មន្រ្តីប៉ូលិសនៅម៉ាឡេស៊ីនិយាយថា ពួកគេបានចាប់ខ្លួនស្រ្តីម្នាក់ ដែលជាប់ពាក់ព័ន្ធនឹងអ្វីដែលទំនងដូចជាការធ្វើឃាតទៅលើបងប្រុសម្តាយទីទៃរបស់មេដឹកនាំកូរ៉េខាងជើងលោក Kim Jong Un។
មន្រ្តីប៉ូលិសបាននិយាយក្នុងសេចក្តីថ្លែងការណ៍មួយថា ស្រ្តីម្នាក់ដែលត្រូវបានឃុំខ្លួនកាលពីព្រឹកថ្ងៃពុធ (១៥ កុម្ភៈ) នៅឯព្រលានយន្តហោះអន្តរជាតិក្រុងគូឡាឡាំពួ ប្រទេសម៉ាឡេស៊ី ត្រូវបានកំណត់អត្តសញ្ញាណតាមឯកសារធ្វើដំណើរមានឈ្មោះថា Doan Thi Huong។ សេចក្តីថ្លែងការណ៍នោះបានឲ្យដឹងថា ជនសង្ស័យគឺ «ត្រូវបានកំណត់អត្តសញ្ញាណពិតប្រាកដពីខ្សែអាត់វីដេអូកាមេរ៉ានៅឯព្រលានយន្តហោះ ហើយកំពុងនៅម្នាក់ឯងពេលត្រូវបានចាប់ខ្លួន»។
នៅថ្ងៃពុធដដែលនោះ ប្រទេសកូរ៉េខាងត្បូងក៏បានបញ្ជាក់ថា ជនរងគ្រោះគឺលោក Kim Jong Nam ដែលជាបងប្រុសម្តាយទីទៃរបស់មេដឹកនាំកូរ៉េខាងជើង។ លោក Kim Jong Nam ពីមុនមកធ្លាប់ជាជម្រើសសម្រាប់តំណែងប្រមុខរដ្ឋ ប៉ុន្តែបន្ទាប់មកលែងទទួលបានការចាប់អារម្មណ៍ពីឪពុកគាត់គឺលោក Kim Jong Il បន្ទាប់ពីលោក Kim Jong Nam ព្យាយាមចូលទៅប្រទេសជប៉ុនជាមួយនឹងលិខិតឆ្លងដែនក្លែងក្លាយដើម្បីទៅលេងសួនកម្សាន្ត Disneyland នៅក្រុងតូក្យូ ក្នុងឆ្នាំ២០០១។
លោក Jeong Joon-hee អ្នកនាំពាក្យក្រសួងបង្រួបបង្រួមកូរ៉េខាងត្បូងថ្លែងថា «វាហាក់ដូចជា បញ្ជាក់ច្បាស់ការណ៍ថា មនុស្សដែលត្រូវសម្លាប់នោះគឺ លោក Kim Jong Nam»។
ការស៊ើបអង្កេត
របាយការណ៍ប៉ូលិសម៉ាឡេស៊ីចុះផ្សាយកាលពីថ្ងៃអង្គារ (១៤ កុម្ភៈ) បានបញ្ជាក់ថា បុរសជនជាតិកូរ៉េខាងជើង វ័យ ៤៦ឆ្នាំមួយរូប ដែលកំពុងធ្វើដំណើរដោយុប្រើលិខិតឆ្លងដែនមានឈ្មោះថា Kim Chol បានស្លាប់នៅតាមផ្លូវពេលបញ្ជូនមកមន្ទីរពេទ្យ បន្ទាប់ពីស្វែងរកជំនួយផ្នែកសុខាភិបាលនៅព្រលានយន្តហោះក្រុងគូឡាឡាំពួ។ គោលដៅធ្វើដំណើររបស់លោកនៅថ្ងៃអង្គារនោះគឺកោះម៉ាកាវ ទីដែលលោកធ្លាប់បានស្នាក់អាស្រ័យកន្លងមក។ នេះបើយោងទៅតាមមន្រ្តីប៉ូលិសម៉ាឡេស៊ី។
កាលពីថ្ងៃអង្គារដដែលនេះ ប្រភពនានាពីរដ្ឋាភិបាលអាមេរិកាំងដែលមិនបញ្ចេញឈ្មោះ បាននិយាយថា សហរដ្ឋអាមេរិកមានជំនឿមុតមាំថា លោក Kim Jong Nam ត្រូវបានភ្នាក់ងារកូរ៉េខាងជើងសម្លាប់។
