ភ្ជាប់​ទៅ​គេហទំព័រ​ទាក់ទង

ពលរដ្ឋ​ខេត្ត​កោះកុង​គ្រោង​ហែ​ក្បួន​ទ្រង់ទ្រាយ​ធំ​ តវ៉ា​ក្នុង​ជម្លោះ​ដីធ្លី​ជាមួយ​ក្រុមហ៊ុន​ឯកជន​


រូប​ឯកសារ៖ ស្ត្រី​ម្នាក់​នៅ​ខេត្ត​កោះកុង​កាល​ពី​ថ្ងៃ​ទី​៧ ខែ​តុលា ឆ្នាំ​២០១២។

ប្រជាពលរដ្ឋ​ប្រមាណ​ ៥២៦​គ្រួសារ​កំពុង​ជាប់​គាំង​​នៅ​ក្នុង​ជម្លោះ​ដី​ធ្លី​នេះ។​

ប្រជាពលរដ្ឋ​ប្រមាណ​៥០០​នាក់​មក​ពី​ស្រុក​ចំនួនពីរ​នៅ​ក្នុង​ខេត្ត​កោះកុង គ្រោង​នឹង​ធ្វើការ​ហែ​ក្បួន​ដោយ​ម៉ូតូយកញត្តិ​ទៅ​ដាក់​នៅ​សាលាស្រុក​ចំនួន​ពីរ​ ដើម្បីទាមទារ​ដីធ្លី​ និង​សំណង​ខូច​ខាត​ពី​ក្រុម​ហ៊ុន​អភិវឌ្ឍន៍​ឯកជន​ដែល​កំពុងដាំ​ដំណាំ​អំពៅ​នៅ​លើ​ដី​របស់​ពួកគេ។​ នេះ​បើ​យោង​ទៅ​តាម​ការ​បញ្ជាក់ពី​មន្ត្រី​ការពារ​សិទ្ធិ​មនុស្ស​ និង​តំណាង​ប្រជាពលរដ្ឋ​ក្នុង​ខេត្ត​កោះកុង​នា​ថ្ងៃ​អង្គារ​នេះ។

ផែនការ​ហែ​ក្បួន​ដោយ​ម៉ូតូ​ចំនួន​២៥០​គ្រឿង​ ដោយ​មាន​មនុស្ស​ប្រមាណ​៥០០នាក់​ចូលរួម​នេះ​ កើត​មាន បន្ទាប់​ពី​អាជ្ញាធរ​ខេត្ត​ និង​ក្រុមហ៊ុន​ មិន​ព្រម​រក​ដំណោះ​ស្រាយបញ្ចប់​វិវាទ​ដីធ្លី​ទំហំ​២២៣៨.៧​ហិកតា​ ដែល​បាន​អូស​បន្លាយ​តាំង​ពី​ឆ្នាំ​ ២០០៦​មក។

ប្រជាពលរដ្ឋ​ប្រមាណ​ ៥២៦​គ្រួសារ​កំពុង​ជាប់​គាំងនៅ​ក្នុង​ជម្លោះ​ដី​ធ្លី​នេះ។​

លោក​ អ៊ិន គង់​ជិត​ មន្ត្រី​ការពារ​សិទ្ធិ​មនុស្ស​លីកាដូ​ប្រចាំ​ខេត្ត​កោះ​កុង​ បាន​ប្រាប់​ VOA​ ថា​ អាជ្ញាធរ​មាន​សមត្ថកិច្ច​ មិន​ត្រូវ​រារាំង​ការ​ហែ​ក្បួន​ដែល​នឹង​ត្រូវ​ធ្វើ​ឡើង​ដោយ​សន្តិវិធី​ និង​មិន​ប៉ះពាល់​ដល់​ប្រយោជន៍​បុគ្គល​ណាមួយ ឬ​ក៏​រំខាន​ដល់​សាធារណៈ​ជន​នោះ​ឡើយ។

លោក​និយាយ​ថា​ អាជ្ញាធរ​ខេត្ត​ត្រូវ​រួសរាន់​ចាត់​ក្រុម​ការងារ​មួយ​ដើម្បី​បើក​ការស្រាវជ្រាវ​លើ​ចំនួន​គ្រួសារ​ និង​ផ្ទៃ​ដី ដើម្បី​បញ្ចប់​ជម្លោះ​ដី​ធ្លីដ៏​រ៉ាំរ៉ៃ​នេះ​ឲ្យ​បាន​ឆាប់។​

