គណបក្សប្រឆាំងដ៏ធំនៅប្រទេសកម្ពុជាកំពុងរៀបចំបញ្ជីឈ្មោះបេក្ខជន និងបេក្ខនារី និងកែសម្រួលសារនយោបាយដើម្បីទាក់ទាញអ្នកបោះឆ្នោត នៅក្នុងការបោះឆ្នោតឃុំ-សង្កាត់ ដែលគ្រោងនឹងធ្វើឡើងក្នុងរយៈពេល តែប្រាំខែទៀតប៉ុណ្ណោះ។ អ្នកវិភាគនិយាយថា គណបក្សសង្គ្រោះជាតិមានភាពយឺតយ៉ាវក្នុងការរៀបចំបញ្ជីឈ្មោះបេក្ខជន និងបេក្ខនារីរបស់ខ្លួន។
លោកកឹម សុខា ប្រធានស្តីទីគណបក្សសង្គ្រោះជាតិ កាលពីថ្ងៃសៅរ៍បាន ប្រាប់ក្រុមអ្នកគាំទ្រគណបក្សប្រឆាំង នៅក្នុងកិច្ចប្រជុំមួយធ្វើឡើងនៅក្នុងទីក្រុងប៉ារីស ប្រទេសបារាំងថា គណបក្សនេះនឹងជ្រើសរើសបេក្ខជនបម្រុង និងពេញសិទ្ធិចំនួនជាង២៣០០០នាក់សម្រាប់ការចូលរួមប្រកួតប្រជែងក្នុងការបោះឆ្នោតក្រុមប្រឹក្សាឃុំ-សង្កាត់។
គណៈកម្មាធិការជាតិរៀបចំការបោះឆ្នោត (គ.ជ.ប.) គ្រោងនឹងរៀបចំការបោះឆ្នោតឃុំ-សង្កាត់នៅថ្ងៃទី៤ ខែមិថុនា ឆ្នាំ២០១៧ខាងមុខនេះ។
លោកកឹម សុខា តំណាងរាស្ត្រមណ្ឌលខេត្តកំពង់ចាម បានបញ្ជាក់ថា បេក្ខជនពេញសិទ្ធិនឹងត្រូវសម្រេចឲ្យចូលរួមការប្រកួតប្រជែងក្នុងការបោះឆ្នោត នៅក្នុងឃុំ-សង្កាត់ចំនួន១៦៤៦ នៅទូទាំងប្រទេស។ លោកបន្តថា ក្រុមគណៈកម្មការគណបក្សថ្នាក់មូលដ្ឋាន គណៈកម្មការសម្របសម្រួលថ្នាក់ស្រុកនឹងសម្រឹតសម្រាំងរកបេក្ខជន និងបេក្ខនារីឆ្នើមសម្រាប់ឈរឈ្មោះបោះឆ្នោត។ លោកថ្លែងថា ការបោះឆ្នោតជ្រើសរើសបេក្ខជន និងបេក្ខនារី នឹងត្រូវរៀបចំឡើង ប្រសិនបើមានការខ្វែងគំនិតគ្នាក្នុងការជ្រើសរើសបេក្ខជន និងបេក្ខនារីពីការសម្របសម្រួលរបស់គណៈកម្មការថ្នាក់ស្រុក។
អនុប្រធានគណបក្សប្រឆាំងរូបនេះបានបញ្ជាក់បន្តទៀតថា ក្រុមថ្នាក់ដឹកនាំរបស់គណបក្សនេះកំពុងសិក្សា និងធ្វើកម្មវិធីនយោបាយថ្នាក់មូលដ្ឋាន និងពិចារណាកែសម្រួល ឬក៏បន្ថែមចំណុចមួយចំនួននៃសារនយោបាយគណបក្សដែលកន្លងមកមានប្រាំពីរចំណុច។
«សារនយោបាយនេះ យើងខ្ញុំត្រូវតែបញ្ចប់នៅក្នុងដាច់ខែ១នេះដើម្បីរៀបចំ យកទៅឲ្យសមាជិក បេក្ខជនអានបានយល់ឲ្យហើយ»។
