គណៈកម្មាធិការរដ្ឋសភាអាមេរិកស៊ើបអង្កេតកុបកម្មលើវិមានសភាអាមេរិក ដែលមានសមាជិកមកពីគណបក្សប្រជាធិបតេយ្យ ៧ នាក់និងគណបក្សសាធារណរដ្ឋ ២ នាក់ បានសម្ភាសន៍សាក្សីជាង ១.០០០ នាក់ ធ្វើសវនាការជិត ១២ លើក និងប្រមែប្រមូលឯកសាររាប់លានច្បាប់ នៅពេលពួកគេខិតខំបំពេញការងារ ដើម្បីកសាងសំណុំរឿងដ៏ធំបំផុតលើករណីបះបោរកាលពីនៅថ្ងៃទី ៦ ខែមករា ឆ្នាំ ២០២១ លើវិមានសភាអាមេរិក។
ប្រធានគណៈកម្មាធិការ លោក Bennie Thompson ដែលជាតំណាងរាស្ត្រមកពីគណបក្សប្រជាធិបតេយ្យប្រចាំរដ្ឋ Mississippi បានមានប្រសាសន៍ថា គណៈកម្មាធិការនេះនឹងផ្តល់អនុសាសន៍ឲ្យមានការស៊ើបអង្កេតបទព្រហ្មទណ្ឌដល់ក្រសួងយុត្តិធម៌ ដោយស្នើឲ្យមានការកាត់ទោស។ ប៉ុន្តែលោកមិនបានលើកឡើងពីឈ្មោះរបស់ជនដែលនឹងត្រូវកាត់ទោស ឬថាតើអតីតប្រធានាធិបតីលោក Donald Trump នឹងស្ថិតក្នុងចំណោមជនទាំងនេះ ឬយ៉ាងណានោះទេ។
គណៈកម្មាធិការនេះបានផ្តោតការយកចិត្តទុកដាក់លើលោក Trump និងការប្រឹងប្រែងរបស់លោកក្នុងរយៈពេលប៉ុន្មានសប្តាហ៍ មុនហេតុការណ៍វាយប្រហារលើវិមានសភាអាមេរិក ដើម្បីប្រែក្រឡះលទ្ធផលចាញ់ឆ្នោតរបស់លោក Trump ទៅលោក Joe Biden ដែលជាបេក្ខជនប្រធានាធិបតីមកពីគណបក្សប្រជាធិបតេយ្យ ក្នុងដំណើរការបោះឆ្នោតប្រធានាធិបតីឆ្នាំ ២០២០។
វាអាស្រ័យលើក្រុមរដ្ឋអាជ្ញាសហព័ន្ធក្នុងការសម្រេចថាតើនឹងទទួលយកអនុសាសន៍ឲ្យមានដំណើរការកាត់ទោសនេះឬយ៉ាងណា។ ក្រុមសមាជិកសភាបានស្នើឱ្យមានការចោទប្រកាន់លើលោក Trump ដែលក្នុងនោះអាចរួមមានបទរួមគំនិតប្រព្រឹត្តអំពើទុច្ចរិតដើម្បីគៃបន្លំសហរដ្ឋអាមេរិក និងរារាំងដំណើរការផ្លូវការមួយរបស់សភាអាមេរិក។ អនុសាសន៍នានាដោយគណៈកម្មាធិការនេះអាចបន្ថែមសម្ពាធនយោបាយលើក្រសួងយុត្តិធម៌ ខណៈក្រសួងនេះស៊ើបអង្កេតសកម្មភាពរបស់លោក Trump។
នៅថ្ងៃពុធ គណៈកម្មាធិការនេះត្រូវបានគេរំពឹងថានឹងចេញផ្សាយរបាយការណ៍ចុងក្រោយបង្អស់របស់ខ្លួន ដែលអាចរួមមានឯកសាររាប់រយទំព័រស្តីអំពីការរកឃើញលើករណីវាយប្រហារលើវិមានសភាអាមេរិក និងអំពីការប្រឹងប្រែងរបស់លោក Trump ក្នុងការបង្កភាពវឹកវរដល់ដំណើរលទ្ធិប្រជាធិបតេយ្យ។ សមាជិកនានារបស់គណៈកម្មាធិការនេះនឹងពិនិត្យមើលគោលការណ៍សំខាន់ៗនៃការរកឃើញរបស់ពួកគេ នៅក្នុងកិច្ចប្រជុំនៅថ្ងៃចន្ទ។
