​ទាក់ទង

កង្វះ​អង្គការ​សហគមន៍​ធ្វើ​ឲ្យ​ពិបាក​ជំរុញ​អ្នក​បោះឆ្នោត​ខ្មែរ​នៅ​ក្រុង Oakland ​រដ្ឋ​កាលីហ្វ័រញ៉ា


អ្នកស្រី ខ្វាត់ សារឿន អាយុ ៦៦ ឆ្នាំ អ្នក​រស់​នៅ​ក្រុង​ Oakland រយៈ​ពេល​៣០​ឆ្នាំ​មក​ហើយ ផ្តល់​បទ​សម្ភាសន៍​ជាមួយ​ VOA នៅ​មជ្ឈមណ្ឌល​សហគមន៍​ព្រះ​សង្ឃ​ខ្មែរ​អន្តរជាតិ ដែល​គេ​ស្គាល់​ថា​ជា​«វត្ត​ថ្មី‍» កាល​ពី​ថ្ងៃ​ទី​៣០​​ ខែ​សីហា ឆ្នាំ​២០១៦។ អ្នកស្រី​បាន​មក​រស់​នៅ​សហរដ្ឋ​អាមេរិក​កាល​ពី​៣០​ឆ្នាំ​មុន ប៉ុន្តែ​បាន​​ចូល​រួម​​ក្នុង​ការ​បោះឆ្នោត​​ប្រធានាធិបតី​សហរដ្ឋ​អាមេរិក​តែ​ម្តង​គត់ គឺ​នៅ​ឆ្នាំ​២០០៨។ (សឹង សុផាត/VOA)

មាន​អង្គការ​ផ្តល់​សេវា​សុខភាព​តូច​មួយ​បាន​ជួយ​ក្នុង​កិច្ចការ​បោះឆ្នោត​នេះ​ខ្លះ​ ខណៈ​​មេ​ដឹកនាំ​សហគមន៍​​​នៅ​​ទី​នេះ នៅ​តែ​​សង្ឃឹម​ថា ​នឹង​មាន​ពលរដ្ឋ​អាមេរិកាំង​ដើម​កំណើត​ខ្មែរ​ច្រើន​ថែម​ទៀត​ដែល​នឹង​ទៅ​ចុះ​ឈ្មោះ​​បោះឆ្នោត។

ការ​បោះឆ្នោត​ប្រធានាធិបតី​អាមេរិក​នៅ​សល់​តិច​ជាង​ពីរ​ខែ​ទៀត​ប៉ុណ្ណោះ​ ប៉ុន្តែ​អ្នក​ស្រី ខ្វាត់​ សារឿន មិន​ទាន់​បាន​ចុះ​ឈ្មោះ​បោះឆ្នោត​នៅ​ឡើយ។

អ្នកស្រី​មាន​អាយុ​៦៦​ឆ្នាំ ហើយ​ចង់​បោះឆ្នោត​ ប៉ុន្តែ​អ្នក​ស្រី​បារម្ភ​ថា ដោយ​សារ​ចំណេះដឹង​ភាសា​អង់គ្លេស​របស់​អ្នកស្រី​មិន​ល្អ ទើប​អ្នក​ស្រី​មិន​អាច​យល់​ច្បាស់​ពី​ដំណើរការ​បោះឆ្នោត​នៅ​ឆ្នាំ​នេះ។

អ្នក​ស្រី​ ខ្វាត់​ សារឿន ដែល​បាន​មក​រស់​នៅ​សហរដ្ឋ​អាមេរិក​ជាង​៣០​ឆ្នាំ ថ្លែង​ប្រាប់ VOA ថា៖

«បើ​មាន​គេ​ពន្យល់​ឲ្យ​ច្បាស់​លាស់ អាហ្នឹង​ប្រហែល​ជា​ទៅ​បោះ។‍ ពីព្រោះ​អត់​ទាន់​ដឹង​ថា ឈ្មោះ​អី​ឈ្មោះអី ហើយ​អត់​មាន​អ្នក​ពន្យល់​ថា​របៀប​ម៉េច​អី​របៀប​ម៉េច‍»។

អ្នកស្រី​ ខ្វាត់ សារឿន ថ្លែង​ថា​ អ្នកស្រីធ្លាប់​បាន​ចូល​រួម​ការ​បោះឆ្នោត​ប្រធានាធិបតី​ម្តង​កាល​ពី​ឆ្នាំ​២០០៨ នៅ​ពេល​លោក​ប្រធានាធិបតី​ បារ៉ាក់ អូបាម៉ា បាន​ជាប់​ឆ្នោត​ជា​ប្រធានាធិបតី​សហរដ្ឋ​អាមេរិក​ក្នុង​អាណត្តិ​ទី​១។ អ្នក​ស្រី​យល់​ពី​សារៈសំខាន់​នៃ​ការ​បោះឆ្នោត ប៉ុន្តែ​អ្នកស្រី​ត្រូវ​ការ​អ្នក​ជួយ​ឲ្យ​អ្នក​ស្រី​បាន​ចុះ​ឈ្មោះ​បោះឆ្នោត។