លោក​ អ៊ិន គង់ជិត​ ឲ្យ​ដឹង​ទៀត​ថា​ នៅ​ក្នុង​រយៈពេល​១០​ឆ្នាំ​មក​នេះ​ ប្រជាពលរដ្ឋ​កំពុង​ធ្លាក់​ខ្លួន​រស់​នៅ​ក្នុង​ភាព​ក្រីក្រ​ ដោយសារ​ការ​បាត់​បង់​ដី​ស្រែ​ចម្ការ​សម្រាប់​បង្ក​បង្កើន​ផល។​

«ក្នុង​រយៈពេល​១០​ឆ្នាំនេះ​ អ្នក​ដែល​បាត់​បង់​ដីធ្លី​ទាំង​នោះ ​បាន​ធ្លាក់​ទៅ​ក្នុង​ស្ថានភាព​មួយ​ ក្រីក្រ​លំបាក​តោកយ៉ាក​ ហើយ​ធ្វើ​ចំណាកស្រុក​ ហើយ​ធ្លាក់​ ធ្លាក់​ខ្លួន​ជា​ជន​ក្រីក្រ​ហ្មង​បាទ»។​

មន្ត្រី​ការពារ​សិទ្ធិ​មនុស្ស​រូប​នេះ​ បន្ថែម​ថា ​ទំនាស់​នេះ​បាន​កើតឡើង​តាំង​ពី​ខែ​សីហា​ ឆ្នាំ​ ២០០៦​ គឺ​នៅ​ក្នុង​ពេល​ក្រសួង​កសិកម្ម​ រុក្ខា​ប្រមាញ់​ និង​នេសាទ​ បាន​រឹបអូស​ដី​ប្រជាពលរដ្ឋ​នៅ​ក្នុង​ស្រុក​ស្រែ​អំបិល​ និង​ស្រុក​បុទុមសាគរឲ្យ​ទៅក្រុម​ហ៊ុន​ផលិត​ស្ករ​អំពៅ​ចំនួន​ពីរ​ គឺ​ក្រុមហ៊ុន​ កោះ​កុង​ស៊ូហ្គើរ​ និង​កោះកុង​ផ្លេន​ថេស៊ិន​ អ៊ិន​ដាស្ទ្រី​ខមភេនី​លីមីធីត។

លោក​ថ្លែង​ថា​ ក្រុម​ហ៊ុន​ទាំង​ពីរ​បាន​ទទួល​ដី​សម្បទាន​សេដ្ឋកិច្ច​ពី​រដ្ឋាភិបាល​ចំនួន​១៩១០០​ ហិកតា។​ ផ្ទៃ​ដី​ទំហំ​២២៣៨.៧ ហិកតា ​ដែល​ប្រជាពលរដ្ឋ​មក​ពីស្រុក​ទាំង​ពីរកំពុង​ទាមទារ​នេះ គឺ​ស្ថិត​នៅ​ក្នុង​ដីសម្បទាន​សេដ្ឋកិច្ច​ដែល​រដ្ឋាភិបាល​បាន​ប្រគល់​ជូន​ទៅ​ឲ្យ​ក្រុមហ៊ុន។​ ​

សំណើ​របស់​ប្រជាពលរដ្ឋ​ដែល​បាន​ជូន​ទៅ​កាន់​អភិបាល​ខេត្ត​កោះ​កុង​កាល​ពី​សប្តាហ៍​មុន​នេះ​ដើម្បី​ធ្វើ​ការ​ហែ​ក្បួន​ បាន​ឲ្យ​ដឹង​ថា​ ក្រុម​អ្នក​តវ៉ា​ នឹង​ជួបជុំ​គ្នា​នៅ​ផ្ទះ​តំណាង​ប្រជាពលរដ្ឋ​មួយ​រូប​ក្នុង​ស្រុក​ស្រែអំបិលនៅ​ថ្ងៃ​សុក្រ​ខាងមុខ​នេះ។​