លោកបន្ថែមថា គ.ជ.ប.បានទុកពេលឲ្យគណបក្សនយោបាយនានាបញ្ជូនឈ្មោះបេក្ខជន និងបេក្ខនារី ដល់ត្រឹមថ្ងៃទី៣ ខែមីនា ឆ្នាំ២០១៧។ លោកថ្លែងថា គណបក្សសង្គ្រោះជាតិក៏គ្រោងជ្រើសរើសអ្នកសង្កេតការណ៍បោះឆ្នោតចំនួនជិត៤៥០០០នាក់ ដើម្បីឃ្លាំមើលការបោះឆ្នោត ដែលនឹងត្រូវរៀបចំឡើង នៅការិយាល័យបោះឆ្នោត ចំនួនជាង២២០០០កន្លែងផងដែរ។
សារនយោបាយរបស់គណបក្សនេះមានចំនួន៧ចំណុច ក្នុងនោះមានដូចជាការដំឡើងប្រាក់ខែដល់មន្ត្រីរាជការ និងកម្មករ ការផ្ដល់ប្រាក់ឧបត្ថម្ភដល់មនុស្សចាស់ ការលើកស្ទួយជីវភាពប្រជាកសិករតាមរយៈការការពារតម្លៃកសិផលរបស់ពួកគេជាដើម។
លោកមាស នី អ្នកសិក្សាស្រាវជ្រាវការអភិវឌ្ឍសង្គម ប្រាប់ VOA ថា គណបក្សប្រឆាំងមានភាពយឺតយ៉ាវក្នុងការរៀបចំដាក់បេក្ខជន និងបេក្ខនារីរបស់ខ្លួនឲ្យឈរឈ្មោះក្នុងការបោះឆ្នោតឃុំ-សង្កាត់ ដែលកាន់តែខិតជិតមកដល់នោះ។ លោកមានប្រសាសន៍ថា ការណ៍នេះបង្ហាញថា គណបក្សប្រឆាំងបានដើរក្រោយមួយជំហាន បើធៀបទៅនឹងគណបក្សប្រជាជនកម្ពុជា ដែលបានត្រៀមរួចរាល់អស់ទៅហើយនៃបេក្ខជន និងបេក្ខនារីរបស់គណបក្សដែលក្តាប់អំណាចជិត៤០ឆ្នាំមកនេះ។
«បើសិនជាប្រៀបធៀបពីដំណើរហ្នឹង សង្គ្រោះជាតិហាក់ដូចជានៅមួយជំហាន ក្រោយគណបក្សប្រជាជនកម្ពុជា រាល់ការរៀបចំធនធានមនុស្ស។ ទោះបីជាខ្ញុំបានសួរទៅមន្ត្រីសង្គ្រោះជាតិខ្លះ គាត់បានអះអាងថា គាត់បានរៀបចំហើយក៏ដោយ ក៏ប៉ុន្តែអ្វីដែលខ្ញុំមើលឃើញនៅតាមមូលដ្ឋានគឺនៅមានភាពយឺតយ៉ាវជាងគណបក្សប្រជាជនកម្ពុជា មកដល់ថ្ងៃនេះ»។
ក្រោយការបោះឆ្នោតជ្រើសរើសក្រុមប្រឹក្សាឃុំ-សង្កាត់ចំនួន១.៦៣៣ឃុំ-សង្កាត់នៅទូទាំងប្រទេសកម្ពុជាកាលពីឆ្នាំ២០១២ គណបក្សប្រជាជនកម្ពុជាឈ្នះជាប្រធានក្រុមប្រឹក្សាឃុំ-សង្កាត់ចំនួន១.៥៩២ និងចំនួនក្រុមប្រឹក្សាមានដល់ទៅជាង៨០០០នាក់ ដោយត្រួតត្រាកិច្ចការរដ្ឋបាលមូលដ្ឋានសឹងតែទាំងអស់។
ចំណែកឯគណបក្សជំទាស់របស់លោកសម រង្ស៉ី និងលោកកឹម សុខាបានឈ្នះជាប្រធានក្រុមប្រឹក្សាឃុំ-សង្កាត់ចំនួន៤០ និងមានតួនាទីជាសមាជិកក្រុមប្រឹក្សាឃុំ-សង្កាត់ជិត៣.០០០នៅទូទាំងប្រទេស។
គណបក្សរាជានិយមហ៊្វុនស៊ិនប៉ិចទទួលបានអាសនៈជាប្រធានក្រុមប្រឹក្សាឃុំ-សង្កាត់ចំនួន១ និងមានសមាជិកចំនួន១៥១ទូទាំងប្រទេស។ កម្ពុជាក៏គ្រោងនឹងរៀបចំការបោះឆ្នោតជាតិនៅឆ្នាំ២០១៨ផងដែរ៕