អ្នក​ស្រី​ថ្លែង​នៅ​ក្នុង​បទ​សម្ភាសន៍​មួយជាមួយ​ VOA ​នា​ពេល​ថ្មីៗ​នេះ​ថា៖

«កាល​ពី​ខ្ញុំ​បោះ​ឆ្នោត​ឲ្យ[អូបាម៉ា]​លើក​ទី​១​នោះ មាន​អ្នក​ពន្យល់​ប្រាប់​ថា ​មាន​រឿង​អញ្ចេះ​មួយ​អញ្ចុះ​មួយ កាល​នោះ​បាន​ខ្ញុំ​ទៅ​បោះ។ លើក​នេះ​អត់​មាន​អ្នក​ពន្យល់​ឲ្យ​ច្បាស់​លាស់‍»។

អ្នកស្រី​ ខ្វាត់ សារឿន ជា​ពលរដ្ឋ​អាមេរិកាំង​ដើម​កំណើត​ខ្មែរ​ម្នាក់​នៅ​តំបន់​ទី​ក្រុង​អូកឡិនដ៍ (Oakland) ក្បែរទី​ក្រុង​សាន់ ហ្វ្រាន់ស៊ីស្កូ (San Francisco) រដ្ឋ​កាលីហ្វ័រញ៉ា (California) ដែល​ជា​រដ្ឋ​មាន​ជនជាតិខ្មែរ​រស់​នៅ​ច្រើន។

មាន​ជនជាតិ​ខ្មែរ​រហូត​ដល់​ប្រមាណ​ជិត១០.០០០​នាក់ រស់​នៅ​រាយប៉ាយ​នៅ​ទូទាំង​តំបន់​ប្រជុំ​ក្រុង​ Oakland-San Francisco ​នេះ​ ប៉ុន្តែ​ពួក​គេ​មិន​មាន​អង្គការ​ឬ​សមាគម​ដែល​រឹងមាំ​ ហើយ​ដែល​អាច​ផ្តល់​ជំនួយ​ខាង​កិច្ច​ការ​នានា​ដូច​ជា​ការ​ជួយ​ពលរដ្ឋ​ខ្មែរ​អាមេរិកាំងចុះ​ឈ្មោះ​បោះឆ្នោត​នោះ​ទេ។

កាល​ពី​មុន​សហគមន៍​ខ្មែរ​នៅ​ទី​នេះ​មាន​អង្គការ​និង​មណ្ឌល​សហគមន៍​រឹង​មាំ ដោយ​រួម​មាន​សមាគមអភិវឌ្ឍ​សហគមន៍​ខ្មែរ (Cambodian Community Development, Inc.) និង​វត្ត​ខ្មែរ​អូកឡិនដ៍ (Oakland Cambodian Buddhist Temple) ដែល​អ្នក​ស្រុក​និយម​ហៅថា​«វត្ត​ចាស់‍»។

ប៉ុន្តែសមាគមអភិវឌ្ឍ​សហគមន៍​ខ្មែរ​បាន​បិទ​នៅ​ឆ្នាំ​២០១១ មួយ​ផ្នែក​ដោយ​សារ​តែខ្វះ​ថវិកា ហើយ​វត្ត​ចាស់​ត្រូវ​បាន​បំផ្លាញ​ដោយ​អគ្គីភ័យ​កាល​ពី​ខែ​កុម្ភៈ ដើម​ឆ្នាំ​នេះ។

មេដឹកនាំ​សហគមន៍កំពុង​ព្យាយាម​សាងសង់​វត្ត​ចាស់​ឡើង​ ​នៅទីតាំង​ថ្មី​មួយ​ក្នុង​ក្រុង Oakland ខណៈ​ដែល​វត្ត​ទី​២​ថ្មី​មួយ ដែល​អ្នកស្រី ខ្វាត់ សារឿន ឧស្សាហ៍​អញ្ជើញ​ទៅ​សុំ​សីល​នោះ កំពុងកសាង​ព្រះវិហារនិង​អគារ​ផ្សេងៗ​មិន​ទាន់​ចប់​សព្វ​គ្រប់​នៅ​ឡើយ។

ក្នុង​អំឡុង​ពេល​ការ​បោះឆ្នោតជ្រើសរើស​ប្រធានាធិបតី​មុនៗ​ និង​ការ​បោះឆ្នោតក្នុង​ក្រុង​ផ្សេង​ទៀត អង្គការ​សហគមន៍​ទាំង​នេះ​បាន​ដើរ​តួនាទី​ជា​មធ្យោបាយ​និង​ទីតាំង​ងាយស្រួល​សម្រាប់ស្វែងរក​និង​ជួប​អ្នក​បោះឆ្នោត​អាមេរិកាំង​ដើម​កំណើត​ខ្មែរ។

