សមាជិករដ្ឋសភាសហរដ្ឋអាមេរិកខាងគណបក្សប្រជាធិបតេយ្យលោក Joe Kennedy បានបញ្ជាក់ថា រដ្ឋាភិបាលរបស់លោកប្រធានាធិបតី ដូណាល់ ត្រាំ «មិនត្រឹមតែសំដៅវាយប្រហារលើច្បាប់ដែលការពារប្រជាពលរដ្ឋអាមេរិកាំងនោះទេ គឺវាយប្រហារជ្រុលហួសហេតុតែម្ដងទៅលើអ្វីដែលប្រជាពលរដ្ឋអាមេរិកាំងសមនឹងទទួលបានការការពារពេញលេញ»។
លោក Kennedy បានថ្លែងដូចនេះនៅក្នុងអំឡុងពេលលោកថ្លែងសុន្ទរកថាអំពីការឆ្លើយតបជាទម្លាប់របស់គណបក្សសំឡេងភាគតិចនៅក្នុងសភាទៅកាន់ការថ្លែងសុន្ទរកថារបស់លោក ត្រាំ ទៅកាន់សភាទាំងពីរថ្នាក់កាលពីយប់ថ្ងៃអង្គារម្សិលមិញ។
លោក Kennedy បានបញ្ជាក់ទៀតថា ប្រជាពលរដ្ឋអាមេរិកាំងរាប់លាននាក់មានអារម្មណ៍វិលវល់ ខឹង និងភ័យខ្លាច នៅក្នុងអំឡុងពេលលោក ត្រាំ កាន់អំណាចមួយឆ្នាំដំបូងជាប្រធានាធិបតី។ លោកបានបន្ថែមថា លោក ត្រាំ បានបង្កើតនូវក្រសួងយុត្តិធម៌មួយដែលធ្វើឲ្យប៉ះពាល់ដល់សិទ្ធិប្រជាពលរដ្ឋមិនមែនស្បែកស និងអ្នកស្រលាញ់ភេទដូចគ្នាបន្តិចម្ដងៗ និងធ្វើឲ្យប្រជាពលរដ្ឋអាមេរិកាំងមានការបែកបាក់គ្នា។
ដោយគូសបញ្ជាក់អំពីពាក្យស្លោកថ្មីនៃគណបក្សរបស់លោក ដែលពាក្យស្លោកនោះសរសេរថា «ដំណោះស្រាយប្រសើរជាងនេះ» លោក Kennedy វ័យ ៣៧ ឆ្នាំរូបនេះបាននិយាយថា គណបក្សប្រជាធិបតេយ្យនឹងតស៊ូដើម្បីឲ្យអ្នកធ្វើការទទួលបានប្រាក់បៀវត្សរ៍ប្រសើរជាងនេះ ក៏ដូចជាតស៊ូដើម្បីការថែរក្សាសុខភាពសម្រាប់កុមារ និងឱកាសអប់រំនានាដែលប្រជាពលរដ្ឋមានលទ្ធភាពអាចចំណាយបាន។
លោក Kennedy ក៏បានតស៊ូមតិដើម្បីគោលនយោបាយដូចគ្នាមួយចំនួនដែលលោក ត្រាំ បានគូសបញ្ជាក់នៅក្នុងសុន្ទរកថាផ្ទាល់ខ្លួនរបស់លោក ដែលក្នុងនោះមានទាំងកិច្ចព្រមព្រៀងពាណិជ្ជកម្មដែលមានយុត្តិធម៌ និងការធ្វើឲ្យប្រសើរឡើងនូវវិស័យហេដ្ឋារចនាសម្ព័ន្ធផងដែរ៕
