ប្រទេសជប៉ុនដែលជាប្រទេសគាំទ្រការអភិវឌ្ឍសេដ្ឋកិច្ចនៅតំបន់អាស៊ីអាគ្នេយ៍ជាយូរអង្វែងមកហើយនោះ កំពុងតែបន្ថែមវត្តមានរបស់ខ្លួននៅក្នុងតំបន់នេះ ខណៈដែលចិនបានបង្កើនវត្តមានរបស់ខ្លួននៅក្នុងសមាគមប្រជាជាតិអាស៊ីអាគ្នេយ៍ដែលមានសមាជិកចំនួន១០ប្រទេសនោះ។
រដ្ឋាភិបាលក្រុងតូក្យូក៏កំពុងតែបង្កើនតួនាទីរបស់ខ្លួននៅក្នុងការពិភាក្សាដេញដោលអំពីសន្តិសុខនៅតំបន់អាស៊ីអាគ្នេយ៍ផងដែរ ជាពិសេសនៅសមុទ្រចិនខាងត្បូង ដែលជប៉ុនបាននិយាយ ជម្លោះនេះត្រូវតែដោះស្រាយដោយប្រើប្រាស់នីតិរដ្ឋនិងមិនត្រូវប្រើប្រាស់កងកម្លាំងយោធានោះទេ។
កាលពីដើមសប្តាហ៍នេះ ប្រទេសជប៉ុនបានប្រកាសអំពីកម្មវិធីរយៈពេល៣ឆ្នាំមួយដែលមានទឹកប្រាក់៦,៨ពាន់លានដុល្លារ ដើម្បីអភិវឌ្ឍហេដ្ឋារចនាសម្ព័ន្ធក្នុងតំបន់នៅទូទាំងអនុតំបន់ទន្លេមេគង្គ ដែលរួមបញ្ចូលទាំងផ្នែកមួយចំនួននៃប្រទេសវៀតណាម ប្រទេសឡាវ និងប្រទេសថៃផងដែរ។
ដោយថ្លែងនៅក្នុងសាកលវិទ្យាល័យមួយក្នុងទីក្រុងបាងកក លោក Fumio Kishida រដ្ឋមន្ត្រីក្រសួងការបរទេសជប៉ុនបានមានប្រសាសន៍ថា គំនិតផ្តួចផ្តើមទំនាក់ទំនងរវាងជប៉ុននិងប្រទេសនៅតាមបណ្តោយទន្លេមេគង្គមានគោលបំណងបង្កើតក្របខណ្ឌមួយ ដែលគាំទ្រដល់កិច្ចខិតខំប្រឹងប្រែងក្នុងការធ្វើឲ្យប្រសើរឡើងនូវហេដ្ឋារចនាសម្ព័ន្ធ ដូចជា ស្ពាននិងបណ្តាញផ្លូវអយស្ម័យយាន ការអភិវឌ្ឍធនធានមនុស្ស និងគាំទ្រដល់តំបន់ទន្លេមេគង្គផងដែរ។
កម្មវិធីចុងក្រោយបង្អស់របស់ជប៉ុនសម្រាប់តំបន់ទន្លេមេគង្គត្រូវបានធ្វើឡើង បន្ទាប់ពីកញ្ចប់ថវិកាកាលពីឆ្នាំ២០១៣ ដែលផ្តល់ទឹកប្រាក់ចំនួន២លានលានយេនដល់កម្មវិធី ជំនួយផ្នែកអភិវឌ្ឍន៍ជាផ្លូវការ ដែលហៅកាត់ថា (ODA) ដល់បណ្តាប្រទេសនៅអាស៊ានក្នុងរយៈពេល៥ឆ្នាំ។ ប្រទេសជប៉ុនក៏គាំទ្រការធ្វើសមាហរណកម្មតំបន់អាស៊ានដោយផ្តល់ជាទឹកប្រាក់ចំនួន១០០លានដុល្លារផងដែរ៕