ថ្វី​បើ​គេ​មិន​ទាន់​ប្រាកដ​ថា តើ​ការ​បាត់​បង់​អង្គការ​សហគមន៍​ទាំង​នេះ​ បាន​នាំ​ឲ្យចំនួន​នៃការ​ចុះ​ឈ្មោះ​បោះឆ្នោតរបស់​ពលរដ្ឋ​ខ្មែរ​អាមេរិកាំងមាន​ការ​ថយ​ចុះ​ឬ​យ៉ាង​ណា​នោះ អវត្តមាន​នៃ​អង្គការ​ទាំង​នេះ​បាន​ធ្វើ​ឲ្យអ្នក​ធ្វើការ​ខាង​កិច្ចការបោះឆ្នោត​មាន​ការ​លំបាកក្នុង​ការ​ទាក់ទង​ពលរដ្ឋ​ខ្មែរ។

បើ​តាម​តួលេខ​ដែល​ VOA ទទួល​បាន​ពី​ការិយាល័យ​បោះឆ្នោត​របស់​ស្រុក Alameda (Alameda County) ដែល​រួម​បញ្ចូល​ក្រុង Oakland ផង​នោះ នៅ​ទូទាំង​ស្រុក Alameda រដ្ឋ California មាន​ពលរដ្ឋ​ខ្មែរ​អាមេរិកាំង​ប្រមាណ​៩៥០​នាក់​ បាន​ចុះ​ឈ្មោះ​បោះឆ្នោត​គិត​មក​ត្រឹម​ដើម​ខែ​កញ្ញា​នេះ។

អ្នកស្រី ហូ ម៉ាឡែនី មន្ត្រីបណ្តុះបណ្តាល​អ្នក​បោះឆ្នោត​ខ្មែរនិយាយ​ពីរ​ភាសា​នៃ​ការិយាល័យ​បោះឆ្នោត​ស្រុក Alameda ថ្លែង​ថា ចំនួន​អ្នក​ចុះ​ឈ្មោះ​បោះឆ្នោត​អាច​ខ្ពស់​ជាង​នេះ​ប្រសិន​បើ​មាន​សមាគម​ខ្មែរ​ដែល​ជួយ​សម្រួល​ដល់​កិច្ចការ​ទាក់ទង​អ្នក​បោះឆ្នោត។

អ្នកស្រី ហូ ម៉ាឡែនី អាយុ​២៦ ឆ្នាំ មន្ត្រី​បណ្តុះបណ្តាល​អ្នក​បោះឆ្នោត​ខ្មែរនិយាយ​ពីរ​ភាសា​នៃ​ការិយាល័យ​បោះឆ្នោត​ស្រុក Alameda ដែល​រួមបញ្ចូល​ក្រុង Oakland។ អ្នក​ស្រី​បាន​មក​រស់​នៅ​សហរដ្ឋ​អាមេរិក​កាល​ពី​៦​ឆ្នាំ​មុន។ (សឹង សុផាត/VOA)​
អ្នកស្រី ហូ ម៉ាឡែនី អាយុ​២៦ ឆ្នាំ មន្ត្រី​បណ្តុះបណ្តាល​អ្នក​បោះឆ្នោត​ខ្មែរនិយាយ​ពីរ​ភាសា​នៃ​ការិយាល័យ​បោះឆ្នោត​ស្រុក Alameda ដែល​រួមបញ្ចូល​ក្រុង Oakland។ អ្នក​ស្រី​បាន​មក​រស់​នៅ​សហរដ្ឋ​អាមេរិក​កាល​ពី​៦​ឆ្នាំ​មុន។ (សឹង សុផាត/VOA)​

មន្ត្រី​បណ្តុះបណ្តាល​ការបោះ​ឆ្នោត​ជា​ជនជាតិ​ខ្មែរ​អាយុ​២៦​ឆ្នាំ​រូប​នេះ​ពន្យល់​ប្រាប់ VOA យ៉ាង​ដូច្នេះ​ថា៖

«បើ​សិន​ជា​មាន​សមាគម​ខ្មែរ ​ឬ​មួយអង្គការ​មួយ​ដើម្បី​ជួយ​ប្រជាជន​ខ្មែរ​រស់​នៅ​សហរដ្ឋ​អាមេរិក​នេះ រឹត​តែ​ប្រសើរ ព្រោះ​អី ធម្មតា​ប្រសិន​បើ​មាន​សមាគម​មួយ ប្រជាជន​ខ្មែរ​នឹង​មក​ប្រមូល​ផ្តុះ​នៅ​សមាគមហ្នឹង ​ហើយ ពួក​ខ្ញុំ​អាច​ទៅ​ជួយ​ពន្យល់​គាត់។ហើយ​ខាង​សមាគម​ក៏​អាច​ជួយ​ពួក​ខ្ញុំ​ដែរ​ដើម្បី​ផ្សព្វផ្សាយ។»

