លោក John Kerry រដ្ឋមន្ត្រីការបរទេសសហរដ្ឋអាមេរិកកំពុងស្ថិតនៅក្នុងទីក្រុង ណៃរ៉ូប៊ី ប្រទេសកេនយ៉ា ដែលនៅទីនោះ លោកនឹងពិភាក្សាជាមួយរដ្ឋមន្ត្រីការបរទេសមកពីបណ្ដាប្រទេសនៅភាគខាងកើតទ្វីបអាហ្វ្រិក ដើម្បីរកវិធីការពារប្រទេសស៊ូដង់ខាងត្បូងកុំឲ្យធ្លាក់ចូលទៅក្នុងសង្គ្រាមស៊ីវិលម្ដងទៀត។
លោក Kerry បានចាប់ផ្ដើមដំណើរទស្សនកិច្ចរបស់លោកនៅថ្ងៃចន្ទនេះ ដោយបានប្រជុំពិភាក្សាជាមួយលោកប្រធានាធិបតីកេនយ៉ាលោក Uhuru Kenyatta មុនពេលលោកជួបប្រជុំជាមួយរដ្ឋមន្ត្រីការបរទេសផ្សេងៗទៀត ដើម្បីធ្វើយ៉ាងណាធានាឲ្យបានថា សន្តិភាពត្រូវបានរក្សាបាននៅក្នុងប្រទេសស៊ូដង់ខាងត្បូង ដែលជាប្រទេសទើបបង្កើតថ្មីបំផុតនៅក្នុងពិភពលោក។
ប្រទេសស៊ូដង់ខាងត្បូងមានភាពចលាចលមិនចេះចប់មិនចេះហើយ ចាប់តាំងពីប្រទេសនេះទទួលបានឯករាជ្យពីប្រទេសស៊ូដង់នៅឆ្នាំ ២០១១ មក។ សង្គ្រាមស៊ីវិល អំពើហិង្សា និងជម្លោះព្រំដែនជាមួយប្រទេសស៊ូដង់ បានធ្វើឲ្យប្រទេសស៊ូដង់ខាងត្បូង ដែលជាប្រទេសសម្បូរប្រេងមួយនេះ មានការលំបាកក្នុងការធ្វើឲ្យខ្លួនរីកចម្រើនជឿនលឿនទៅមុខ។
លោក Kerry និងរដ្ឋមន្ត្រីការបរទេសផ្សេងទៀតមកពីបណ្ដាប្រទេសភាគខាងកើតនៃទ្វីបអាហ្វ្រិក ក៏មានគម្រោងពិភាក្សាពីស្ថានការណ៍នៅក្នុងប្រទេសសូម៉ាលីផងដែរ ដែលប្រទេសនេះនឹងមានការបោះឆ្នោតសភា និងការបោះឆ្នោតរើសប្រធានាធិបតីនៅពេលខាងមុខ ដើម្បីឲ្យប្រទេសនេះមានស្ថិរភាពឡើងវិញ។
នៅចុងសប្ដាហ៍នេះ លោក Kerry នឹងធ្វើទស្សនកិច្ចទៅកាន់ប្រទេសនីហ្សេរីយ៉ា ដែលនៅទីនោះ ពួកក្រុមភេរវករ Boko Haram បានសម្លាប់មនុស្សអស់ជាង ២ ម៉ឺននាក់មកហើយតាំងពីឆ្នាំ ២០០៩ មក។ ហើយបន្ទាប់មក លោកនឹងធ្វើទស្សនកិច្ចនៅក្នុងប្រទេសអារ៉ាប៊ីសាអ៊ូឌីត ដែលប្រទេសនេះជាប្រទេសដឹកនាំក្រុមសម្ព័ន្ធមិត្តអារ៉ាប់ប្រឆាំងនឹងពួកឧទ្ទាម Huthi នៅក្នុងប្រទេសយ៉េម៉េន៕