ទីភ្នាក់ងារស៊ើបអង្កេតជាតិកូរ៉េខាងត្បូង (NIS) កាលពីថ្ងៃពុធ ក៏បានបញ្ជាក់ថា លោក Kim Jong Nam ត្រូវបានបំពុលសម្លាប់ដោយភ្នាក់ងារកូរ៉េខាងជើងស្រីជាប់សង្ស័យពីរនាក់ ហើយថា លោកត្រូវបានសម្លាប់ជាមួយនឹងសារធាតុរាវពុលមិនស្គាល់ប្រភេទច្បាស់មួយ តាមរយៈម្ជុល ឬក្រណាត់។
មន្រ្តីប៉ូលិសម៉ាឡេស៊ី ដែលស៊ើបអង្កេតរឿងឃាតកម្មនេះ បាននិយាយថា ដើមហេតុពីក្រោយការស្លាប់លោក Kim មិនទាន់ត្រូវបានដឹងច្បាស់នៅឡើយទេ ហើយការធ្វើកោសល្យវិច្ច័យនឹងធ្វើឡើងនាពេលឆាប់ៗនេះ។ សាកសពរបស់លោកត្រូវបានដឹកទៅមន្ទីរពេទ្យទីពីរនៅព្រឹកថ្ងៃពុធ ដែលនៅទីនោះមានការធ្វើកោសល្យវិច្ច័យ។ មន្រ្តីទូតកូរ៉េខាងជើងក៏មានវត្តមាននៅមន្ទីរពេទ្យនោះផងដែរ ហើយបានសម្របសម្រួលជាមួយនឹងអាជ្ញាធរក្នុងស្រុក។ នេះបើយោងទៅតាមប្រភពរបស់ប៉ូលិស។
មូលហេតុ
មានការព្យាករណ៍យ៉ាងទូលំទូលាយថា ការស្លាប់របស់លោក Kim Jong Nam ត្រូវបានធ្វើឡើងក្រោមបញ្ជារបស់មន្រ្តីជាន់ខ្ពស់នៅក្រុងព្យុងយ៉ាង ហើយទំនងជាក្រោមបញ្ជារបស់លោក Kim Jong Un តែម្តង។
ប្រធានាធិបតីស្តីទី និងនាយករដ្ឋមន្រ្តីកូរ៉េខាងត្បូងលោក Hwang Kyo-ahn បាននិយាយថា «ប្រសិនបើមានការលាតត្រដាងថា ការស្លាប់របស់លោក Kim Jong Nam ត្រូវបានប្រព្រឹត្តឡើងដោយរដ្ឋាភិបាលកូរ៉េខាងជើង វានឹងជារឿងក្តីមួយដែលបង្ហាញពីភាពសាហាវយង់ឃ្នង និងអមនុស្សធម៌នៃរបបដឹកនាំរបស់លោក Kim Jong Un»។
លោក Kim Jong Nam ត្រូវបានរាយការណ៍ថា ត្រូវបានគេចាត់ទុកជាការគំរាមកំហែងមួយទៅដល់ការដឹកនាំរបស់ប្អូនប្រុសរបស់គាត់ ដោយសារតែការនិយាយរិះគន់ឥតសំចៃរបស់គាត់ពីអំពើគាបសង្កត់និងផ្តាច់ការនៅក្នុងប្រទេស (កូរ៉េខាងជើង) ដោយសារតែរូបគាត់ជាអ្នកគាំទ្រគោលនយោបាយកែទម្រង់ ដែលនឹងបន្ធូរបន្ថយការត្រួតត្រារបស់រដ្ឋ និងដោយសារតែមានការព្យាករណ៍ថា ប្រធានាធិបតីចិនលោកស៊ី ជីនពីងចង់ឃើញរូបគាត់ឡើងជំនួសប្អូនប្រុសរបស់គាត់ជា មេដឹកនាំកូរ៉េខាងជើង។
ទីភ្នាក់ងារចារកិច្ចរបស់កូរ៉េខាងត្បូងនិយាយកាលពីថ្ងៃពុធថា លោក Kim Jong Un បានចុះនូវ «បទបញ្ជាដាច់ខាត» មួយសម្រាប់ការធ្វើឃាតបងប្រុសម្តាយទីទៃរបស់ខ្លួន ហើយថា មានការប៉ុនប៉ងមួយក្នុងឆ្នាំ២០១២ ដែលបរាជ័យ។ លោក Kim Jong Nam ធ្លាប់បានរស់នៅក្រោមការការពាររបស់រដ្ឋាភិបាលក្រុងប៉េកាំងជាមួយនឹងភរិយាទីពីរនៅកោះម៉ាកាវ ដែនដីប្រទេសចិន។