អ្នកស្រី ហូ ម៉ាឡែនី ថ្លែង​ថា កិច្ចការ​របស់​អ្នក​នាង​មាន​ប្រសិទ្ធភាព​ជាង​នេះ​ពេល​ធ្វើ​ការ​ជាមួយ​នឹង​បណ្តា​សហគមន៍​ជនជាតិ​ផ្សេង​ទៀត​ដែល​មាន​សមាគម​រឹង​មាំ ដូច​ជា​សហគមន៍​ជនជាតិចិន ជនជាតិ​វៀតណាម​ ជនជាតិ​ហ្វីលីពីន និង​សហគមន៍​ Latino ដែល​និយាយ​ភាសា​អេស្ប៉ាញ។

«លឿន​ជាង។ ធម្មតា​ពួក​ខ្ញុំ​ទៅ​ទាក់ទង​ទាល់តែ​ទៅ​ទាក់ទង​នឹង​ប្រធាន​សមាគម។ បើ​សិន​ជា​អត់​មាន​សមាគម​អញ្ចឹង​ ពួក​ខ្ញុំ​មិន​ដឹង​ថា​ទាក់ទង​អ្នក​ណា​ទេ។ បើ​សិន​ជា​មាន​សមាគម​អញ្ចឹង ពួក​ខ្ញុំ​ដឹង​ថា​មាន​កម្មវិធី​អ្វី​មួយ​ដែល​ប្រជាជន​មក​ច្រើន ពួក​ខ្ញុំ​អាច​ទៅ​ជួយ​បាន‍»។​

មេដឹកនាំ​សហគមន៍​ខ្មែរ​នៅ​ក្រុង Oakland យល់​ស្រប​ថា អង្គការ​សហគមន៍​មាន​តួនាទី​សំខាន់​ក្នុង​ការ​ជួយ​ជំរុញ​ឲ្យ​ពលរដ្ឋ​ខ្មែរ​អាមេរិកាំង​ច្រើន​ជាង​មុន​បាន​ចូល​រួម​ក្នុង​ការ​បោះឆ្នោត​មូលដ្ឋាន​និង​បោះឆ្នោត​ប្រធានាធិបតី។

លោក អ៊ិន សួន អ្នក​ជំនាញ​ខាងជំងឺ​ផ្លូវ​ចិត្ត​និង​ជា​ប្រធាន​គណៈកម្មការ​វត្ត​ខ្មែរ​អូកឡិនដ៍​ឬ​ហៅ​វត្ត​ចាស់​ដែល​ត្រូវ​បាន​បំផ្លាញ​ដោយ​អគ្គីភ័យ​នោះ បាន​ថ្លែង​ប្រាប់ VOA ថា៖

«បើ​យើង​ប្រៀបធៀប​ទៅ​នឹង​ចិន​ទៅ​វៀតណាម គឺ​ចិន​និង​វៀតណាម​គេ​មាន​សមាគម​គេ​ច្រើន​ ហើយ​គេ​តែង​បង្កើត​កម្មវិធី​ជួប​ជុំ​គ្នា​ បងប្អូន ចិន​គេ​ដោយ​ឡែក វៀតណាម​គេ​ដោយ​ឡែក។ដូច្នេះ​គេ​បាន​ជួយ​ពង្រឹង​កម្មវិធី​ផ្សេងៗច្រើន គេ​មាន​មូលដ្ឋាន គេ​មាន​ទី​កន្លែង‍»។‍

លោក អ៊ិន សួន អ្នក​ជំនាញ​ខាងជំងឺ​ផ្លូវ​ចិត្ត​និង​ជា​ប្រធាន​គណៈកម្មាការ​វត្ត​ខ្មែរ​អូកឡិនដ៍ ផ្តល់​បទសម្ភាសន៍​ជាមួយ VOA នៅ​ក្រុង Oakland កាល​ពី​ថ្ងៃ​ទី​២៩ ខែ​សីហា ឆ្នាំ​២០១៦។ (សឹង សុផាត/VOA)
លោក អ៊ិន សួន អ្នក​ជំនាញ​ខាងជំងឺ​ផ្លូវ​ចិត្ត​និង​ជា​ប្រធាន​គណៈកម្មាការ​វត្ត​ខ្មែរ​អូកឡិនដ៍ ផ្តល់​បទសម្ភាសន៍​ជាមួយ VOA នៅ​ក្រុង Oakland កាល​ពី​ថ្ងៃ​ទី​២៩ ខែ​សីហា ឆ្នាំ​២០១៦។ (សឹង សុផាត/VOA)

ប្រធាន​គណៈកម្មការ​វត្ត​រូប​នេះ ​ដែល​ធ្លាប់​ជួយ​ពលរដ្ឋ​ខ្មែរ​ចុះ​ឈ្មោះ​បោះឆ្នោតប្រធានាធិបតី​កាល​ពី​ឆ្នាំ​២០១២ ថ្លែង​បន្ត​ដោយ​ក្រៀមក្រំ​ថា៖

