ភ្ជាប់​ទៅ​គេហទំព័រ​ទាក់ទង

ក្រសួង​ការងារ​ថ្កោលទោស​លោក​សម រង្ស៊ី​ ថា​ឃោសនា​បោកប្រាស់

  • ម៉ែន គឹមសេង

រូបឯកសារ៖ លោក សម រង្ស៊ី អតីតប្រធាន​គណបក្ស​សង្គ្រោះជាតិ ថ្លែង​ទៅកាន់​អ្នក​សារព័ត៌មាន ពេល​ដែល​លោក​បាន​មក​ដល់​អាកាសយានដ្ឋាន​អន្តរជាតិ​ភ្នំពេញ កាលពីថ្ងៃទី១៦ ខែសីហា ឆ្នាំ២០១៥។

សេចក្តី​ប្រកាស​ព័ត៌មាន​របស់​ក្រសួង​ការងារ​ដែល​ចេញផ្សាយ​​នៅ​យប់ថ្ងៃ​ពុធ បាន​«ថ្កោល​ទោស​យ៉ាង​ដាច់​អហង្ការ​»​ ចំពោះ​សារ​របស់​លោក​ សម រង្ស៊ី​ និង​ចាត់​ទុក​ថា​ជា​ការ​«ឃោសនា​បោកប្រាស់‍»។

រាជរដ្ឋាភិបាល​កម្ពុជា​បាន​បញ្ចេញ​ប្រតិកម្ម​តប​នឹង​សារ​វីដេអូ​របស់​លោក​ សម រង្ស៊ី អតីត​ប្រធាន​គណបក្ស​សង្គ្រោះ​ជាតិ ​ដែល​បាន​រិះគន់​អាជ្ញាធរ ​និង​ថៅកែ​រោងចក្រ​ថា មិន​បាន​សម្រួល​ឱ្យ​កម្មករ​មាន​ពេល​វេលា​គ្រប់គ្រាន់​ទៅ​បោះឆ្នោតជ្រើសរើស​ក្រុម​ប្រឹក្សា​ឃុំ-សង្កាត់។

នៅក្នុង​សារ​ដែល​បាន​បង្ហោះ​តាម​ហ្វេសប៊ុក​ផ្ទាល់ខ្លួន​កាលពីថ្ងៃ​ទី​៣០ ខែឧសភា​នោះ ​លោក​ សម រង្ស៊ី​ ក៏​បាន​ស្នើ​សុំ​ឱ្យ​កម្មករ-កម្មការិនី​ ហ៊ាន​លះបង់​ពេល​វេលា​ និង​ថវិកា​ដើម្បី​បាន​ទៅ​បោះឆ្នោត​ឱ្យ​មាន​ការផ្លាស់ប្តូរ​ និង​លើក​កម្ពស់​ជីវភាព​របស់​ពួកគេ។

សេចក្តី​ប្រកាស​ព័ត៌មាន​របស់​ក្រសួង​ការងារ​ដែល​ចេញផ្សាយនៅ​យប់ថ្ងៃ​ពុធ បាន​«ថ្កោល​ទោស​យ៉ាង​ដាច់​អហង្ការ​»​ ចំពោះ​សារ​របស់​លោក​ សម រង្ស៊ី​ និង​ចាត់​ទុក​ថា​ជា​ការ​«ឃោសនា​បោកប្រាស់‍»។

ក្រសួង​ការងារ​ក៏បាន​ដាក់​ការ​ទទួល​ខុសត្រូវ​ទៅ​គណៈកម្មាធិការ​ជាតិ​រៀបចំ​ការ​បោះឆ្នោត​ និង​ច្បាប់​បោះឆ្នោត​ដែល​បង្កើត​ឡើង​ដោយ​គណបក្ស​ប្រជាជន​កម្ពុជា ​និង​គណបក្ស​សង្គ្រោះ​ជាតិ​វិញ​ថា ​ជា​«ស្ថាប័ន​ឯករាជ្យ ​និង​អព្យាក្រិត​តែមួយ​គត់​ដែល​មាន​សិទ្ធិ​ចាត់​ចែង​ រៀបចំ​និង​គ្រប់គ្រង​ការ​បោះឆ្នោត​នៅ​កម្ពុជា‍»។​

សេចក្តី​ប្រកាស​របស់​ក្រសួង​បាន​ពន្យល់​ថា ​ទាំង​ច្បាប់​ស្តីពី​ការ​បោះឆ្នោត​ជ្រើសរើស​ក្រុម​ប្រឹក្សា​ឃុំ សង្កាត់​ ច្បាប់​ស្តីពី​ការ​រៀបចំ​ និង​ការ​ប្រព្រឹត្ត​ទៅ​នៃ​គណៈកម្មាធិការ​ជាតិ​រៀបចំ​ការបោះឆ្នោត ​ទាំង​សមាសភាព​នៃ​ថ្នាក់​ដឹកនាំ​ និង​សមាជិក​នៃ​គណៈកម្មាធិការ​ជាតិ​រៀបចំ​ការ​បោះឆ្នោត​ គឺ​ជា«ផ្លែផ្កា​នៃ​ការ​ពិភាក្សា​លម្អិត​រវាង​គណបក្ស​ប្រជាជន​កម្ពុជា​ និង​គណបក្ស​សង្គ្រោះ​ជាតិ។

