នាយករដ្ឋមន្ត្រីជប៉ុន លោក Yoshihide Suga បានថ្លែងថា ជ័យជម្នះជាប្រវត្តិសាស្ត្ររបស់ជនរួមជាតិរបស់លោកគឺលោក Hideki Matsuyama នៅឯការប្រកួតកីឡាវាយកូនគោល The Masters នៅសហរដ្ឋអាមេរិកគឺជារឿង«ដ៏អស្ចារ្យ»។
លោក Matsuyama អាយុ ២៩ ឆ្នាំ បានក្លាយជាកីឡាករវាយកូនគោលកំណើតអាស៊ីដំបូង និងជាជនជាតិជប៉ុនដំបូងបំផុត ដែលបានឈ្នះការប្រកួតដ៏ល្បីល្បាញនៅក្លឹប Augusta National Golf Club ក្នុងរដ្ឋ Georgia សហរដ្ឋអាមេរិក។ លោក Matsuyama បានយកឈ្នះកីឡាករអាមេរិកលោក Will Zalatoris។
នាយករដ្ឋមន្ត្រីជប៉ុនលោក Suga ថ្លែងថា ការណ៍ដែលជប៉ុនកំពុងប្រឈមយ៉ាងលំបាកចំពោះវិបត្តិជំងឺរាតត្បាតកូវីដ១៩ ធ្វើឱ្យជ័យជម្នះរបស់លោក Matsuyama កាន់តែមានអត្ថន័យថែមទៀត ដោយផ្តល់ដល់ពលរដ្ឋជប៉ុននូវ «ភាពក្លាហាននិងកម្លាំងជំរុញចិត្ត»។
ស្ថានទូតសហរដ្ឋអាមេរិកប្រចាំនៅប្រទេសជប៉ុនបានសរសេរសារតាមបណ្តាញ Twitter ដោយមានភា្ជប់វីដេអូបង្ហាញលោក Matsuyama លើកដៃសងខាងអបអរនិងពាក់អាវពណ៌បៃតងសម្រាប់ជ័យជម្នះនោះថា៖ «សូមអបអរសាទរចំពោះលោក Hideki Matsuyma ដែលជាកីឡាករវាយកូនគោលដំបូងរបស់ជប៉ុនដែលបានឈ្នះ The Masters ដែលជាការប្រកួតកីឡាវាយកូនគោលដ៏អស្ចារ្យបំផុតរបស់សហរដ្ឋអាមេរិក!»
នៅពេលត្រូវបានគេសួរ លោក Matsuyama មិនព្រមទទួលថាលោកជាកីឡាករវាយកូនគោលដ៏អស្ចារ្យជាងគេរបស់ជប៉ុននោះទេ។ ប៉ុន្តែលោកទទួលស្គាល់ថា៖ «ខ្ញុំជាអ្នកទី១ដែលបានឈ្នះការប្រកួតធំមួយ ហើយបើនេះជាលក្ខខណ្ឌនោះ គឺខ្ញុំបានសម្រេចវាហើយ»។
ជ័យជម្នះរបស់លោក Matsuyama ជាជ័យជម្នះទី២របស់កីឡាករវាយកូនគោលជប៉ុននៅក្នុងការប្រកួតនៅក្លឹប Augusta នៅខែនេះ។ កាលពីសប្តាហ៍មុន កីឡាការិនីជប៉ុន អ្នកស្រី Tsubasa Kajitani បានឈ្នះនៅការប្រកួតកីឡាករមិនអាជីព Augusta National Women’s Amateur។ លោក Matsuyama ផ្ទាល់ក៏ធ្លាប់បានចូលរួមប្រកួតជាកីឡាករមិនអាជីពនៅ The Masters កាលពីមួយទសវត្សរ៍មុនដែរ។
កន្លងមកមានស្ត្រីជប៉ុនពីររូបហើយដែលបានឈ្នះការប្រកួតកីឡាវាយកូនគោលធំៗ ដែលរួមមាន អ្នកស្រី Chako Higuchi ដែលបានឈ្នះការប្រកួត PGA Championship នៅឆ្នាំ១៩៧៧ និងអ្នកស្រី Hinako Shibuno ដែលបានឈ្នះការប្រកួតរបស់អង់គ្លេស Women’s British Open នៅឆ្នាំ២០១៩៕
ប្រែសម្រួលដោយលោក សឹង សុផាត