«សម្រាប់​ខ្មែរ ជា​ពិសេស​ខ្លួន​ខ្ញុំ​ផ្ទាល់​ គឺ​កាល​ពី​ដើម​យើង​យក វត្ត​ហ្នឹង​ជា​សង្គម​ការងារ​ ជួយ​ដល់​ប្រជាពលរដ្ឋ​ខ្មែរ​ដែរ ពេល​ដែល​ខ្មែរ​មក​វត្ត​ទៅ ​មាន​ទី​ប្រឹក្សា​ក្រុង (Oakland) ​ទៅ​វត្ត​យើង ពន្យល់​យើង​អំពី​សិទ្ធិ។ សព្វ​ថ្ងៃ​ហ្នឹង​យើង​នៅ​ខ្វះ​ទី​កន្លែង​នៅ​ឡើយ‍»។‍

ចំពោះ​សមាគមអភិវឌ្ឍ​សហគមន៍​ខ្មែរ​វិញ​ នៅ​មុន​ការ​បិទ​ទ្វារ​របស់​ខ្លួន​នៅ​ឆ្នាំ​២០១១ សមាគម​នេះ​ធ្លាប់​មាន​កម្មវិធីផ្តល់​ព័ត៌មាន​អំពី​ការ​ចូល​សញ្ជាតិ​និងសិទ្ធិ​បោះឆ្នោតដល់​ជនជាតិ​ខ្មែរ។ នេះ​បើ​តាម​ប្រសាសន៍​របស់​អ្នក​ស្រី លី សំបូរ ​ស្ថាបនិកសមាគម​ដែល​បាន​បិទ​ទ្វារ​នេះ។

មេដឹកនាំ​សហគមន៍​រូប​នេះ ថ្លែង​ប្រាប់​ VOA ថា ​អ្នក​ស្រីជឿ​ថា នៅ​ពេល​នេះ​មាន​ពលរដ្ឋ​អាមេរិក​ដើម​កំណើត​ខ្មែរ​តិច​ជាង​មុន​ ដែល​បាន​ចុះ​ឈ្មោះ​បោះឆ្នោត​ ​ដោយសារពួក​គេ​ទទួល​បាន​ព័ត៌មាន​តិច​ជាង​មុន​ទាក់ទង​ដំណើរការ​នៃ​ការ​បោះឆ្នោត ក្រោយពេល​សមាគម​របស់​អ្នក​នាង​ត្រូវ​បង្ខំ​ចិត្ត​បិទ​ទ្វារ​កាល​ពី​ឆ្នាំ​២០១១។

«ក្រោយ​ពី​សមាគម​ខ្មែរ​យើងបិទ​ទ្វារ​ទៅ អត់​មាន​អ្នក​ណាជួយ​គាត់​ក្នុង​រឿង​រៀន​ដើម្បី​ទៅ​ប្រឡង​យក citizen (សញ្ជាតិ) ឬ​ចុះ​ឈ្មោះ​ដើម្បី​ធ្វើ​ការ​បោះ​ឆ្នោត ដូច្នេះ​យើង​ខ្វះ​ខាត​ខ្លាំង​ណាស់‍»។

អ្នកស្រី លី សំបូរ អ្នក​គ្រប់​គ្រងការ​បកប្រែ​នៃ​កម្មវិធី​សុខភាព​សម្រាប់​ជន​ភៀស​ខ្លួន​នៅមន្ទីរពេទ្យ​មួយ​នៅ​ស្រុក Alameda County និង​ជា​ស្ថាបនិក​នៃ​អតីតសមាគម​អភិវឌ្ឍន៍​សហគមន៍​ខ្មែរ Cambodian Community Development, Inc នៃ​ក្រុង Oakland ផ្តល់​បទ​សម្ភាសន៍​ជាមួយ VOA នៅ​ក្រុង San Leandro ជាយ​ក្រុង Oakland កាល​ពី​ថ្ងៃ​ទី​៣០ ខែ​សីហា ឆ្នាំ​២០១៦។ សមាគម​ខ្មែរ​នេះ​ត្រូវ​បាន​បិទឆ្នាំ​២០១១ មួយ​ផ្នែក​ដោយ​សារ​ការ​ខ្វះ​ថវិកា។ (សឹង សុផាត/VOA)
អ្នកស្រី លី សំបូរ អ្នក​គ្រប់​គ្រងការ​បកប្រែ​នៃ​កម្មវិធី​សុខភាព​សម្រាប់​ជន​ភៀស​ខ្លួន​នៅមន្ទីរពេទ្យ​មួយ​នៅ​ស្រុក Alameda County និង​ជា​ស្ថាបនិក​នៃ​អតីតសមាគម​អភិវឌ្ឍន៍​សហគមន៍​ខ្មែរ Cambodian Community Development, Inc នៃ​ក្រុង Oakland ផ្តល់​បទ​សម្ភាសន៍​ជាមួយ VOA នៅ​ក្រុង San Leandro ជាយ​ក្រុង Oakland កាល​ពី​ថ្ងៃ​ទី​៣០ ខែ​សីហា ឆ្នាំ​២០១៦។ សមាគម​ខ្មែរ​នេះ​ត្រូវ​បាន​បិទឆ្នាំ​២០១១ មួយ​ផ្នែក​ដោយ​សារ​ការ​ខ្វះ​ថវិកា។ (សឹង សុផាត/VOA)

