ប្រទេសកូរ៉េខាងជើង និងកូរ៉េខាងត្បូងនឹងបើកការិយាល័យទំនាក់ទំនងរួមគ្នាមួយនៅថ្ងៃសុក្រខាងមុខនេះ ដើម្បីជំរុញឲ្យមានទំនាក់ទំនងឆ្លងព្រំដែន។
ក្រសួងបង្រួបបង្រួមកូរ៉េទាំងពីរនៃប្រទេសកូរ៉េខាងត្បូងបានប្រកាសនៅថ្ងៃពុធនេះថា ការិយាល័យថ្មីនេះនឹងត្រូវបើកដំណើរការនៅក្នុងទីក្រុង Kaesong ប្រទេសកូរ៉េខាងជើង ដែលស្ថិតនៅជិតព្រំដែនរវាងប្រទេសទាំងពីរ។
ក្រសួងនេះបានបញ្ជាក់ទៀតថា ការិយាល័យទំនាក់ទំនងនេះនឹងក្លាយជា «បណ្ដាញប្រឹក្សា និងទំនាក់ទំនង ២៤ ម៉ោងលើ ២៤ ម៉ោង» ដើម្បី «បន្ធូរបន្ថយភាពតានតឹងយោធា និងកសាងសន្តិភាពនៅលើឧបទ្វីបកូរ៉េ»។
ប្រទេសទាំងពីរនឹងដាក់មន្ត្រីរបស់ខ្លួនរហូតដល់ ២០ នាក់ ដើម្បីធ្វើការក្នុងការិយាល័យទំនាក់ទំនងនេះ។
គំនិតនៃការបង្កើតការិយាល័យនេះឡើង គឺកើតចេញពីកិច្ចប្រជុំរវាងមេដឹកនាំកូរ៉េខាងជើងលោក Kim Jong Un និងប្រធានាធិបតីកូរ៉េខាងត្បូងលោក Moon Jae In កាលពីខែមេសា។
ការិយាល័យនេះគ្រោងនឹងបង្កើតឡើងតាំងពីខែមុនម្ល៉េះ ប៉ុន្តែត្រូវបានពន្យារពេលដោយសារតែស្ថានភាពជាប់គាំងរវាងកូរ៉េខាងជើង និងសហរដ្ឋអាមេរិកពាក់ព័ន្ធនឹងល្បឿននៃការលុបចោលកម្មវិធីនុយក្លេអ៊ែររបស់កូរ៉េខាងជើង ដែលនេះជាការសន្យារបស់លោក Kim Jong Un នៅក្នុងកិច្ចប្រជុំជាមួយនឹងប្រធានាធិបតីអាមេរិកលោក Donald Trump នៅក្នុងប្រទេសសិង្ហបុរី កាលពីខែមិថុនាកន្លងទៅនេះ។
ស្ថានការណ៍នេះមានភាពប្រសើរឡើងវិញ បន្ទាប់ពីគណៈប្រតិភូកូរ៉េខាងត្បូងបានធ្វើដំណើរទៅជួបជាមួយនឹងលោក Kim Jong Un នៅក្នុងទីក្រុងព្យុងយ៉ាងកាលពីសប្ដាហ៍មុន ដែលនៅពេលនោះលោក Kim Jong Un បានផ្ញើលិខិតមួយច្បាប់ទៅឲ្យលោក Trump ស្នើសុំជួបពិភាក្សាជាលើកទីពីរ៕