សារ​របស់​ក្រសួង​ការងារ​បន្ត​ថា៖

«ច្បាប់​នេះ​ត្រូវ​បាន​សាទរ ​និង​ទទួល​យក​ដោយ​សមាជិក​សភា​នៃ​គណបក្ស​ទាំង២​ ក្នុង​នោះ​ក៏​មាន​ទណ្ឌិត សម រង្ស៊ី​ ដែល​ជា​អតីត​ប្រធាន​គណបក្ស​សង្គ្រោះ​ជាតិ​នា​គ្រា​នោះ​ផង​ដែរ។ ប្រសិន​បើ​ទណ្ឌិត​ សម រង្ស៊ី​ ពិតជា​ចង់​ឱ្យ​កម្មករ​និយោជិត​ត្រឡប់​ទៅ​ចុះ​ឈ្មោះ​ និង​បោះឆ្នោត​នៅស្រុក​កំណើត​របស់​ខ្លួន​ពិតមែន ​ហេតុអ្វី​បាន​ជា​ពេល​នោះ​ទណ្ឌិត​រូប​នេះ​មិន​ស្នើ​ឱ្យ​មានការ​កំណត់​ចំនួន​ថ្ងៃ​ឈប់​សម្រាក​តែ​ម្តង​ទៅ?‍»

នៅ​ក្នុង​សារ​ជា​វីដេអូ​ដែល​នាំ​ឱ្យ​មាន​ការ​ខឹង​សម្បារ ​និង​ប្រើ​ពាក្យ​សម្តី​ធ្ងន់ៗ​ពី​រាជរដ្ឋាភិបាល​កម្ពុជា​នេះ​ លោក​ សម រង្ស៊ី បាន​រំលឹក​ដល់​ការ​តស៊ូ​របស់​លោក​ជាមួយ​នឹង​អតីត​ប្រធាន​សហជីព​កម្មករ​គឺ​លោក ជា វិជ្ជា ​ដែល​ទទួល​ការ​គោរព​យ៉ាង​ច្រើន​ពី​កម្មករ​ ក្នុង​ការទាមទារ​ប្រាក់​ខែ​ និង​សិទ្ធិ​សេរីភាព​របស់​កម្មករ​រហូត​ដល់​លោក ​ជា វិជ្ជា ត្រូវ​បាន​ឃាតករ​បាញ់​សម្លាប់។ ហើយ​បើទោះ​បី​ជា​មាន​ការតស៊ូ​ទាមទារ​ដូច​នេះ​ក៏​ប្រាក់​ខែ​កម្មករ​មិន​បាន​ច្រើន​ធៀប​នឹង​តម្លៃ​ទំនិញ​ទីផ្សារ ​និង​ប្រទេស​ជិតខាង។

លោក សម រង្ស៊ី​ បាន​បន្ថែមថា៖

«សង្គម​សព្វថ្ងៃ​ពោពេញ​ទៅ​ដោយ​អំពើ​ពុករលួយ​ អំពើ​អយុត្តិធម៌ ​និង​ការ​ជិះជាន់​កេង​ប្រវ័ញ្ច​ញើស​ឈាម​ពី​សំណាក់​អ្នក​មាន​អំណាច ​និង​អ្នក​មាន​លុយ​មក​លើ​ប្រជារាស្ត្រ​ទន់ខ្សោយ និង​ប្រជារាស្រ្ត​ក្រីក្រ ​ដូច​កម្មករ ​និង​ក្រុម​គ្រួសារ​កម្មករ‍។ យ៉ាងដូច្នេះ​ហើយ​បាន​ជា​កម្មករ​កម្មការិនី​ជាង​៧សែន​នាក់​នៅប្រទេស​កម្ពុជា​ ត្រូវ​គេ​ជិះជាន់​កេងប្រវ័ញ្ច​ញើសឈាម​តាម​តែ​អំពើ​ចិត្ត​របស់​គេ។ គេ​នៅតែ​បន្ទាប​ប្រាក់​ខែ​កម្មករ​ឱ្យ​នៅ​កម្រិត​ទាប​ជានិច្ច​ប្រៀបធៀប​ទៅនឹង​ប្រាក់​ចំណេញ​របស់​គេ»។

ប៉ុន្តែ ក្រសួង​ការងារ​បាន​លើកឡើង​ពី​ការ​ខិតខំ​ប្រឹងប្រែង​ដើម្បី​ឱ្យ​បាន​ប្រាក់​ខែ​ខ្ពស់​ដល់​កម្មករ ​និង​ចាត់​ទុក​សកម្មភាព​របស់​លោក​ សម រង្ស៊ី​ និង​ក្រុមបក្ស​ពួក​ថា «មិនយល់‍»ពី​ការងារ​របស់​រដ្ឋាភិបាល​ និង​ធ្វើ​សកម្មភាព​«ញុះញ៉ង់‍» ដែល​មិន​អាច​អត់​ឱនឱ្យ​បាន។

​លោក​ សម រង្ស៊ី​ កំពុង​តែ​រស់នៅ​នីរទេស​ខ្លួន​នៅ​ប្រទេស​បារាំង​ ប៉ុន្តែ​សារ​នយោបាយ​របស់​លោក​ដែល​បង្ហោះ​តាម​ទំព័រ​ហ្វេសប៊ុក​ផ្ទាល់​ខ្លួន​នៅតែ​មាន​ឥទ្ធិពល ​និង​មាន​អ្នក​គាំទ្រ​ជាច្រើន។

គណបក្ស​ប្រជាជន​កម្ពុជា ​និង​គណបក្ស​សង្គ្រោះ​ជាតិ​ មាន​កម្លាំង​ប្រហាក់​ប្រហែល​គ្នា​ក្នុងការ​បោះឆ្នោត​ក្រុមប្រឹក្សា​ឃុំ សង្កាត់​ ដែល​នឹង​ប្រព្រឹត្ត​ទៅ​នៅ​ថ្ងៃ​អាទិត្យ​ ទី​៤ ខែមិថុនា​ខាង​មុខ​នេះ៕

XS
SM
MD
LG