អ្នក​ស្រី​ លី សំបូរ ពន្យល់​បន្ថែម​ទៀត​ថា ជន​អន្តោប្រវេសន៍​ខ្មែរ​ជា​ច្រើនដែល​រស់​នៅ​សហរដ្ឋ​អាមេរិក​អស់​ជា​ច្រើន​ទសវត្សរ៍​មក​ហើយ នៅ​តែ​មាន​ការ​រារែក​ក្នុង​ការ​ដាក់​ពាក្យ​ចូល​សញ្ជាតិ​ ដោយ​សារ​បញ្ហា​ភាសា​និង​ការ​ភ័យ​ខ្លាច​អំពី​កាតព្វកិច្ច​ផ្លូវ​ច្បាប់​នៅ​ប្រទេស​ថ្មី​នេះ ដូច​ជា​កាតព្វកិច្ច​ចូល​ធ្វើ​ជា​សមាជិក​ក្រុមប្រឹក្សា​ជំនុំ​ជម្រះ​របស់​តុលាការ ឬ​ហៅ​ថា jury duty ជា​ដើម។

អង្គការ​សហគមន៍​ដើរ​តួនាទី​សំខាន់ ​ជា​ពិសេស​ដើម្បី​ជួយ​ជន​អន្តោប្រវេសន៍​ខ្មែរ​អាច​សុំ​ចូល​សញ្ជាតិ​អាមេរិក និង​ស្វែង​យល់​អំពី​សិទ្ធិ​និង​ការ​ទទួល​ខុស​ត្រូវ​របស់​ពួក​គេ​ក្នុង​នាម​ជា​ពលរដ្ឋ​អាមេរិកាំង ដោយ​រួម​មាន​សិទ្ធិ​បោះឆ្នោត​ជា​ដើម។

ស្របគ្នា​ជាមួយ​នឹង​មេដឹកនាំ​សហគមន៍​ផ្សេង​ទៀត​ដែរ លោក អ៊ិន សួន និង​អ្នកស្រី លី សំបូរ ថ្លែង​ថា ពួក​គាត់​នឹងព្យាយាម​បន្ត​ជួយ​ជនជាតិ​ខ្មែរ​ចុះ​ឈ្មោះ​បោះឆ្នោត​តាមលទ្ធភាព​ផ្ទាល់​ខ្លួន​របស់​ពួក​គាត់។

ខណៈ​ដែលសហគមន៍​ខ្មែរ​នៅ​ក្រុង Oakland មិន​មាន​អង្គការ​សហគមន៍រឹងមាំ​នោះ មាន​អង្គការ​តូចដែល​ផ្តល់​សេវាសុខភាព​ផ្លូវចិត្ត​ដល់​ជនជាតិ​ខ្មែរ បាន​ជួយ​បំពេញ​តួនាទី​ជា​ស្ថាប័នជំរុញ​ពលរដ្ឋ​ខ្មែរ​ឲ្យ​បោះឆ្នោត​នៅ​តំបន់​ក្រុង Oakland។

ជា​ផ្នែក​មួយ​នៃ​បេសកកម្ម​សុខភាព​របស់​ខ្លួន មជ្ឈមណ្ឌល​លើកកម្ពស់​ស្ថានភាពជន​ភៀសខ្លួន​និង​ជន​អន្តោប្រវេសន៍ ឬ​ហៅ​កាត់​ថា​ CERI (Center for Empowering Refugees & Immigrants) ជួយផ្តល់​ព័ត៌មាន​អំពី​ការ​បោះឆ្នោត​នៅ​អាមេរិកដល់​ជនជាតិ​ខ្មែរ​ដែល​ជា​អតីត​ជន​រងគ្រោះ​ពី​របប​ខ្មែរក្រហម​ចំនួន​២០០​នាក់ ដែល​រស់​នៅ​តំបន់​ក្រុង Oakland។

មជ្ឈមណ្ឌល CERI ​នេះ ​ក៏​ធ្លាប់​បាន​ជួយ​អ្នកស្រី ខ្វាត់ សារឿន​ ឲ្យ​ចូល​រួម​បោះឆ្នោត​ប្រធានាធិបតី​កាល​ពី​ឆ្នាំ​២០០៨​ផង​ដែរ។

ពលរដ្ឋ​ខ្មែរ​អាមេរិកាំង​មួយ​រូប​ដែលកំពុង​ទទួលជំនួយ​ខាង​ការ​បោះឆ្នោតពី​អង្គការ CERI គឺ​លោក ឈីវ ឈី។