អ្នករត់ផ្តាច់ខ្លួននិងជាអ្នកវិភាគនយោបាយជនជាតិកូរ៉េខាងជើងលោក Ahn Chan-il នៅវិទ្យាស្ថានអន្តរជាតិសម្រាប់ការសិក្សាពីកូរ៉េខាងជើង បាននិយាយថា វាទំនងថា ពួកចារបុរសកូរ៉េខាងជើង ដែលបន្លំខ្លួនក្នុងចំណោមពលករមួយចំនួនធំ ដែលធ្វើការក្នុងវិស័យរ៉ែនិងវត្ថុធាតុដើមនៅម៉ាឡេស៊ី បានដឹងពីផែនការធ្វើដំណើររបស់លោក Kim ហើយបានសម្រេចថា នឹងវាយប្រហារលោក ពេលលោក Kim មិនស្ថិតនៅក្រោមការការពាររបស់ចិន។
លោក Ahn Chan-il បាននិយាយថា «(ខ្ញុំគិតថា) កូរ៉េខាងជើងបានដាក់ចារបុរសក្នុងជួរពួកពលករ។ ហើយនៅស្របពេលដែលស្រ្តីពីរនាក់ត្រូវបានសង្ស័យថាជា សមាជិកនៃការិយាល័យស៊ើបការណ៍ (របស់កូរ៉េខាងជើង)នេះ មានលទ្ធភាពខ្ពស់ណាស់ដែលមនុស្សច្រើនជាង ១០នាក់ពីការិយាល័យដទៃទៀត ប្រហែលជាប់ពាក់ព័ន្ធនឹងរឿងនេះ»។
រដ្ឋាភិបាលកូរ៉េខាងត្បូងកាលពីថ្ងៃពុធក៏បានជំរុញឲ្យអ្នករត់ផ្តាច់ខ្លួនពីកូរ៉េខាងជើងមានការប្រុងប្រយ័ត្នបន្ថែមពីសុវត្ថិភាពនិងសន្តិសុខផ្ទាល់ខ្លួន។
រជ្ជកាលនៃភាពភ័យខ្លាច
ប្រសិនបើត្រូវបានលាតត្រដាងច្បាស់លាស់ ឃាតកម្មដែលបទបញ្ជាសម្លាប់ទៅលើបងប្រុសរបស់លោក Kim Jong Un អាចធ្វើឲ្យថ្នាក់ដឹកនាំនៅក្រុងព្យុងយ៉ាងកាន់តែឯកោ ស្របពេលដែលរដ្ឋាភិបាលក្រុងព្យុងយ៉ាងកំពុងតែជួបការលំបាករួចស្រាប់ទៅហើយក្រោមការដាក់ទណ្ឌកម្មធ្ងន់ធ្ងរ ដោយសារតែការបន្តធ្វើអាវុធនុយក្លេអ៊ែរ និងការរំលោភបំពានសិទ្ធិមនុស្សដែលមានពាសពេញប្រទេស។
វិទ្យាស្ថានសន្តិសុខជាតិរបស់កូរ៉េខាងត្បូងក្នុងខែធ្នូ ឆ្នាំ២០១៦ បានអះអាងថា លោក Kim Jong Un បានបញ្ជាឲ្យប្រហារជីវិតមនុស្ស ៣៤០នាក់ ចាប់តាំងពីពេលមេដឹកនាំរូបនេះចូលកាន់តំណែងក្នុងខែធ្នូ ឆ្នាំ២០១១។ ក្នុងឆ្នាំ២០១៣ លោក Kim Jong Un បានកាត់ទោសប្រហារជីវិតឪពុកមារបស់ខ្លួន លោក Jang Song Thaek ដែលធ្លាប់ត្រូវបានគេចាត់ទុកថា ជាអ្នកបង្គាប់បង្រៀន និងជាបុរសខ្លាំងទីពីរនៅក្នុងប្រទេស សម្រាប់អ្វីដែលរដ្ឋាភិបាលកូរ៉េខាងជើងចោទប្រកាន់ថាជា អំពើក្បត់ជាតិ។