ពួកគេ​នឹង​ធ្វើ​សកម្ម​ភាព​ដាក់​ញត្តិ​ចាប់​ពី​ម៉ោង​៦​ព្រឹក​រហូត​ដល់​ម៉ោង​៦ល្ងាច​នៅ​ក្នុង​ថ្ងៃ​ដដែល​នោះ។​ ​

អ្នកស្រី ផាវ ញឺង​ តំណាង​ប្រជាពលរដ្ឋ​មក​ពី​ភូមិ​ព្រែក​ជីក​ ឃុំ​ជីខក្រោម​ ស្រុក​ស្រែអំបិល​ខេត្ត​កោះកុង​ថ្លែង​ថា​ អាជ្ញាធរស្រុក​ស្រែអំបិល​ បាន​ស្នើ​សុំ​ឲ្យ​មាន​ការ​បន្ថយ​ចំនួន​អ្នកចូលរួម​ ហើយ​ក៏​បង្គាប់​ឲ្យ​ក្រុម​អ្នក​ចូលរួម​ការ​ដាក់​ញត្តិ​នេះ​ មិន​ឲ្យ​ប្រើ​សារ​នយោបាយ​ក្នុង​ការ​ហែ​ក្បួន​នេះ​ទេ។

អ្នកស្រី​បញ្ជាក់​ថា​ ក្រុម​តំណាង​ប្រជាពលរដ្ឋ​ បាន​ជម្រាប​ទៅ​អាជ្ញាធរ​ថា​ អ្នក​ចូលរួម​ហែ​ក្បួន​នឹង​មិន​ប្រើ​សារ​នយោបាយ​ណា​មួយ​នោះ​ទេ។

«ពួក​យើង​បាន​បញ្ជាក់​ជូន​គាត់​ហើយ​ថា​ ពួក​យើង​ហ្នឹងគឺ​ជា​ជន​រងគ្រោះ​ ទោះបី​ជា​អ្នក​ហ្នឹង ​ជា​អ្នក​នយោបាយ​ក៏ដោយ​ ក៏​មក​ក្នុង​ថ្ងៃ​ហ្នឹង​គឺ​ថ្ងៃ​មក​តវ៉ាដីធ្លី​ គឺ​អត់​មានរឿងសារ​នយោបាយ​អី​ទេ។​ សារ​របស់​យើង​គឺ​យើង​បាត់​ដី​ គឺ​បាត់​ជីវិត​ ហើយ​ពួក​យើង​កសិករ​ត្រូវ​ការ​ដី​ ដូចជា​មន្ត្រី​រាជការ​ត្រូវ​ការ​ប្រាក់បៀវត្ស​អញ្ចឹង។​ អញ្ចឹង​យើង​អត់​មាន​ទៅ​ទាម​ទារ​សារ​នយោបាយ​ ឬក៏​បម្រើ​នយោបាយ​បក្ស​ណា​មួយ​នោះ​ទេ»។​

អ្នកស្រី​បន្ថែមថា​ ប្រជាពលរដ្ឋ​រង​គ្រោះ​ ក៏​បាន​ទាមទារ​ឲ្យ​ក្រុមហ៊ុន​សង​សំណង​ដល់​ការ​ខូចខាត​ បន្ទាប់​ពី​ក្រុមហ៊ុន​បាន​ឈូស​ឆាយ​ដី​ដំណាំ​របស់​ពួក​គេ​ដើម្បី​ធ្វើ​ប្រតិបត្តិការ​ដាំដុះ​អំពៅ​ និង​ផលិត​ស្ករស។​

យ៉ាងណាក៏ដោយ​ លោក​ ប៊ុន​ លើត ​អភិបាល​ខេត្ត​កោះកុង​ បាន​ឆ្លើយតប​ទៅ​អ្នក​ត្រៀម​ខ្លួន​ហែ​ក្បួន​នោះ​នៅ​ក្នុង​លិខិត​ផ្លូវ​ការ​របស់​លោក​ចុះ​ថ្ងៃ​ទី​១៨ ខែ​មីនា​ថា៖ «ដើម្បី​រក្សា​បាន​នូវ​របៀបរៀបរយ​ សន្តិ​សុខ សណ្ដាប់​ធ្នាប់​សាធារណៈ​ និង​ជៀសវាង​ប៉ះពាល់​សិទ្ធិ​អ្នក​ដទៃ​ សាលាខេត្ត​មិន​អញ្ញាត​ឲ្យអស់​លោក​ធ្វើការ​ដង្ហែក្បួន​ដើម្បី​ដាក់​ញត្តិ​នោះ​ឡើយ»។

