ចៅក្រមសហព័ន្ធសហរដ្ឋអាមេរិកមួយរូប បានផ្អាកសំណើរបស់ក្រសួងយុត្តិធម៌ដែលស្នើឲ្យមានការទម្លាក់ចោលបទចោទប្រកាន់ឧក្រិដ្ឋប្រឆាំងនឹងលោក Michael Flynn ដែលជាអតីតទីប្រឹក្សាសន្តិសុខជាតិរបស់រដ្ឋបាលលោកប្រធានាធិបតី Donald Trump ដើម្បីទុកឱកាសឲ្យអ្នកជំនាញផ្នែកច្បាប់មកពីក្រៅ អាចជជែកដេញដោលប្រឆាំងនឹងការសម្រេចរបស់ក្រសួងយុត្តិធម៌នេះ។
លោកចៅក្រម Emmet Sullivan បានបញ្ជាក់កាលពីល្ងាចថ្ងៃអង្គារម្សិលមិញថា អ្នកជំនាញផ្នែកច្បាប់ដែលមិនពាក់ព័ន្ធនឹងសំណុំរឿងនេះ នឹងអាចដាក់អំណះអំណាងរបស់ខ្លួនមកកាន់តុលាការ ហើយលោកនឹងរៀបចំពេលវេលាដើម្បីស្ដាប់អំណះអំណាងទាំងនោះ «នៅពេលសមស្របណាមួយ»។
លោកចៅក្រម Sullivan អាចសម្រេចហៅសាក្សីឲ្យផ្ដល់សក្ខីកម្ម និងឆ្លើយសំណួរអំពីការសម្រេចរបស់ក្រសួងយុត្តិធម៌ កាលពីសប្ដាហ៍មុន នៅក្នុងការទម្លាក់ការចោទប្រកាន់ប្រឆាំងនឹងលោក Flynn និងអាចបើកសំណុំរឿងនេះទាំងស្រុងឡើងវិញ។
លោក Flynn បានសារភាពកំហុសចំពោះការចោទប្រកាន់ថា បានកុហកទីភ្នាក់ងារ FBI អំពីការពិភាក្សារបស់លោកជាមួយនឹងឯកអគ្គរដ្ឋទូតរុស្ស៊ីប្រចាំសហរដ្ឋអាមេរិក នៅក្នុងអំឡុងពេលដំណាក់កាលអន្តរកាលរវាងរដ្ឋបាលលោកប្រធានាធិបតី Barack Obama និងរដ្ឋបាលលោកប្រធានាធិបតី Donald Trump អំពីការបន្ធូរបន្ថយការដាក់ទណ្ឌកម្មរបស់សហរដ្ឋអាមេរិក។
ការចោទប្រកាន់លើលោក Flynn នេះ គឺជាផ្នែកមួយនៃការស៊ើបអង្កេតរបស់រដ្ឋអាជ្ញាពិសេសលោក Robert Mueller អំពីការជ្រៀតជ្រែករបស់ប្រទេសរុស្ស៊ី នៅក្នុងការបោះឆ្នោតប្រធានាធិបតីអាមេរិកឆ្នាំ ២០១៦៕
