ភ្ជាប់​ទៅ​គេហទំព័រ​ទាក់ទង

លោក ឃែរី ហៅ​ការ​រីកចម្រើន​នៅ​ក្នុង​ប្រទេស​កម្ពុជា ថា​មាន​«លក្ខណៈ​គួរ​ឲ្យ​កត់​សម្គាល់​គួរសម»

  • សាយ មុន្នី

លោក John Kerry រដ្ឋមន្ត្រី​ការ​បរទេស​សហរដ្ឋ​អាមេរិក ចាប់​ដៃ​ជាមួយ​លោក​ ហោ ណាំហុង រដ្ឋមន្ត្រី​ការ​បរទេស​កម្ពុជា នៅ​មុន​កិច្ច​ប្រជុំ​ទ្វេភាគី​នៅ​ក្រសួង​ការបរទេស​កម្ពុជា​នៅ​រាជធានី​ភ្នំពេញ​កាល​ពី​ថ្ងៃ​អង្គារ​ទី​២៦ ខែ​មករា ឆ្នាំ​២០១៦។

លោក ឃែរី កំពុង​ស្ថិត​នៅ​ក្នុង​ប្រទេស​កម្ពុជា ដែល​ជា​ប្រទេស​ទី​ពីរ​​ក្នុង​ដំណើរ​បំពេញ​ទស្សនកិច្ច​បី​ប្រទេស​របស់​លោក ក្នុង​តំបន់​អាស៊ី​នៅ​សប្តាហ៍​នេះ។

រដ្ឋមន្ត្រី​ការបរទេស​អាមេរិក លោក ចន ឃែរី បាន​ចាត់​ទុក​ការ​រីក​ចម្រើន​នៅ​ក្នុង​ប្រទេស​កម្ពុជា ក្រោយ​សម័យ​ខ្មែរ​ក្រហម ថា​«មាន​លក្ខណៈ​គួរ​ឲ្យ​កត់​សម្គាល់​គួរសម»។

លោក​ថ្លែង​បែប​នេះ​ទៅ​កាន់​សមភាគ​ី​កម្ពុជា​របស់​លោក គឹ​លោក​រដ្ឋ​មន្ត្រី​ការបរទេស​ ហោ ណាំហុង នៅ​មុន​កិច្ច​ប្រជុំ​របស់​លោក​ទាំង​ពីរ​ ក្នុង​រាជធានី​ភ្នំពេញ​ នៅ​ថ្ងៃ​អង្គារ​នេះ។ នេះ​យោង​តាម​សេចក្តី​ប្រកាស​ព័ត៌មាន​របស់​ក្រសួង​ការបរទេស​អាមេរិក ដែល​បាន​ចេញ​ផ្សាយ​នៅ​ថ្ងៃ​នេះ។

លោក ឃែរី មាន​ប្រសាសន៍​ទៅកាន់​លោក​ហោ ណាំហុង​ថា ​«កម្ពុជា​បាន​រំកិល​ខ្លួន​ពី​ភាព​ក្រីក្រ​តោកយ៉ាក ពី​ប្រទេស​ដែល​មាន​សេដ្ឋកិច្ចដ៏​តូច​មួយ ទៅ​ជា​ប្រទេស​ដែល​មាន​សេដ្ឋកិច្ច​ រីកចម្រើន​គួរ​ឲ្យ​កត់​សម្គាល់​ជា​ខ្លាំង ហើយ​កម្ពុជា​ក៏​បាន​ទាញប្រជាជន​របស់​ខ្លួន​ជាច្រើន​ឲ្យ​រួច​ផុត​ពី​ភាព​ក្រីក្រ​ដែរ»។

ប្រទេស​កម្ពុជា​បាន​ធ្លាក់​ខ្លួន​ពី​ប្រទេស​ដែល​មាន​សេដ្ឋកិច្ច​រីកចម្រើន​ជាងគេ​បំផុត​មួយ​នៅ​តំបន់​អាស៊ី​ក្នុង​អំឡុង​ទសវត្ស​ឆ្នាំ​១៩៦០ទៅ​ជា​ប្រទេស​ក្រីក្រ​ជាង​គេ​បំផុត​មួយ​នៅ​លើ​ពិភពលោក​ ក្នុង​រយៈពេល​ជាង​បី​ទសវត្សចុង​ក្រោយ​នេះ ដោយសារ​តែ​សង្គ្រាម​ និង​ការ​វាយ​ប្រយុទ្ធ​គ្នា​ក្នុង​ស្រុក ដោយរួមទាំងសម័យ​ខ្មែរក្រហម​ដែល​បាន​បន្សល់​ទុក​សោកនាដកម្ម​និង​ការ​ឈឺចាប់​ខ្លោចផ្សា​យ៉ាង​ច្រើន​ក្នុង​ប្រទេស​នេះ​ផងដែរ​។​

