លោកប្រធានាធិបតី Joe Biden នេះថ្ងៃពុធនេះបានទៅដល់ប្រទេសអ៊ីស្រាអែល ដែលជាផ្នែកមួយនៃដំណើរទស្សនកិច្ចនៅមជ្ឈិមបូព៌ា ដោយមានទស្សនកិច្ចនៅ West Bank និងប្រទេសអារ៉ាប៊ីសាអូឌីត។ លោកនឹងជំរុញសមាហរណកម្មកាន់តែស៊ីជម្រៅរបស់អ៊ីស្រាអែលចូលទៅក្នុងតំបន់ ជំរុញឱ្យបណ្តាប្រទេសឈូងសមុទ្រពែកបូមប្រេងបន្ថែមទៀតដើម្បីកាត់បន្ថយវិបត្តិថាមពលពិភពលោក និងផ្តល់ការធានាថា សហរដ្ឋអាមេរិកមិនធ្វើឱ្យតំបន់នេះបាត់បង់អាទិភាពនោះទេ ទោះបីជាសហរដ្ឋអាមេរិកផ្តោតលើសង្គ្រាមនៅអ៊ុយក្រែន និងការប្រកួតប្រជែងជាយុទ្ធសាស្ត្រជាមួយប្រទេសចិនក៏ដោយ។
នេះជាទស្សនកិច្ចដ៏ស្មុគស្មាញមួយសម្រាប់លោក Biden ដែលត្រូវបានសកម្មជននិងសមាជិកនៃគណបក្សរបស់លោកផ្ទាល់រិះគន់ចំពោះការធ្វើទំនាក់ទំនងឡើងវិញជាមួយព្រះរាជាណាចក្រអារ៉ាប៊ីសាអូឌីត ដែលលោកធ្លាប់បានកំណត់ថា «គ្មានការស្តារតម្លៃសង្គម»។ ទីប្រឹក្សាសន្តិសុខជាតិលោក Jake Sullivan បានប្រាប់អ្នកយកព័ត៌មានកាលពីថ្ងៃច័ន្ទថា «គោលដៅរបស់យើងគឺស្តារឡើងវិញ ប៉ុន្តែមិនធ្វើឱ្យខូចទំនាក់ទំនងជាមួយអារ៉ាប៊ីសាអូឌីតទេ» ។ លោក Sullivan បានអះអាងថា នៅក្នុងពិភពលោកដែលមានការប្រកួតប្រជែងខ្លាំងខាងភូមិសាស្ត្រនយោបាយ ជាពិសេសនៅឥណ្ឌូប៉ាស៊ីហ្វិក និងអឺរ៉ុប សហរដ្ឋអាមេរិកត្រូវតែបន្តចូលរួមយ៉ាងខ្លាំងក្លានៅមជ្ឈិមបូព៌ា។
លោកថា«មជ្ឈិមបូព៌ាមានទំនាក់ទំនងយ៉ាងស៊ីជម្រៅជាមួយពិភពលោកទាំងមូល។ បើយើងធ្វើសកម្មភាពឥឡូវនេះបង្កើតតំបន់ដែលមានសន្តិភាព និងស្ថិរភាពជាងនេះ វានឹងផ្តល់ភាគលាភដល់ផលប្រយោជន៍ជាតិអាមេរិក និងដល់ប្រជាជនអាមេរិកសម្រាប់ច្រើនឆ្នាំទៅមុខ»។
នៅអ៊ីស្រាអែល លោកBiden នឹងជួបនាយករដ្ឋមន្ត្រីចាំផ្ទះគឺលោក Yair Lapid និងមេដឹកនាំបក្សប្រឆាំង លោកBenjamin Netanyahu ដើម្បីពិភាក្សាអំពីសន្តិសុខរបស់អ៊ីស្រាអែល ចំពេលមានការងើបឡើងវិញរបស់អ៊ីរ៉ង់ រួមទាំងការធ្វើសមាហរណកម្មសមត្ថភាពការពារដែនអាកាសរបស់អ៊ីស្ត្រាអែលជាមួយបណ្តាប្រទេសឈូងសមុទ្រពែក។
នៅ West Bank លោក Biden នឹងរំឭកឡើងវិញនូវការគាំទ្រសម្រាប់ដំណោះស្រាយរដ្ឋពីរ និងស្តារទំនាក់ទំនងជាមួយអាជ្ញាធរប៉ាឡេស្ទីនឡើងវិញ បន្ទាប់ពីរដ្ឋបាលលោក Donald Trump បានកាត់បន្ថយជំនួយ និងបិទស្ថានកុងស៊ុលអាមេរិកនៅទីក្រុងហ្សេរុយសាឡឹម ដែលជាស្ថានបេសកកម្មរបស់សហរដ្ឋអាមេរិកសម្រាប់ប៉ាឡេស្ទីន។
លោក Biden នឹងចូលរួមកិច្ចប្រជុំកំពូលGCC+3 នៅទីក្រុង Jeddahប្រទេសអារ៉ាប៊ីសាអូឌីត ជាមួយសមាជិកក្រុមប្រឹក្សាសហប្រតិបត្តិការឈូងសមុទ្រពែកហើយលោកនឹងដាក់ចេញចក្ខុវិស័យសម្រាប់ការចូលរួមរបស់សហរដ្ឋអាមេរិកក្នុងតំបន់នេះ។លោកនឹងជួបស្តេច Salman និងព្រះអង្គម្ចាស់ Mohammed Bin Salman ដើម្បីជួសជុលទំនាក់ទំនងជាមួយប្រទេសនេះ៕
(អ្នកស្រី Anita Powell រួមចំណែកក្នុងសេចក្តីរាយការណ៍នេះ)
