លោក កឹម សុខា អតីតប្រធានគណបក្សសង្គ្រោះជាតិ ដែលកំពុងជាប់បណ្តឹងនៅតុលាការក្នុងសំណុំរឿងក្បត់ជាតិ មិនទាន់បង្ហាញគោលជំហរជាសាធារណៈនៅឡើយទេថាតើលោកនឹងទៅ ឬមិនទៅបោះឆ្នោតឃុំសង្កាត់ នាថ្ងៃអាទិត្យនេះ។
មន្រ្តីជំនិតរបស់លោក កឹម សុខា គឺលោក មុត ចន្ថា ប្រាប់វីអូអេនៅថ្ងៃសុក្រនេះថាលោក កឹម សុខា នឹងបង្ហាញការសម្រចចិត្តរបស់លោកនៅថ្ងៃបោះឆ្នោត។
បើតាមលោក មុត ចន្ថា លោក កឹម សុខា«នឹងប្រើប្រាស់សិទ្ធិស្វ័យសម្រេច ស្របតាមជម្រើស និងឆន្ទៈរបស់លោកបានយ៉ាងត្រឹមត្រូវ»។
លោកថ្លែងថា៖ «នៅថ្ងៃទី០៥ ខែមិថុនា [លោក កឹម សុខា] នឹងអាចស្រាយចម្ងល់ច្បាស់អំពីការប្រើប្រាស់នូវសិទ្ធិពលរដ្ឋ និងសិទ្ធិស្វ័យសម្រេចរបស់លោក»។
លោក កឹម សុខា អាចប្រើប្រាស់សិទ្ធិជាប្រជាពលរដ្ឋក្នុងការទៅបោះឆ្នោតឃុំសង្កាត់ បើទោះលោកនៅជាប់បម្រាមនយោបាយ។ នេះបើតាមការបញ្ជាក់របស់គណៈកម្មាធិការជាតិរៀបចំការបោះឆ្នោត ទៅកាន់ស្ថាប័នសារព័ត៌មានក្នុងស្រុក កាលពីកន្លងទៅ។
គួរបញ្ជាក់ថាកាលពីឆ្នាំ២០១២ លោក កឹម សុខា អតីតប្រធានគណបក្សសិទ្ធិមនុស្ស និងលោក សម រង្ស៊ី មេដឹកនាំគណបក្សសម រង្ស៊ី បានរួមគ្នាបង្កើតគណបក្សសង្រ្គោះជាតិ ដែលត្រូវបានរំលាយដោយតុលាការកំពូល កាលពីឆ្នាំ២០១៧។
គណបក្ស សម រង្ស៊ី បានប្តូរឈ្មោះជាគណបក្សភ្លើងទៀន ហើយគណបក្សនេះបានសម្រេចចិត្តចូលរួមប្រកួតប្រជែងការបោះឆ្នោតក្រុមប្រឹក្សាឃុំសង្កាត់នាអាណត្តិទី៥នេះ៕