លោក Carl Thayer អ្នកវិភាគយោធានៅមហាវិទ្យាល័យញូវសោតវ៉េល (University of New South Wales) ប្រទេសអូស្រា្តលី បាននិយាយថា ការស្លាប់របស់លោក Kim Jong Nam គឺជា ការចង្អុលបង្ហាញកាន់តែខ្លាំងក្លាថែមទៀតពីការព្រួយកង្វល់ផ្នែកនយោបាយនៅកូរ៉េខាងជើង។
លោកបានមានប្រសាសន៍ថា «សូម្បីតែបងប្រុសរបស់គាត់ត្រូវបានបណ្តេញចេញ ហើយប្រាកដណាស់ថា បងប្រុសគាត់មិនវិលត្រឡប់មកដណ្តើមតួនាទីរបស់គាត់ទេ។ ដូចនេះឃាតកម្មនេះអាចជា ការបង្ហាញម្យ៉ាងទៀតពីការព្រួយកង្វល់របស់លោក Kim Jong Un ផ្ទាល់»។
ក្នុងពេលប៉ុន្មានថ្ងៃខាងមុខ កូរ៉េខាងជើងនឹងប្រារព្ធពិធីបុណ្យខួបអតីតមេដឹកនាំលោក Kim Jong Il ដែលជាឪពុករបស់ទាំងលោក Kim Jong Un និងលោក Kim Jong Nam ប៉ុន្តែអ្នកទាំងពីរមានម្តាយទីទៃពីគ្នា។ បុណ្យជាតិធំនាថ្ងៃព្រហស្បតិ៍ (១៧ កុម្ភៈ) ត្រូវបានហៅថា «ថ្ងៃតារាបញ្ចេញពន្លឺចែកចាំង» ហើយនឹងមានសិល្បៈជិះស្គីលើទឹកកក និងការហែលទឹកជាចង្វាក់រួមគ្នា ការបាញ់កាំជ្រួច និងព្យុហយាត្រាខ្នាតធំ។
តាមដានយ៉ាងដិតដល់
ក្រសួងការបរទេសចិនកាលពីថ្ងៃពុធបាននិយាយថា ខ្លួនកំពុងតាមដានយ៉ាងដិតដល់លើព្រឹត្តការណ៍កើតមានបន្តបន្ទាប់ស្តីពីរឿងនេះ ដោយបានកត់សម្គាល់ថា អាជ្ញាធរម៉ាឡេស៊ីកំពុងតែស៊ើបអង្កេតការស្លាប់របស់លោក Kim Jong Nam។
បញ្ញវន្តចិន និងបណ្តាញផ្សព្វផ្សាយជាតិចិនក៏មិនទាន់ធ្វើសេចក្តីសន្និដ្ឋានណាមួយពីការស្លាប់របស់លោក Kim មុនពេលការស៊ើបអង្កេតត្រូវបញ្ចប់សព្វគ្រប់ ហើយពួកគេមើលស្រាលការទាក់ទិននឹងការផ្សារភ្ជាប់លោក Kim ទៅនឹងប្រទេសកូរ៉េខាងជើងផងដែរ។
លោក Wang Dong អ្នកជំនាញវិទ្យាសាស្រ្តនយោបាយនៅមហាវិទ្យាល័យក្រុងប៉េកាំង (Peking University) បាននិយាយថា ការស្លាប់របស់លោក Kim មិនទំនងជាផ្លាស់ប្តូរអ្វីទេ ដោយកត់សម្គាល់ថា រាល់បញ្ហាប្រឈមដែលឧបទ្វីបកំពុងជួបប្រទះ នឹងមិនរលាយបាត់ដោយស្រួលៗបែបនេះទេ។
លោក Wang បាននិយាយថា «អ្វីដែលបានកើតឡើងលើលោក Kim Yong Nam កាលពីម្ស៊ិលមិញគឺជាគ្រាន់តែជាព័ត៌មានតូចតាចមួយប៉ុណ្ណោះ។ ខ្ញុំមិនគិតថា វានឹងនាំឲ្យមានការផ្លាស់ប្តូរជាដុំកំភួន ឬជះឥទ្ធិពលខ្លាំងក្លាណាមួយទៅលើស្ថានភាព[នយោបាយ]ទាំងមូល [នៅក្រុងព្យុងយ៉ាង] នោះទេ»។