លោក ឃែរី ដែល​បាន​ដើរតួ​នាទី​យ៉ាង​សំខាន់​មួយ​នៅ​ក្នុង​ការ​ចូល​រួម​ជួយ​បង្កើត​សាលាក្តី​ខ្មែរក្រហម​ក្នុង​ប្រទេស​កម្ពុជា​ដែរ​នោះបាន​ថ្លែង​ថា សហរដ្ឋ​អាមេរិក រំពឹង​ថា នឹង​បន្ត​ធ្វើ​ការ​ជាមួយ​កម្ពុជា​បន្ថែម​ទៀត លើ​វិស័យ​សុខាភិបាល បរិស្ថាន និង​លើ​គម្រោង​គំនិត​ផ្តួច​ផ្តើម​ទន្លេ​មេគង្គ ព្រមទាំង​លើ​បញ្ហា​សន្តិសុខ​នៅ​ក្នុង​តំបន់​ផងដែរ។

លោក ឃែរី កំពុង​ស្ថិត​នៅ​ក្នុង​ប្រទេស​កម្ពុជា ដែល​ជា​ប្រទេស​ទី​ពីរក្នុង​ដំណើរ​បំពេញ​ទស្សនកិច្ច​បី​ប្រទេស​របស់​លោក ក្នុង​តំបន់​អាស៊ី​នៅ​សប្តាហ៍​នេះ។

ខណៈ​នៅ​ក្នុង​ប្រទេស​កម្ពុជា លោក ឃែរី គ្រោង​នឹង​ជួប​ពិភាក្សា​ជា​មួយ​ភាគី​កម្ពុជា លើ​បញ្ហា​មួយ​ចំនួន រួម​មាន​ពាណិជ្ជកម្ម​ទ្វេភាគី និង​ការ​ត្រៀម​រៀបចំ​ជា​មុន សម្រាប់​កិច្ច​ប្រជុំ​កំពូល​អាស៊ាន~អាមេរិក ដែល​នឹង​ត្រូវ​ធ្វើ​ឡើង​នៅ​រដ្ឋ​កាលីហ្វនីញ៉ា​ សហរដ្ឋ​អាមេរិក នៅ​ពាក់​កណ្តាល​ខែ​កុម្ភៈ​ខាង​មុខ ដោយ​មាន​ប្រធានាធិបតី​អាមេរិក លោក បារ៉ាក់ អូបាម៉ា នឹង​ធ្វើ​ជា​ម្ចាស់​ផ្ទះ​ទទួល​ចាត់ចែង​កិច្ច​ប្រជុំ​កំពូល​នេះ។

​ក្រៅ​ពី​ជំនួប​ជា​មួយ​រដ្ឋមន្ត្រី​ការបរទេស​កម្ពុជា និង​លោក​នាយក​រដ្ឋ​មន្ត្រី​ ហ៊ុន សែន​ហើយ​នោះ លោក​ឃែរី ក៏​ជួប​ជាមួយ​មន្ត្រី​បក្ស​ប្រឆាំង និង​តំណាង​អង្គការ​សង្គមស៊ីវិល​នៅ​កម្ពុជា​ផងដែរ មុន​ពេល​លោក ធ្វើ​ដំណើរ​បន្ត​ទៅ​ទីក្រុង​ប៉េកាំង​ ដែល​នៅទីនោះ រដ្ឋ​មន្ត្រីការ​បរទេស​អាមេរិក​រូប​នេះ គ្រោង​នឹង​ជួប​ជាមួយ​ភាគី​ចិន ដើម្បី​ពិភាក្សា​ពី​បញ្ហា​បាញ់​សាកល្បង​អាវុធ​នុយក្លេអ៊ែរ​របស់​កូរ៉េ​ខាង​ជើង និង​បញ្ហា​ជម្លោះ​សមុទ្រ​ចិន​ខាង​ត្បូង​ជា​ដើម៕

XS
SM
MD
LG