លោក​ ប៊ុន លើត​ បាន​មាន​ប្រសាសន៍​ប្រាប់ VOA​ តាមទូរស័ព្ទ​នៅរសៀលថ្ងៃ​អង្គារ​នេះ​ថា​ អាជ្ញាធរ​ខេត្ត​ នឹង​មិន​មាន​ការ​រារាំង​ការ​ហែ​ក្បួន​នេះ​ទេ តែ​លោក​ថា​ ការ​ហែ​ក្បួន​ ក៏​មិន​អាច​រក​ផ្លូវ​ដោះ​ស្រាយបញ្ហា​បាន​ដែរ។

លោក​មាន​ប្រសាសន៍​ថា​ លោកចង់​ឃើញ​ការ​ជជែក​គ្នា​នៅ​លើ​តុ​ ជាជាង​ការ​ប្រើ​ប្រាស់​យុទ្ធនាការ​តស៊ូ​មតិ​ដោយ​ការ​ហែ​ក្បួន​នេះ។​

«ហើយ​បើ​សិន​ជា​ហែ​អញ្ចឹង​ វា​ដោះស្រាយ​បាន​ដែរ?​ វា​អត់​បាន​ដដែល​ទេ។ វា​ត្រូវ​តែ​មក​អង្គុយ​ជជែក​គ្នា»។

ប៉ុន្តែ លោក​ ប៊ុន លើត​ មិន​អាច​បញ្ជាក់​បានទេ​ថា​ ជម្លោះ​ជិត​មួយ​ទសវត្ស​នេះ​ នឹង​ត្រូវ​បញ្ចប់​នៅ​ពេល​ណា​ឡើយ​ ហើយ​ថា​ ក្រុម​ការងារ​អន្តរ​ក្រសួង ​កំពុង​ពិនិត្យ​លើ​ជម្លោះ​នេះ។

ជម្លោះ​ដីធ្លី​ជាមួយ​ក្រុមហ៊ុន​ស្ករអំពៅ​នេះ​ គឺ​ស្ថិត​នៅ​ក្នុង​ករណី​ជម្លោះ​ដីធ្លី​ចំនួន​ ១២​ករណី​ធំៗ​ដែល​នៅ​សេស​សល់​ នៅ​ក្នុង​ប្រទេស​កម្ពុជា។​ នេះ​បើ​យោង​ទៅតាម​ការស្រាវជ្រាវ​របស់​វេទិកា​នៃ​អង្គការ​មិន​មែនរដ្ឋាភិបាល​ស្ដី​ពី​កម្ពុជា។

មន្ត្រី​នៃ​អង្គការ​ក្រៅ​រដ្ឋាភិបាល​នេះ​ ឲ្យ​ដឹង​ថា​ យុទ្ធនាការ​មួយ​នឹង​ត្រូវ​ធ្វើឡើង​ ដើម្បី​ស្នើ​សុំ​ឲ្យ​ប្រមុខ​រដ្ឋាភិបាល​ រក​ដំណោះស្រាយ​បញ្ចប់​ទំនាស់​ដី​ធ្លី​នេះ។​ ​

លោក ឡោ រស្មី​ អ្នកនាំពាក្យ​ក្រសួង​កសិកម្ម​ រុក្ខា​ប្រមាញ់​ និង​នេសាទ​ សុំ​មិន​ធ្វើការ​អធិប្បាយ​ដោយ​លោក​បាន​បង្វែរ​សំណួរ​ទៅ​កាន់​មន្ត្រី​គ្រប់​គ្រង​ខេត្ត​កោះ​កុង​វិញ។

