ប្រទេសរុស្ស៊ីបាននិយាយកាលពីថ្ងៃពុធថា វាជាឆាប់ពេកហើយដែលខ្លួនមិនទាន់អាចនិយាយឲ្យច្បាស់អំពីសំណើរបស់លោកប្រធានាធិបតី Joe Bidenក្នុងការជួបលោកប្រធានាធិបតី Putin ទេហើយវិមានក្រឹមឡាំងបានប្រាប់ទីក្រុងវ៉ាស៊ីនតោនថា មិនត្រូវដាក់ទណ្ឌកម្មថ្មីណាទៅលើទីក្រុងមូស្គូទេ។ នេះបើយោងតាមទីភ្នាក់ងារសារព័ត៌មានRIA។
នៅក្នុងការហៅតាមទូរស័ព្ទកាលពីថ្ងៃអង្គារលោកBiden បានស្នើឱ្យមានកិច្ចប្រជុំកំពូលដើម្បីដោះស្រាយជម្លោះ ហើយបានប្រាប់ឲ្យរដ្ឋាភិបាលក្រុងមូស្គូឲ្យបន្ថយភាពតានតឹងនៅអ៊ុយក្រែន ដែលបង្កឡើងដោយកំណើនយោធារុស្ស៊ី។
ចំណងទាក់ទងរបស់រដ្ឋាភិបាលក្រុងមូស្គូជាមួយសហរដ្ឋអាមេរិកបានធ្លាក់ចុះដល់កម្រិតទាបថ្មីក្រោយសង្គ្រាមត្រជាក់កាលពីខែមុន បន្ទាប់ពីលោក Biden បាននិយាយថា លោកគិតថាលោក Putin ជា«ឃាតករ» ហើយទីក្រុងមូស្គូបានកោះហៅឯកអគ្គរដ្ឋទូតរបស់ខ្លួនប្រចាំនៅទីក្រុងវ៉ាស៊ីនតោនទៅពិគ្រោះយោបល់។ ជិតមួយខែក្រោយមក ឯកអគ្គរដ្ឋទូតរូបនេះនៅតែមិនទាន់វិលត្រឡប់មកវិញ។
អ្នកនាំពាក្យរដ្ឋាភិបាលវិមានក្រឹមឡាំងលោក Dmitry Peskovបានប្រាប់អ្នកយកព័ត៌មានថា៖«វាឆាប់ពេក មិនទាន់អាចនិយាយអំពីជំនួបនេះទេ។ វាជាសំណើថ្មី ហើយវានឹងត្រូវសិក្សា»។លោកបន្ថែមថា បញ្ហានេះនឹងត្រូវពិភាក្សាបន្ថែមទៀតតាមរយៈបណ្តាញការទូត។ ភាគីទាំងពីរមិនទាន់មានគម្រោងរៀបចំប្រធានបទជាច្រើនដែលត្រូវពិភាក្សានៅឡើយទេ ហើយក៏មិនទាន់មានការរៀបចំសម្រាប់កិច្ចប្រជុំនេះដែរ។
ដោយឡែក លោក Yuri Ushakov ទីប្រឹក្សាគោលនយោបាយការបរទេសរបស់ Putin បានអញ្ជើញលោកJohn Sullivanឯកអគ្គរដ្ឋទូតសហរដ្ឋអាមេរិកប្រចាំនៅទីក្រុងមូស្គូដើម្បីពិភាក្សាកាលពីថ្ងៃពុធ។ នេះបើយោងតាមក្រសួងការបរទេសរុស្ស៊ី។
លោក Ushakov បានប្រាប់លោកឯកអគ្គរដ្ឋទូតថាទីក្រុងមូស្គូនឹងធ្វើសកម្មភាពដាច់ខាត ប្រ សិនបើសហរដ្ឋអាមេរិកចាត់វិធានការអមិត្តថ្មីដូចជាដាក់ទណ្ឌកម្មជាដើម។ ស្ថានទូតសហរដ្ឋអាមេរិកនៅទីក្រុងមូស្គូមិនបានឆ្លើយតបភ្លាមៗទៅកាន់សំណើសុំការអត្ថាធិប្បាយអំពីការពិភាក្សាទាំងនោះទេ៕
