កាលពីថ្ងៃព្រហស្បតិ៍ ប្រទេសអ៊ុយក្រែនហាក់ដូចជាបានបើកធ្វើប្រតិបត្តិការវាយបក ដែលគេរង់ចាំយូរមកហើយ ដើម្បីយកមកវិញនូវផ្ទៃដីក្នុងផ្នែកខាងកើតនិងខាងត្បូងប្រទេសដែលរុស្ស៊ីបានក្តាប់យកកាលពីសប្តាហ៍ដំបូងៗនៃសង្គ្រាមដែលមានរយៈពេលជាងមួយឆ្នាំមកហើយនេះ។
រដ្ឋាភិបាលក្រុងកៀវមិនបានប្រកាសអំពីចលនារបស់ខ្លួននៅលើសមរភូមិទេ តែកងកម្លាំងអ៊ុយក្រែនបានបើកការវាយប្រហារដ៏ធំមួយ ដោយប្រើកងរថក្រោះនិងរថពាសដែកក្នុងតំបន់ Zaporizhzhia នាប៉ែកខាងត្បូងប្រទេស។ រុស្ស៊ីបាននិយាយថា ខ្លួនបានទប់ស្កាត់ការរុលទៅមុខដំបូងៗរបស់អ៊ុយក្រែន ដោយរក្សាស្ថានភាពដែនដីឱ្យមាននៅដូចដើម។
មន្ត្រីអ៊ុយក្រែនបាននិយាយច្រើនខែមកហើយអំពីការវាយបក នៅពេលពួកគេបានប្រមែប្រមូលកងឯកភាពហ្វឹកហ្វឺនដោយបណ្តាប្រទេសលោកខាងលិច ហើយនៅពេលដែលពួកគេបានទទួលអាវុធថ្មីៗពីសហរដ្ឋអាមេរិក និងសម្ព័ន្ធមិត្តអឺរ៉ុប។ កាលពីប៉ុន្មានថ្ងៃមុននេះ រុស្ស៊ីបានរាយការណ៍ថា អ៊ុយក្រែនបានវាយប្រហារលើខ្សែត្រៀមជួរមុខរបស់ក្រុមទាហានរដ្ឋាភិបាលមូស្គូ នៅផ្នែកខាងកើតនិងខាងត្បូងដោយមានការប្រយុទ្ធគ្នាដ៏ខ្លាំងក្លា។
អ៊ុយក្រែនអាចមានទាក់ទិននឹងការប្រឹងប្រែងច្រើនខែមកហើយដើម្បីវាយយកមកវិញនូវដែនដី ២០% នៃប្រទេសខ្លួន ដែលត្រួតត្រាដោយរុស្ស៊ី។
ទិសដៅមួយនៃការវាយប្រហារទំនងជារុលទៅខាងត្បូងទៅកាន់សមុទ្រ Azov ដែលជាការប្រឹងប្រែងមួយ ដើម្បីបំផ្លាញស្ពានមួយភ្ជាប់ដីគោករបស់រុស្ស៊ីជាមួយឧបទ្វីប Crimea ដែលរដ្ឋាភិបាលមូស្គូបានក្តាប់យកកាលពីឆ្នាំ ២០១៤ ហើយដែលជាមូលដ្ឋានសំខាន់មួយសម្រាប់កិច្ចប្រតិបត្តិការយោធាកំពុងដំណើរការនេះ៕
ព័ត៌មានខ្លះនៅក្នុងសេចក្តីរាយការណ៍នេះដកស្រង់មកពីទីភ្នាក់ងារសារព័ត៌មាន AP, Reutersនិង AFP