ទោះបីយ៉ាងណាក៏ដោយ ការពិភាក្សាគឺមានធំទូលាយជាងនេះតាមប្រព័ន្ធអ៊ីនធឺណិត។ លោក Kim Jong Un កាន់តែកំពុងក្លាយជាគោលដៅនៃការចម្អកតាមប្រព័ន្ធអ៊ីនធឺណិតនៅប្រទេសចិនកាលពីប៉ុន្មានឆ្នាំថ្មីៗនេះ ស្របពេលដែលទំនាក់ទំនងរវាងមេដឹកនាំប្រទេសឯកោមួយនោះ និងរដ្ឋាភិបាលក្រុងប៉េកាំងចាប់ផ្តើមថមថយសន្សឹមៗ។ ប្រធានាធិបតីចិនលោកស៊ី ជីនពីងមិនទាន់បានជួបជាមួយនឹងលោក Kim Jong Un ទេចាប់តាំងពីពេលចូលកាន់តំណែង ហើយលោក Kim ក៏មិនដែលទៅទស្សនកិច្ចនៅរដ្ឋធានីប្រទេសចិន ដូចដែលឪពុកលោកបានធ្វើពីគ្រាមុនដែរ។
មានសារឆ្លើយតបនៅលើប្រព័ន្ធអ៊ីនធឺណិតទៅនឹងអត្ថបទមួយអំពីអ្នកដែលប្រហែលនៅពីក្រោយការស្លាប់របស់លោក Kim Jong Nam។ សារនេះបានសរសេរថា «អ្នកទាំងអស់គ្នាគឺគ្រាន់តែទស្សន៍ទាយប៉ុណ្ណោះពីអ្នកណាដែលសម្លាប់លោក Kim Jong Nam ហើយអ្នកដែលគាំទ្រកូរ៉េខាងជើងកំពុងតែព្យាយាមលុបបំបាត់អ្វីដែលបានកើតឡើង ប៉ុន្តែទាំងសងខាងគឺគ្មានភស្តុតាងនោះទេ»។ សារដដែលនេះបានបន្តថា «មិនថាយ៉ាងម៉េចក៏ដោយ កូរ៉េខាងជើងនៅតែមានប្រវត្តិធ្វើឃាត និងតាមសម្លាប់អ្នកដែលខ្លួនហៅថា ជាជនក្បត់នៅក្រៅប្រទេស»។
សារបង្ហោះមួយទៀតនិយាយកាន់តែច្បាស់ជាងនេះ។
សារនោះបានឲ្យដឹងថា «ខ្ញុំគិតថា នេះពិតជាស្នាដៃរបស់លោក Kim Jong Un ហើយ។ ចាប់តាំងពីគាត់ឡើងកាន់អំណាច គាត់បានសម្លាប់គ្រប់សាច់ញ្ញាតិរបស់គាត់។ ហើយគ្មានហេតុផលអ្វី ដែលគាត់មិនទៅតាមប្រមាញ់អ្នកស្នងតំណែងបន្តធំបង្អស់នោះទេ»។
អ្នកវិភាគតំបន់អាស៊ីខាងជើងលោក Justin Hastings សាស្រ្តាចារ្យរងមហាវិទ្យាល័យក្រុងស៊ីដនីប្រទេសអូស្រ្តាលីបាននិយាយថា ប្រទេសចិនបានបង្ហាញប្រាប់កូរ៉េខាងជើងថា លោក Kim Jong Nam នឹងមិនត្រូវរងការបៀតបៀនណាមួយទេ ពេលដែលលោកនៅក្នុងទឹកដីចិន ដែលក្នុងនោះរួមមានកោះម៉ាកាវផងដែរ។ លោកបាននិយាយថា ការធ្វើដំណើររបស់លោក Kim Jong Nam ទៅម៉ាឡេស៊ីបានហុចឱកាសឲ្យគេធ្វើឃាតគាត់។
លោក Hastings បានប្រាប់ VOA ថា «វាមិនគួរឲ្យភ្ញាក់ផ្អើលណាស់ណាទេ ដែលគាត់ត្រូវបានសម្លាប់។ លោក Kim Jong Un នឹងតាមប្រមាញ់រូបគាត់ឲ្យបានជាយថាហេតុ។ ហើយត្រង់ពេលណា គឺថា ប្រហែលជាពេលនេះ ជាពេលដែលពួកគេអាចធ្វើបាន»៕
ប្រែសម្រួលដោយ ណឹម សុភ័ក្រ្តបញ្ញា