លោក​ជា​អតីត​ជន​រង​គ្រោះ​ពី​សម័យ​ខ្មែរ​ក្រហម​មួយ​រូប​ដែល​បាន​រស់​នៅ​ទី​ក្រុង Oakland តាំង​ពី​ឆ្នាំ​១៩៨២​ ហើយ​លោក ឈីវ ឈី ប្តេជ្ញា​ថា​នឹង​ចូល​រួម​ការ​បោះឆ្នោត​ប្រធានាធិបតី​នៅ​ក្នុង​ខែ​វិច្ឆិកា​ខាង​មុខ។

លោក ឈីវ ឈី អ្នក​ទទួល​សេវា​នៅ​អង្គការ CERI ផ្តល់​សេវា​សុខភាព​ផ្លូវ​ចិត្ត​សហគមន៍ដល់​អតីត​ជន​ភៀសខ្លួន ពរ​ចៅស្រី​របស់​លោក​ក្រោយ​ពី​ផ្តល់​បទ​សម្ភាសន៍​ជាមួយ VOA នៅ​ផ្ទះ​របស់​លោក​នៅ​ក្រុង Oakland កាល​ពី​ថ្ងៃ​ទី​៣១ ខែ​សីហា ឆ្នាំ​២០១៦។ លោក​ជា​អតីត​ជន​រងគ្រោះ​សម័យ​ខ្មែរ​ក្រហម​ដែល​មាន​ស្រុក​កំណើត​នៅ​ខេត្ត​កំពង់​ធំ ហើយ​បាន​មក​រស់​នៅ​ក្រុង​ Oakland តាំង​ពី​ឆ្នាំ​១៩៨២។ លោក ឈីវ ឈី ប្តេជ្ញា​ថា​នឹង​បោះឆ្នោត​នៅ​ក្នុង​ការ​បោះ​ឆ្នោត​ប្រធានាធិបតី​សហរដ្ឋ​អាមេរិក​នៅក្នុង​ខែ​វិច្ឆិកា​ខាង​មុខ។ (សឹង សុផាត/VOA)
លោក ឈីវ ឈី អ្នក​ទទួល​សេវា​នៅ​អង្គការ CERI ផ្តល់​សេវា​សុខភាព​ផ្លូវ​ចិត្ត​សហគមន៍ដល់​អតីត​ជន​ភៀសខ្លួន ពរ​ចៅស្រី​របស់​លោក​ក្រោយ​ពី​ផ្តល់​បទ​សម្ភាសន៍​ជាមួយ VOA នៅ​ផ្ទះ​របស់​លោក​នៅ​ក្រុង Oakland កាល​ពី​ថ្ងៃ​ទី​៣១ ខែ​សីហា ឆ្នាំ​២០១៦។ លោក​ជា​អតីត​ជន​រងគ្រោះ​សម័យ​ខ្មែរ​ក្រហម​ដែល​មាន​ស្រុក​កំណើត​នៅ​ខេត្ត​កំពង់​ធំ ហើយ​បាន​មក​រស់​នៅ​ក្រុង​ Oakland តាំង​ពី​ឆ្នាំ​១៩៨២។ លោក ឈីវ ឈី ប្តេជ្ញា​ថា​នឹង​បោះឆ្នោត​នៅ​ក្នុង​ការ​បោះ​ឆ្នោត​ប្រធានាធិបតី​សហរដ្ឋ​អាមេរិក​នៅក្នុង​ខែ​វិច្ឆិកា​ខាង​មុខ។ (សឹង សុផាត/VOA)

លោក​ថា ការ​បោះឆ្នោត​ជា​ករណីយកិច្ច​ពលរដ្ឋ​ដែល​លោក​បាន​សន្យា​ថា​ នឹង​បំពេញនៅ​ពេល​លោក​ស្បថ​ចូល​ជាសញ្ជាតិ​អាមេរិកាំង។

«ពេល​ដែល​យើង​និយាយ​ជាមួយ​ក្រសួង​អន្តោប្រវេសន៍​ច្បាស់​ណាស់យើង​បាន​ស្បថ​សច្ចាប្រណិធាន​ជាមួយ​គេ យើង​លើក​ដៃ​ស្តាំ មុន​នឹង​ឲ្យ​អង្គុយ ត្រូវ​ឈរ​ស្បថ​សិន​ អ្វីៗ​ដែល​ជា​ការពិត​សឹម​និយាយ អ្វី​ដែល​មិន​ការ​ពិត​មិន​អាច​និយាយ​បាន​ទេ។‍»

អ្នកស្រី Mona Afary នាយក​ប្រតិបត្តិ​នៃ​អង្គការ​ CERI នេះ ថ្លែង​ប្រាប់ VOA ថា ដូច​លោក ឈីវ ឈី ដែរ អ្នក​ទទួល​សេវា​ពី​អង្គការ​របស់​អ្នកស្រីផ្សេង​ទៀត​ មិន​ត្រឹម​តែ​ចូល​រួម​សកម្ម​ក្នុង​ការ​បោះឆ្នោត​ប្រធានាធិបតី​ប៉ុណ្ណោះ​ទេ ប៉ុន្តែ​ថែម​ទាំង​ចូល​រួម​នៅ​ក្នុង​ការ​បោះឆ្នោត​មូលដ្ឋាន​របស់​ក្រុងផង​ដែរ។

