ចាងហ្វាងនៃស្ថាប័នសារព័ត៌មានមួយដែលមានឈ្មោះថាខ្មែរខូវឺធីវី (KCTV) បានការពារថា ព័ត៌មានដែលស្ថាប័ននេះបានចុះផ្សាយ កាលពីសប្តាហ៍មុន គឺយោងតាមសម្តីរបស់ប្រជាពលរដ្ឋ។
ស្ថាប័នព័ត៌មាននោះកំពុងរងការព្រមានប្តឹងផ្តល់ពីក្រុមហ៊ុនរបស់លោកឧកញ៉ា ឡេង ណាវ៉ាត្រា ប្រសិនបើស្ថាប័ននោះមិនលុបចោលវីដេអូព័ត៌មាន ដែលបានចុះផ្សាយកាលពីកន្លងទៅ។
កាលពីថ្ងៃទី ២២ និងទី ២៣ ខែធ្នូ ឆ្នាំ ២០២២ ស្ថាប័នសារព័ត៌មានដែលមានគណនីហ្វេសប៊ុកខ្មែរខូវឺធីវី (KCTV Cambodia) បានចុះផ្សាយព័ត៌មានជាឃ្លីបវីដេអូ និងអត្ថបទដែលបានរាយការណ៍ថា ក្រុមហ៊ុនរបស់លោក ឡេង ណាវ៉ាត្រា បានធ្វើផ្លូវចាក់លុបព្រែក និងវាយកម្ទេចស្ពាន នៅឃុំបឹងគ្រំ ស្រុកល្វាឯម ខេត្តកណ្តាល។ ការចុះផ្សាយនេះនាំឱ្យមានប្រតិកម្មពីលោកឧកញ៉ា ឡេង ណាវ៉ាត្រា ដែលបានច្រានចោលការលើកឡើងនេះជាបន្តបន្ទាប់ និងព្រមានប្តឹងសារព័ត៌មានអនឡាញនេះផងដែរ។
លោក មិន ឃឿន ចាងហ្វាងនៃអង្គភាពសារព័ត៌មាន KCTV ប្រាប់វីអូអេនៅថ្ងៃអង្គារនេះថា ស្ថាប័នរបស់លោកត្រូវបានព្រមានប្តឹងពីលោក ឡេង ណាវ៉ាត្រា ក្រោយមានការចុះផ្សាយព័ត៌មាននេះ។ លោកជំរុញឱ្យមានការបកស្រាយពីលោក ឡេង ណាវ៉ាត្រា ព្រមទាំងបង្ហាញឯកសារត្រឹមត្រូវ ដើម្បីឱ្យស្ថាប័នកែតម្រូវ ប្រសិនបើព័ត៌មានដែលបានផ្សាយកាលពីកន្លងទៅ មិនមែនជាការពិត។
លោកថ្លែងថា៖ «ចំពោះការព្រមានប្តឹងរបស់លោក ឡេង ណាវ៉ាត្រា ជាសិទ្ធិរបស់គាត់ ប៉ុន្តែខ្ញុំយល់ថា លោកគួរតែឆ្លើយបំភ្លឺ ឬក៏បង្ហាញឯកសារដែលត្រឹមត្រូវចំពោះទីតាំងនោះ ឬក៏សកម្មភាពទាំងអស់នោះ ទៅកាន់មហាជន ក៏ដូចជាសារព័ត៌មាន ដើម្បីឱ្យយើងខ្ញុំយោងប្រភពទាំងអស់នោះ យោងឯកសារទាំងអស់នោះផ្សាយកែតម្រូវឡើងវិញ ទើបជារឿងល្អ ព្រោះការផ្សាយកន្លងមក ក្រុមការងារយើងបានចុះទៅផ្ទាល់។ យើងបានយោងប្រភពប្រជាពលរដ្ឋ សម្ភាសពួកគាត់ និង[អ្នក]ជំនាញមិនមែន យើងឮគេថា ឬក៏យកប្រភពមិនច្បាស់លាស់ទេ»។
បើតាមលោក មិន ឃឿន ព័ត៌មានដែលស្ថាប័នរបស់លោកបានចុះផ្សាយ ជាការពិត ដោយសារតែវាជាអ្វីដែលប្រជាពលរដ្ឋបានអះអាង ហើយរូបលោកក៏មិនមានហេតុផលណាត្រូវលុបវីដេអូព័ត៌មាននោះវិញឡើយ។ ចាងហ្វាងរូបនេះអះអាងថា លោកនៅមិនទាន់ដឹងថា តើនឹងមានការសម្រុះសម្រួលគ្នាបែបណានៅឡើយទេ ខណៈលោកបានទាក់ទងទៅលោក ឡេង ណាវ៉ាត្រា ដោយផ្ទាល់ តាមប្រព័ន្ធតេឡេក្រាម ដើម្បីសុំជួបនិយាយគ្នាផ្ទាល់ ប៉ុន្តែលោកថា លោក ឡេង ណាវ៉ាត្រា បានបដិសេធ ដោយណែនាំឱ្យពិភាក្សាគ្នាជាមួយមេធាវីរបស់លោកជំនួសវិញ។
ទោះជាយ៉ាងណា លោក មិន ឃឿន បានទទូចឱ្យលោក ឡេង ណាវ៉ាត្រា កុំយករូបភាពអ្នកមិនពាក់ព័ន្ធផ្សេងៗទៀតទៅបង្ហោះជាសាធារណៈ និងសរសេរអត្ថាធិប្បាយ ដោយនាំឱ្យមានការភាន់ច្រឡំពីសាធារណជន។
