មេធាវីម្នាក់ដែលការពារក្តីឲ្យលោក កឹម សុខា មេដឹកនាំគណបក្សសង្គ្រោះជាតិនៅកម្ពុជា បានថ្លែងប្រាប់វីអូអេនៅយប់ថ្ងៃអង្គារនេះថា រហូតមកដល់ពេលនេះ វត្តមានរបស់លោក កឹម សុខានៅសាលាឧទ្ធរណ៍នៅថ្ងៃស្អែក នៅតែមិនច្បាស់នៅឡើយទេ ដោយសារអតីតមេបក្សប្រឆាំងដែលកំពុងជាប់រឿងក្តីក្តាំរូបនេះ ជាប់រវល់ជួបអ្នកការទូតបរទេសនានា។
លោក ចាន់ ចេន ដែលជាមេធាវីម្នាក់ក្នុងចំណោមមេធាវី៥នាក់របស់លោក កឹម សុខា បានប្រាប់វីអូអេ យ៉ាងដូច្នេះថា៖
«រហូតមកទល់ពេលនេះគឺខ្ញុំអត់ទាន់បានទទួលដំណឹងពីឯកឧត្តម កឹម សុខា កូនក្តីរបស់យើងខ្ញុំថាតើគាត់នឹងបង្ហាញខ្លួន ឬមិនបង្ហាញខ្លួននៅសវនាការសាលាឧទ្ធរណ៍ ដែលជាសវនាការមុនអង្គសេចក្តីទេនៅថ្ងៃស្អែក ពីព្រោះបើតាមខ្ញុំដឹង មួយរយៈនេះ ឯកឧត្តម កឹម សុខា គាត់មមាញឹកទទួលជួបជាមួយអង្គទូតនានា»។
លោក កឹម សុខា ត្រូវបានតុលាការកោះហៅឲ្យចូលខ្លួនក្នុងសវនាការមួយនៅសាលាឧទ្ធរណ៍នៅថ្ងៃទី១៣ខែឧសភានេះ ក្រោយពីក្រុមមេធាវីការពារក្តីរបស់លោកបានដាក់ពាក្យបណ្តឹងជំទាស់នឹងការសម្រេចរបស់ចៅក្រមសាលាដំបូងរាជធានីភ្នំពេញ ដែលបានទទួលយកភស្តុតាងថ្មីដាក់ចូលក្នុងសំណុំរឿងចោទប្រកាន់ពីបទក្បត់ជាតិប្រឆាំងនឹងមេដឹកនាំបក្សប្រឆាំងនៅកម្ពុជារូបនេះ។
លោក ចាន់ ចេន ស្នើសុំមិនធ្វើអត្ថាធិប្បាយអំពីផលប៉ះពាល់នៃវត្តមាន ឬអវត្តមានរបស់លោក កឹម សុខាក្នុងសវនាការនៅសាលាឧទ្ធរណ៍នៅថ្ងៃស្អែកនេះទេ។
វីអូអេ បានទាក់ទងអ្នកនាង កឹម មនោវិទ្យា កូនស្រីម្នាក់របស់លោក កឹម សុខានិងជាមន្ត្រីជាន់ខ្ពស់មួយរូបទទួលបន្ទុកខាងទំនាក់ទំនងនៃគណបក្សសង្គ្រោះជាតិ ដើម្បីស្នើសុំការបញ្ជាក់ថា តើលោក កឹម សុខានឹងបង្ហាញខ្លួននៅសាលាឧទ្ធរណ៍នៅថ្ងៃស្អែកដែរឬទេ។ ប៉ុន្តែ មិនទាន់មានការឆ្លើយតបណាមួយនៅឡើយទេ គិតមកត្រឹមម៉ោងផ្សាយរបស់វីអូអេ នៅយប់ថ្ងៃអង្គារ ម៉ោងក្នុងប្រទេសកម្ពុជា។
ចំណែក លោក មុត ចន្ថា ជំនួយការផ្ទាល់របស់លោក កឹម សុខា ក៏មិនបានផ្តល់ការបញ្ជាក់ណាមួយដែរ ដោយលោកគ្រាន់តែឆ្លើយតបតាមបណ្តាញទំនាក់ទំនងសង្គមយ៉ាងខ្លីដោយស្នើឲ្យទាក់ទងក្រុមមេធាវីការពារក្តីលោក កឹម សុខាវិញ៕