អ្នក​ស្រី​ពន្យល់​អំពី​ការ​ប្រែប្រួល​នៃ​ប្រធានបទកិច្ច​ពិភាក្សា​នៃ​អ្នក​ចូល​ទទួល​សេវា​អង្គការ​ CERI ក្នុង​អំឡុងពេល​ជិត​បោះឆ្នោត​ថា៖

«យើង​និយាយ​ពី​(ករណីយកិច្ច​ពលរដ្ឋ)​នៅ​ក្នុង​ការ​ពិភាក្សា​ជា​ក្រុម​របស់​ពួក​យើង។ យើង​មាន​ការ​ពិភាក្សា​ជា​ក្រុម​នេះ​ជា​រៀងរាល់​សប្តាហ៍ ហើយ​ការ​ពិភាក្សា​ទាំង​នេះ​មិន​ត្រឹម​ផ្តោត​តែ​លើ​បញ្ហា​ផ្លូវ​ចិត្ត​ប៉ុណ្ណោះ​ទេ។ ក្នុង​ពេល​បច្ចុប្បន្ន​នេះ [ជិត​ពេល​បោះឆ្នោត] យើង​ផ្តោត​ទៅ​លើ​ការ​បោះឆ្នោត​មួយ​រយៈ​សិន‍»។

អ្នកស្រី Mona Afary, នាយក​ប្រតិបត្តិ​នៃមជ្ឈមណ្ឌល​លើកកម្ពស់​ស្ថានភាពជន​ភៀសខ្លួន​និង​ជន​អន្តោប្រវេសន៍ Center for Empowering Refugees & Immigrants (CERI) នៅ​ទី​ក្រុង Oakland រដ្ឋ​ កាលីហ្វ័រញ៉ា នៅ​មុន​ផ្តល់​សម្ភាសន៍​នៅ​ការិយាល័យ​នៅ​ក្រុង Oakland កាល​ពី​ថ្ងៃ​ទី​៧ ខែ​កញ្ញា ឆ្នាំ​២០១៦។ (សឹង​ សុផាត/VOA)
អ្នកស្រី Mona Afary, នាយក​ប្រតិបត្តិ​នៃមជ្ឈមណ្ឌល​លើកកម្ពស់​ស្ថានភាពជន​ភៀសខ្លួន​និង​ជន​អន្តោប្រវេសន៍ Center for Empowering Refugees & Immigrants (CERI) នៅ​ទី​ក្រុង Oakland រដ្ឋ​ កាលីហ្វ័រញ៉ា នៅ​មុន​ផ្តល់​សម្ភាសន៍​នៅ​ការិយាល័យ​នៅ​ក្រុង Oakland កាល​ពី​ថ្ងៃ​ទី​៧ ខែ​កញ្ញា ឆ្នាំ​២០១៦។ (សឹង​ សុផាត/VOA)

ប៉ុន្តែ​អ្នកស្រី Mona Afary ថ្លែង​ថា ​អង្គការ CERI របស់​អ្នកស្រីគ្រាន់​តែ​ជា​ដំណោះស្រាយ​រយៈ​ពេល​ខ្លី​ប៉ុណ្ណោះសម្រាប់ជួយ​ជំរុញ​ឲ្យ​ពលរដ្ឋ​ខ្មែរ​នៅ​ក្រុង Oakland បាន​ចូលរួម​ការបោះឆ្នោតនៅ​អាមេរិក។ អ្នកស្រី​សង្ឃឹម​ថា នឹង​មាន​ការ​បង្កើត​អង្គការ​សហគមន៍​ខ្មែរ​ដែល​មាន​ទ្រង់ទ្រាយ​ធំ​ជាង​នេះ​ដើម្បី​អាចជួយ​ដល់​កិច្ចការ​បោះឆ្នោត​ឲ្យ​បាន​ទូលំទូលាយ​ជាង​នេះ។

សម្រាប់​អ្នកស្រី ខ្វាត់ សារឿន ការ​រង់ចាំ​ដំណោះស្រាយ​យូរ​អង្វែង​បែប​នេះគឺ​យូរ​ពេក​ហើយ។

ដោយ​អ្នក​ស្រី​ទទួល​បាន​ការ​លើក​ទឹក​ចិត្ត​និង​ជំនួយ​ខាង​ភាសានិង​បច្ចេកទេស​ពី​អ្នកស្រី លី សំបូរ និង​អ្នក​ស្រី ហូ ម៉ាឡែនី​ ផង​នោះ អ្នក​ស្រី ខ្វាត់ សារឿន និង​ពលរដ្ឋ​ខ្មែរ​អាមេរិកាំង​វ័យ​ចំណាស់​មួយ​ចំនួន​ទៀត​បាន​ចុះ​ឈ្មោះ​បោះឆ្នោត នៅ​ប៉ុន្មាន​ថ្ងៃ​បន្ទាប់​ពី​នោះ៕

XS
SM
MD
LG