ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ប្រទេស​ជប៉ុន​បានចុះហត្ថលេខា​ផ្តល់ជំនួយ​ជាង​៩០លាន​ដុល្លារ​ដល់កម្ពុជា​


រដ្ឋមន្រ្តី​ការបរទេស​ជប៉ុន លោក Taro Kono ថ្លែង​នៅ​ក្នុង​កិច្ច​សម្ភាសន៍​ជាមួយ​ទីភ្នាក់ងារព័ត៌មាន​នៅ​ក្រសួង​ការបរទេស​ក្នុង​ទីក្រុង​តូក្យូ​ប្រទេស​ជប៉ុន កាលពី​ថ្ងៃទី​២៧ មីនា ២០១៨។

នៅថ្ងៃអាទិត្យនេះ​ ប្រទេស​ជប៉ុនបានចុះ​ហត្ថលេខា​លើកិច្ច​ព្រមព្រៀង​កម្ចី​និង​ជំនួយ​ឥត​សំណង​ជា​មួយ​ប្រទេស​កម្ពុជា​ដែលមាន​ទឹកប្រាក់​ជាង​៩០​លានដុល្លារ​ ទោះបីមាន​ការ​ព្រួយ​បារម្ភ​ពីសហ​គមន៍​អន្តរជាតិ​អំពី​ការបង្ក្រាប​របស់លោក​នាយក​រដ្ឋមន្ត្រី ​ហ៊ុន សែន​ លើក្រុម​អ្នក​រិះគន់​រដ្ឋាភិបាល​មុនការ​បោះឆ្នោត​នៅខែ​កក្កដា​ក៏ដោយ។​

លោក Taro Kono ​រដ្ឋមន្ត្រី​ក្រសួងការ​បរទេស​ជប៉ុន និង​លោក​ប្រាក់ សុខុន ​រដ្ឋមន្ត្រីក្រសួង​ការបរទេស​កម្ពុជា​បានចុះ​ហត្ថ​លេខាលើជំនួយ​ឥតសំណង​ចំនួន​៤លាន​៦សែន​ដុល្លារ​និងប្រាក់កម្ចី ៨៦ លានដុល្លារ​សម្រាប់​គម្រោង​សេដ្ឋកិច្ច​និង​អគ្គិសនី​នៅក្នុង​រាជធានី​ភ្នំពេញ។

​គណបក្ស​ប្រឆាំងគឺ​គណបក្ស​សង្គ្រោះជាតិ​ត្រូវបានរំលាយ​នៅក្នុងខែវិច្ឆិកា​តាម​សំណើ​របស់​រដ្ឋាភិបាល​ដែល​ជំរុញឱ្យ​បណ្តាប្រទេស​លោកខាង​លិចខ្លះថ្កោលទោស​ការបង្ក្រាប​នេះ​ ហើយ​បានកាត់​បន្ថយ​ជំនួយ​និងដាក់​បម្រាមទិដ្ឋាការ​ទៅ​លើសមាជិក​គណបក្សកាន់​អំណាច​ខ្លះ។

ក្រុមសិទ្ធិ​មនុស្ស​និងសមាជិក​គណបក្ស​ប្រឆាំង​បានជំរុញ​ឱ្យរដ្ឋាភិបាល​ក្រុងតូក្យូ​ប្រកាន់​ជំហរ​រឹងមាំ​ប្រឆាំង​លោក ហ៊ុន សែន ​ប៉ុន្តែប្រទេស​ជប៉ុន​បាន​និយាយ​ថា ​ខ្លួននឹង​បន្តផ្តល់​ការគាំទ្រ​ដល់ការ​បោះ​ឆ្នោត​ហើយនឹង​មិន​ជ្រៀតជ្រែក​នៅក្នុងអ្វី​ដែល​ជប៉ុន​និយាយ​ថា​ ជា​កិច្ចការ​ផ្ទៃក្នុង​របស់កម្ពុជា​នោះ​ទេ។​ ​

លោក ហ៊ុន សែន ​បានសរសើរ​ជប៉ុន​សម្រាប់​ការផ្តល់​ជំនួយ​ហិរញ្ញវត្ថុនៅថ្ងៃ​អាទិត្យ​នេះ​ ​ហើយ​លោក​វាយ​ប្រហារ​អ្នករិះគន់។ ​លោក ហ៊ុន សែន​ បាន​និយាយ​នៅលើ​ទំព័រហ្វេស​ប៊ុកថា ​«នៅពេល​ដែល​ប្រទេសជប៉ុន ​ជាមិត្តភក្តិ ​ផ្តល់ជំនួយ​ដល់កម្ពុជា ​មនុស្ស​អាក្រក់​ខ្លះ​អាច​បំពុល​ព័ត៌មាន​ដូច​ដែលពួក​គេបាន​ធ្វើ»។

នៅក្នុង​ជំនួប​ជាមួយ​លោក ហ៊ុន សែននៅ​ថ្ងៃអាទិត្យនេះលោក Kono បាន​និយាយ​ថា​ ជប៉ុន​នឹង​ជួយ​ប្រទេស​កម្ពុជា​ឱ្យក្លាយជា​ប្រទេស​មាន​ប្រាក់ចំណូល​មធ្យម​នៅត្រឹម​ឆ្នាំ ២០៣០។​ នេះបើតាម​លោក​អៀង សុផល្លែត​ ជំនួយ​ការ​របស់​លោកហ៊ុន សែន។​

នៅក្នុង​សេចក្តីថ្លែង​ការណ៍មួយ​កាលពីពេល​ថ្មីៗ​នេះ ​លោក Kentaro Sonoura ទីប្រឹក្សា​របស់​លោក ​Shinzo Abe ​នាយក​រដ្ឋមន្ត្រីជប៉ុន ​បាន​ជំរុញ​ឱ្យ​គូប្រជែង​នយោបាយ​នៅកម្ពុជា​ធ្វើការ​ចរចា​ដើម្បី​បញ្ចប់វិបត្តិ​នយោបាយ៕

XS
SM
MD
LG