លោករដ្ឋមន្ត្រីការបរទេសស.រ.អា. ចន ឃែរី (John Kerry) បានមានប្រសាសន៍ថាមានរណសិរ្សរួមគ្នាមួយប្រឆាំងនឹងពួករដ្ឋឥស្លាម ហើយថា លោកមាន«ការជឿទុកចិត្តដាច់ខាត»ថា ពួកជនសកម្មប្រយុទ្ធរដ្ឋឥស្លាមទាំងនេះនឹងទទួលបរាជ័យ។
ថ្លែងនៅក្នុងកម្មវិធី «Today Show» របស់បណ្តាញទូរទស្សន៍អាមេរិកាំង NBC នៅក្នុងឱកាសដំណើរទស្សនកិច្ចរបស់លោកក្នុងប្រទេសអេមីរ៉ាតអារ៉ាប់រួម (United Arab Emirates) លោក ឃែរី បានមានប្រសាសន៍ថា មានយុទ្ធសាស្ត្រមួយហើយហើយស.រ.អា.ដែលដឹកនាំក្រុមចម្រុះមួយធ្វើការវាយប្រហារតាមអាកាសប្រឆាំងនឹងពួករដ្ឋឥស្លាម កំពុងបង្កើនកិច្ចខិតខំប្រឹងប្រែងខាងយោធា ខាងការប្រឆាំងនឹងភេរវកម្មនិងខាងការទូតរបស់ផងខ្លួន។
លោកក៏បានមានប្រសាសន៍ដែរថា ពួកភេរវជនដែលបានធ្វើការវាយប្រហារនៅក្នុងប្រទេសបារាំង ប្រទេសលីបង់និងប្រទេសអេហ្ស៊ីប បានចាប់អារម្មណ៍នឹងអ្វីដែលពួកយុទ្ធជនរបស់ក្រុមនេះកំពុងធ្វើនៅក្នុងប្រទេសអ៊ីរ៉ាក់និងប្រទេសស៊ីរី ហើយលោករំពឹងថា ការវាយប្រហាររបស់ក្រុមចម្រុះនៅក្នុងប្រទេសទាំងពីរនេះនឹងកើនឡើងខ្លាំងជាងមុនក្នុងពេលប៉ុន្មានថ្ងៃខាងមុខនេះ។
លោក ឃែរី បានមានប្រសាសន៍ថា លោកប្រធានាធិបតីស.រ.អា. បារ៉ាក់ អូបាម៉ាបានសួរពួកមន្ត្រីសំខាន់ៗឱ្យផ្តល់គំនិតថ្មីៗដើម្បីយកជ័យជម្នះលើការបះបោររបស់ពួករដ្ឋឥស្លាម។
នៅពេលលោកឋិតក្នុងក្រុងអាប៊ុយដាប៊ី (Abu Dhabi) លោក ឃេរី បានជួបជាមួយព្រះអង្គម្ចាស់រាជទាយាទ Sheikh Mohammed Bin Zaed al-Nahyan នៅក្នុងកន្លែងឈប់សំចតទីមួយនៃដំណើរទស្សនកិច្ចមួយដែលនឹងនាំលោកទៅកាន់ប្រទេសអ៊ីស្រាអែល៕