កាលពីខែមុន រដ្ឋមន្ត្រីក្រសួងយុត្តិធម៌លោក Merrick Garland បានតែងតាំងរដ្ឋអាជ្ញាពិសេសម្នាក់គឺលោក Jack Smith ឱ្យមើលការខុសត្រូវលើដំណើរការស៊ើបអង្កេតលើលោក Trump រួមមានការស៊ើបអង្កេតមួយផ្តោតលើការបះបោរ និងការប៉ុនប៉ងប្រែក្រឡះលទ្ធផលនៃការបោះឆ្នោតប្រធានាធិបតីឆ្នាំ ២០២០។
លោក Thompson ប្រធានគណៈកម្មាធិការ បាននិយាយកាលពីសប្តាហ៍មុនថាគណៈកម្មាធិការស៊ើបអង្កេតកុបកម្មលើវិមានសភាអាមេរិក ក៏នឹងផ្តល់ការអនុញ្ញាតលើអនុសាសន៍ស្នើឲ្យមានដំណើរការកាត់ទោសផ្សេងៗទៀត រួមមានដំណើរការកាត់ទោសពីបទរំលោភបំពានក្រមសីលធម៌ ការរំលោភបំពានច្បាប់ និងការរំលោភបំពានច្បាប់ថវិកាសម្រាប់យុទ្ធនាការឃោសនាបោះឆ្នោត។
លោក Jamie Raskin តំណាងរាស្ត្រមកពីគណបក្សប្រជាធិបតេយ្យប្រចាំរដ្ឋ Maryland ដែលជាសមាជិកម្នាក់នៃគណៈកម្មាធិការនេះ បានមានប្រសាសន៍ប្រាប់ទីភ្នាក់ងារសារព័ត៌មាន Associated Press កាលពីពេលថ្មីៗនេះថា៖ «នឹងមានការកាត់ទោសលើមនុស្សផ្សេងៗគ្នា។ បុគ្គលគ្រប់រូបនឹងទទួលខុសត្រូវចំពោះសកម្មភាពរបស់ពួកគេ»។
អនុសាសន៍ស្តីពីការស្នើឲ្យមានដំណើរការកាត់ទោសត្រូវបានព្រាងដោយសមាជិកសភាបួននាក់របស់គណៈកម្មាធិការនេះ គឺលោក Jamie Raskin លោកស្រី Liz Cheney តំណាងរាស្ត្រមកពីគណបក្សសាធារណរដ្ឋប្រចាំរដ្ឋ Wyoming និងជាអនុប្រធានគណៈកម្មាធិការនេះ លោកស្រី Zoe Lofgren និងលោក Adam Schiff តំណាងរាស្ត្រមកពីគណបក្សប្រជាធិបតេយ្យប្រចាំរដ្ឋ California។ អ្នកទាំងបួននាក់នេះ មានភារកិច្ចផ្សព្វផ្សាយអនុសាសន៍នានារបស់គណៈកម្មាធិការរដ្ឋសភាស៊ើបអង្កេតលើកុបកម្មវិមានសភាអាមេរិក ស្តីអំពីការស្នើឲ្យមានដំណើរការកាត់ទោសទៅកាន់សមាជិកគណៈកម្មាធិការទាំងមូល ដែលគណៈកម្មាធិការនេះនឹងពិចារណានៅថ្ងៃចន្ទ ទី ១៩ ខែធ្នូនេះ៕
ប្រែសម្រួលដោយលោក ឈឹម សុមេធ
