លោករដ្ឋមន្រ្តីការបរទេសសហរដ្ឋអាមេរិក John Kerry បានស្ថិតនៅក្នុងទីក្រុងវីយែន (Vienna) ដែលនៅទីនោះលោក និងលោករដ្ឋមន្រ្តីការបរទេសរុស្ស៊ី Sergei Lavrov ហើយនឹងស្វះស្វែងរកមតិរួមស្តីពីអនាគតខាងនយោបាយក្នុងប្រទេសស៊ីរី។
មន្រ្តី២នាក់ដែលចូលរួមការចរចាទ្វេភាគីនៅថ្ងៃសុក្រនេះ ហើយនិងពហុភាគីដែលនឹងរួមមានរដ្ឋមន្រ្តីការបរទេសនៃប្រទេសតួកគី និងអារ៉ាប៊ីសាអូឌីត និងតំណាងរបស់អង្គការសហប្រជាជាតិ។
លោករដ្ឋមន្រ្តីការបរទេសសហរដ្ឋអាមេរិក Kerry បានសួរក្នុងអំឡុងពេលនៃការបង្ហាញខ្លួនកាលពីថ្ងៃព្រហស្បតិ៍ជាមួយលោក Frank Walter-Steinmeier រដ្ឋមន្រ្តីការបរទេសអាលឺ្លម៉ង់ថា «បញ្ហាគឺថា តើយើងអាចធ្វើឲ្យមានដំណើរការខាងនយោបាយមួយ ដែលក្នុងអំឡុងពេលនោះការបែងចែកអំណាចដ៏ត្រឹមត្រូវក្នុងចំណោមប្រជាពលរដ្ឋស៊ីរីបានរបៀបណា?។ នេះជាអ្វីដែលយើងកំពុងធ្វើ»។
ជំនួបនោះកើតមានឡើងបន្ទាប់ពីការធ្វើដំណើរមិនប្រកាសឲ្យដឹងជាមុននៅសប្តាហ៍នេះ របស់ប្រធានាធិបតី Bashar al-Assad នៃប្រទេសស៊ីរីដើម្បីជួបជាមួយប្រធានាធិបតីរុស្ស៊ី Vladimir Putin។
ប្រធានាធិបតី Putin ចាត់ទុកលោក al-Assad ជាសម្ព័ន្ធមិត្ត ខណៈដែលសហរដ្ឋអាមេរិក និងសម្ព័ន្ធមិត្តរបស់ខ្លួននិយាយថា មេដឹកនាំស៊ីរីមិនត្រូវស្ថិតនៅជាផ្នែកមួយនៃដំណើរការខាងនយោបាយរយៈពេលយូរនៅក្នុងប្រទេសនោះទេ។
លោក Adel al-Jubier រដ្ឋមន្រ្តីការបរទេសអារ៉ាប៊ីសាអូឌីតបាននិយាយមុនពេលការចរចានោះថា «យើងជឿជាក់ថា ការជ្រៀតជ្រែករបស់រុស្ស៊ីក្នុងប្រទេសស៊ីរីជាការគ្រោះថ្នាក់បំផុត ពីព្រោះតែវាធ្វើឲ្យជម្លោះនោះរឹតតែធ្ងន់ធ្ងរឡើងៗ»។
ក្នុងប៉ុន្មានសប្តាហ៍ថ្មីៗនេះ រុស្ស៊ីបានបង្កើនកិច្ចប្រតិបត្តិការខាងយោធាក្នុងប្រទេសស៊ីរីដើម្បីជួយរបប al-Assad ប្រយុទ្ធនឹងភាពចលាចល។ ទោះជាយ៉ាងណាក៏ដោយ កងទ័ពចម្រុះដែលដឹកនាំដោយសហរដ្ឋអាមេរិកប្រឆាំងនឹងក្រុមរដ្ឋឥស្លាមបានរិះគន់រដ្ឋាភិបាលទីក្រុងមូស្គូ ដោយនិយាយថា ការវាយប្រហារតាមអាកាសរបស់ខ្លួនបានដៅលើទីតាំងរបស់ក្រុមប្រឆាំងស៊ីរី ហើយមិនមែនលើទីដៅរបស់ពួកជនសកម្មប្រយុទ្ធរដ្ឋឥស្លាមនោះទេ៕
