ខណៈពេលដែលក្រុមគ្រួសារសាច់ញាតិ្ត និងអ្នកគោរពស្រឡាញ់លោក កែម ឡី កំពុងតែធ្វើបុណ្យតាមព្រះពុទ្ធសាសនានៅវត្តក្តីចាស់នៃរាជធានីភ្នំពេញ នៅថ្ងៃអង្គារ ទី១២ ខែកក្កដានេះ សាលាដំបូងរាជធានីភ្នំពេញបានសម្រេចបន្តសាកសួរជនសង្ស័យដែលបានបាញ់សម្លាប់លោក កែម ឡី អ្នកវិភាគកិច្ចការអភិវឌ្ឍន៍សង្គមដ៏មានប្រជាប្រិយភាពមួយរូបកាលពីថ្ងៃអាទិត្យកន្លងទៅនេះ។ ការសាកសួរជនសង្ស័យនៅថ្ងៃទីពីរនេះ គឺមានអស់រយៈពេលជិត៨ម៉ោង តែបើតាមលោក លី សុផាន់ណា អ្នកនាំពាក្យសាលាដំបូងរាជធានីភ្នំពេញបានឲ្យដឹងថា តុលាការមិនទាន់សម្រេចចោទជននេះនៅឡើយទេ ដោយតុលាការកំពុងប្រមូលផ្ដុំឯកសារ និងភ័ស្តុតាងដែលផ្ដល់ដោយស្នងការប៉ូលិសរាជធានីភ្នំពេញ ហើយនឹងត្រូវការពេលវេលាពិនិត្យ និងស៊ើបអង្កេតបន្ថែមទៀត។
លោក លី សុផាន់ណា ដែលជាព្រះរាជអាជ្ញារងបានថ្លែងប្រាប់អ្នកសារព័ត៌មានថា អយ្យការសាលាដំបូងរាជធានីភ្នំពេញ បានបញ្ជូនខ្លួនជនល្មើសដែលបាញ់សម្លាប់លោក កែម ឡី ទៅឃុំនៅស្នងការដ្ឋាននគរបាលរាជធានីភ្នំពេញ នៅល្ងាចថ្ងៃអង្គារនេះ និងត្រូវនាំខ្លួនសាកសួរ និងសម្រេចការចោទប្រកាន់នៅថ្ងៃពុធ ទី១៣ ខែកក្កដាបន្តទៀត។ លោក លី សុផាន់ណា ជាតំណាងអយ្យការទទួលចាត់ការសំណុំរឿងនេះបានឲ្យដឹងថា ការសួរចម្លើយនេះបានផ្តល់ប្រយោជន៍ និងតម្រុយជាច្រើនសម្រាប់ការស៊ើបអង្កេត និងការចោទប្រកាន់នៅក្នុងរឿងក្តីនេះ។
ជនសង្ស័យខាងលើនេះត្រូវបណ្តាញព័ត៌មានក្នុងស្រុកមួយចំនួនបញ្ជាក់ថា ឈ្មោះអឿត អាង អាយុ៤៤ឆ្នាំ មានទីលំនៅនៅក្នុងភូមិទន្លេស ឃុំនគរភៀស ស្រុកអង្គរជុំ ខេត្តសៀមរាប។ ជនសង្ស័យរូបនេះត្រូវសារព័ត៌មានក្នុងស្រុក រាយការណ៍ថា ធ្លាប់ធ្វើជាទាហាន បួសជាសង្ឃនៅឆ្នាំ២០១២ ហើយត្រូវបានផ្សឹកនៅឆ្នាំ២០១៤ ដោយសារជននេះធ្លាប់យកកាំភ្លើងគំរាមព្រះសង្ឃដទៃទៀតនៅក្នុងវត្តអារាម៕