នៅក្នុងលិខិតជូនដំណឹងមួយរបស់ក្រុមហ៊ុន ឡេង ណាវ៉ាត្រា ទៅកាន់សារព័ត៌មាន«ខ្មែរខូវឺធីវី» ក្រុមហ៊ុនបានស្នើឱ្យលុបវីដេអូ និងអត្ថបទ ជាពិសេសទទូចឱ្យកែតម្រូវព័ត៌មានហើយចុះផ្សាយឡើងវិញ ខណៈព្រមានពីលទ្ធភាពនៃការប្តឹងផ្តល់តាមផ្លូវច្បាប់ ប្រសិនបើមិនមានការកែតម្រូវ។
បើតាមលិខិតចុះថ្ងៃទី ២៣ ខែ ធ្នូ ឆ្នាំ ២០២២ ក្រុមហ៊ុនរបស់លោក ឡេង ណាវ៉ាត្រា បានបញ្ជាក់ថា៖ «ដូច្នេះខ្ញុំស្នើសុំអង្គភាពសារព័ត៌មាន ដែលមានគណនីហ្វេសប៊ុកផេក ខ្មែរខូវឺធីវី (KCTV Cambodia ) អនុវត្តតាមខ្លឹមសារនៃកម្មវត្ថុខាងលើជាបន្ទាន់ ដើម្បីបង្ការកុំឱ្យមានព្យសនកម្មកាន់តែធ្ងន់ធ្ងរ ជាងនេះបន្តទៅទៀត។ ក្រុមហ៊ុនហ្គាឡាក់ស៊ី ណាវ៉ាត្រា គ្រុប នៅតែធ្វើពាក្យបណ្តឹង ដើម្បីសង្គ្រោះសិទ្ធិដែលបានបំពានពីសំណាក់អង្គភាពអ្នកសារព័ត៌មានគណនីហ្វេសបុកផេកខ្មែរខូវឺធីវី (KCTV Cambodia )តាមនីតិវិធីដដែល»។
វីអូអេមិនទាន់អាចសុំការអត្ថាធិប្បាយពីលោក ឡេង ណាវ៉ាត្រា តាមប្រព័ន្ធទូរសព្ទ និងតេឡេក្រាមបាននៅឡើយទេ។
លោក ណុប វី នាយកប្រតិបត្តិសមាគមខេមបូចា លើកឡើងថា ព័ត៌មានដែលមានប្រភពត្រឹមត្រូវជាមូលដ្ឋានមួយនៅក្នុងការជំរុញឱ្យមានការស៊ើបអង្កេត ដើម្បីស្វែងរកការណ៍ពិតពីសំណាក់ភាគីពាក់ព័ន្ធ។ លោកបន្ថែមថា អ្វីដែលក្រុមហ៊ុនគួរតែធ្វើនោះ គឺការបកស្រាយបំភ្លឺពាក់ព័ន្ធនឹងការចុះផ្សាយ។
លោកបញ្ជាក់ថា៖ «ដូច្នេះត្រង់ចំណុចនេះ ក្រុមហ៊ុនគួរតែមានការឆ្លើយបំភ្លឺទៅតាមច្បាប់ស្តីពីរបបសារព័ត៌មាន មិនគួរទៅគំរាមកំហែងប្តឹងផ្តល់។ បើសិនយើងគំរាមកំហែងប្តឹងផ្តល់អ៊ីចឹង ចុះឧទាហរណ៍ថា ក្រុមហ៊ុនដែលរកស៊ីមិនត្រឹមត្រូវទៅរំលោភបំពានដីសាធារណៈហ្នឹង ដែលសុទ្ធតែមិនអាចទទួលរងនូវការសរសេរ ការរិះគន់ឬមួយក៏ការសរសេរព័ត៌មានពីអ្នកសារព័ត៌មានបានអ៊ីចឹងទាំងអស់ ឬមួយក៏យ៉ាងដូចម្តេច?»
ឆ្លើយតបទៅនឹងការចុះផ្សាយរបស់ស្ថាប័នសារព័ត៌មានខាងលើ លោក ឡេង ណាវ៉ាត្រា បានបង្ហោះនៅលើហ្វេសប៊ុករបស់លោក កាលពីថ្ងៃទី ២៥ ខែធ្នូ ឆ្នាំ ២០២២ ថា គម្រោងសាងសង់ផ្លូវនោះ គឺជាគំនិតផ្តួចផ្តើមរបស់រដ្ឋ ដែលលោកថា ដើម្បីប្រយោជន៍សាធារណៈ ខណៈថាក្រុមហ៊ុនមិនបានធ្វើអ្វីខុស ដូចការចុះផ្សាយរបស់សារព័ត៌មានឡើយ។
លោកសរសេរនៅក្នុងន័យដើមថា៖ «សូមសារព័ត៌មានមេត្តាយោគយល់និងកែតម្រូវផង ព្រោះការចុះផ្សាយបែបនេះធ្វើឱ្យប៉ះពាល់ខ្លាំងដល់កិត្តិយស និងផលប្រយោជន៍ក្រុមហ៊ុន បង្កឱ្យមានការយល់ច្រឡំ ធ្វើឱ្យប៉ះពាល់ដល់ជីវភាពបុគ្គលិករាប់ពាន់នាក់ និងបានបំផ្លាញកេរ្តិ៍ឈ្មោះក្រុមហ៊ុន ខាតបង់យ៉ាងធ្ងន់ធ្ងរ។ បើសិនជាបងសារព័ត៌មានមិនកែតម្រូវនោះទេ ជម្រើសចុងក្រោយមានតែបង្ខំចិត្តអនុវត្តតាមផ្លូវច្បាប់ ការពារភាពស្របច្បាប់តែប៉ុណ្ណោះ ព្រោះមិនមែនជារឿងពិត»៕