VOA ​ពុំ​ទាន់​អាច​ទាក់ទង​តំណាងក្រុមហ៊ុន​បាន​ទេ​នៅ​ថ្ងៃ​អង្គារ​នេះ។

​នៅ​ក្នុង​ពិធីសម្ពោធ​ដាក់​ឲ្យ​ប្រើ​ប្រាស់​អគារ​រដ្ឋបាល​ថ្មី​របស់​ក្រសួង​បរិស្ថាន​ដែល​ធ្វើ​ឡើង​កាលពី​ចុង​ខែ​កុម្ភៈ​ ឆ្នាំ​២០១៦​នៅ​រាជធានី​ភ្នំពេញ​ លោក​ ហ៊ុន សែន​ បាន​ឲ្យ​ដឹងថា​ ជម្លោះ​ដីធ្លី​នៅ​ក្នុង​តំបន់​ដី​សម្បទាន​សេដ្ឋ​កិច្ច​ បាន​បញ្ចប់​ទៅ​ស្ទើរ​តែ​ទាំង​អស់​ហើយ​ដោយសារ​រាជរដ្ឋាភិបាល​កម្ពុជា​ បាន​សម្រេច​ដក​យក​មក​វិញ​ផ្ទៃ​ដី​ជិត​១លាន​ហិកតា​ ពី​ដី​សម្បទាន​សេដ្ឋកិច្ច​ទំហំ​សរុប​ជាង​២លាន​ហិកតា ​ដែល​បាន​ជួល​ទៅ​ឲ្យ​ក្រុមហ៊ុន​ឯកជន។​

លោក​បាន​ឲ្យ​ដឹង​បន្ថែម​ថា​ ទំហំ​ដី​ដែល​ដក​យក​មក​វិញ​នេះ​ នឹង​ទុក​ធ្វើ​ជា​ដីសម្បទាន​សង្គមកិច្ច។​

ការ​ថ្លែង​របស់​លោកនាយករដ្ឋមន្ត្រី នៅ​ពេល​នោះ​ មិន​បាន​សំដៅ​ដល់​ការ​ឃ្វាល​ដី​របស់​ប្រជាពលរដ្ឋ​ដែល​កំពុង​ជាប់គាំង​នៅ​ក្នុង​ដី​សម្បទាន​សេដ្ឋកិច្ច​នោះ​ទេ។​

តំណាង​ប្រជាពលរដ្ឋ​ក្នុង​វិវាទ​ដី​ធ្លី​នេះ​ និយាយ​ថា​ ពួកគេ​នឹង​បន្ត​យុទ្ធនាការ​ផ្សេងៗបន្ថែម​ទៀត​ ដើម្បីស្វែង​រក​ដំណោះ​ស្រាយ​ ប្រសិនបើ​អាជ្ញាធរ​ខេត្តនៅ​តែ​មិន​អាច​រក​ផ្លូវ​បំបែក​សំណុំ​រឿង​ដី​ធ្លី​របស់​ពួកគេ​បាន​នោះ។​

យុទ្ធនាការ​ទាំងនោះ​ រួមមាន​ការ​រៀប​ចំ​វេទិកា​សាធារណៈ​រវាង​អ្នកតំណាង​រាស្ត្រ​ និង​ជន​រង​គ្រោះ​ដីធ្លី​ ហើយ​និង​ការ​លើកគ្នា​មក​តវ៉ា​នៅរាជធានី​ភ្នំពេញ​ជាដើម។

ពួកគេ​ថា​ ទំនាស់​នេះ​ ​គឺ​ផ្ដើម​ឡើង​ដោយ​ជំនួញ​រកស៊ី​របស់​លោក​ឧកញ៉ា លី យ៉ុងផាត់​ ​សមាជិក​ព្រឹទ្ធសភា​មកពី​គណបក្ស​គ្រប់​គ្រង​ប្រទេស។​ សមាជិក​ព្រឹទ្ធសភា​រូប​នេះ​ ត្រូវ​ក្រុម​តំណាង​ប្រជាពលរដ្ឋ​ឲ្យ​ដឹង​ថា​ បាន​ដើរ​ចេញ​ពីជំនួញ​ស្ករ​អំពៅ​របស់​លោក និង​បានបន្សល់​ទុក​ជម្លោះដីធ្លី​នេះ។

VOA ​ពុំ​ទាន់​អាច​ទាក់ទង​តំណាងក្រុមហ៊ុនឧកញ៉ា លី យ៉ុងផាត់ ​បាន​ទេ​នៅ​ថ្ងៃ​អង្គារ​នេះ៕

XS
SM
MD
LG