រដ្ឋមន្ត្រីជប៉ុនបួននាក់បានដាក់ពាក្យលាលែងពីតំណែងនៅថ្ងៃព្រហស្បតិ៍នេះនៅពេលលោកនាយករដ្ឋមន្ត្រី Fumio Kishida ដែលគ្មានប្រជាប្រិយភាពកំពុងជាប់វិលវល់នឹងរឿងអាស្រូវពុករលួយធំមួយនៅក្នុងគណបក្សគ្រប់គ្រងប្រទេស។
វិបត្តិគណៈរដ្ឋមន្ត្រីនេះមានឡើងនៅក្រោយមានការចោទប្រកាន់អំពីរឿងពុករលួយមានទឹកប្រាក់៣,៤លានដុល្លារនៅក្នុងគណបក្សប្រជាធិបតេយ្យសេរីនិយមមានបក្ខពួកច្រើនដែលបានគ្រប់គ្រងប្រទេសជប៉ុនមានសេដ្ឋកិច្ចធំទីបីក្នុងពិភពលោកច្រើនទសវត្សរ៍មកហើយ។
របាយការណ៍បណ្តាញសារព័ត៌មានចែងថាក្រុមព្រះរាជអាជ្ញានឹងចាប់ផ្តើមឆ្មក់ចូលការិយាល័យនិងសាកសួរចម្លើយសមាជិកសភារាប់សិបនាក់នៅចុងសប្តាហ៍នេះ។
អគ្គលេខាធិការគណៈរដ្ឋមន្ត្រីលោក Hirokazu Matsuno បានបញ្ជាក់ថាលោកចុះចេញពីតំណែងហើយថារដ្ឋមន្ត្រីក្រសួងសេដ្ឋកិច្ចនិងឧស្សាហកម្មលោក Yasutoshi Nishimura រដ្ឋមន្ត្រីក្រសួងមហាផ្ទៃលោក Junji Suzuki និងលោក Ichiro Miyashita រដ្ឋមន្ត្រីក្រសួងកសិកម្មបានដាក់ពាក្យលាលែងពីតំណែងដែរ។
លោក Matsuno ដែលជាប្រធានអ្នកនាំពាក្យរដ្ឋាភិបាលបាននិយាយប្រាប់ក្រុមអ្នកកាសែតថាលោកស្រី Michiko Ueno ទីប្រឹក្សាពិសេសរបស់នាយករដ្ឋមន្ត្រីនិងអនុរដ្ឋមន្ត្រីប្រាំនាក់ក៏ចាកចេញពីតំណែងដែរ។
លោក Nishimura បានថ្លែងប្រាប់ពួកអ្នកកាសែតថា«ការសង្ស័យរបស់សាធារណជនមាននៅជុំវិញខ្ញុំអំពីមូលនិធិនយោបាយដែលនាំឱ្យមានការមិនទុកចិត្តរដ្ឋាភិបាល។ នៅពេលមានការស៊ើបអង្កេត ខ្ញុំយល់ថាខ្ញុំត្រូវធ្វើអ្វីដែលត្រូវធ្វើ»។
លោក Kishida បាននិយាយមួយថ្ងៃមុននេះថាលោកនឹងដោះស្រាយការចោទប្រកាន់នេះ«ដោយចំពោះមុខ»។
លោកបានពោលប្រាប់អ្នកសារព័ត៌មានថា៖«ខ្ញុំនឹងប្រឹងប្រែងដូចដុំភ្លើងមួយនឹងដឹកនាំគណៈបក្សប្រជាធិបតេយ្យសេរីនិយម ឱ្យស្តារការទុកចិត្តរបស់សាធារណជនវិញ»៕
