ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ការ​លុប​ចោល​«បម្រាម​ធ្វើ​ដំណើរ»​ក្រោម​រដ្ឋបាល​លោក​ Trump ត្រូវការ​ពេល​ដើម្បី​អនុវត្ត


រូបឯកសារ៖ អ្នកធ្វើដំណើរអន្តជាតិបានមកដល់អាកាសយានដ្ឋានអន្តរជាតិ Washington Dulles នៅទីក្រុង Dulles រដ្ឋ Virginia សហរដ្ឋអាមេរិក កាលពីថ្ងៃទី២៦ ខែមិថុនា ឆ្នាំ២០១៧។

ហាង​កាហ្វេនៅតាម​ផ្លូវ​នេះ​ក្នុង​ក្រុង Tripoli បានបិទ​ ដោយសារ​ការរាត្បាត​នៃវីរុស​កូរ៉ូណា ​ដូច្នេះ Mohammed Abdulwaheb អាយុ ៣៧ ​ឆ្នាំ ទិញ​កាហ្វេ​យក​ទៅ​ផឹក​នៅកន្លែង​ចត​ឡាន។

នៅ​ពេល «​ការហាមប្រាមមិន​ឱ្យ​ធ្វើដំណើរ» ដោយ​សហរដ្ឋ​អាមេរិក ត្រូវបានប្រកាស​ដំបូងដោយ​អតីត​ប្រធានាធិបតី​លោក Donald Trump មនុស្សជាច្រើននាំគ្នា​ហៅ​បម្រាមនេះថា​ជា «ការហាមប្រាមពួក​អ្នក​កាន់​សាសនាឥស្លាម» ពី​ព្រោះវា​ត្រូវបានអនុវត្ត​ដំបូង​ចំពោះ​ប្រទេស ដែលមាន​អ្នកស្រុក​ភាគ​ច្រើន​ជាជន​គោរព​សាសនា​ឥស្លាម​ រួម​បញ្ចូលប្រទេស​លីប៊ី។ បម្រាមនេះត្រូវបានធ្វើឡើង​ នៅ​ក្រោយការ​សន្យា​របស់លោក Trump ដែលថា​លោកនឹង​បិទ​ព្រំដែនមិន​ឱ្យអ្នកកាន់សាសនាឥស្លាម ចូលសហរដ្ឋអាមេរិក។

នៅ​ពេលត្រូវសួរ​ថា​ តើ​ការហាមប្រាម​នេះមាន​ផលប៉ះពាល់បែបណា ​លើ​ជីវិត​របស់លោក លោក Abdulwaheb សញ្ជប់​សញ្ជឹង ហើយ​ពិបាក​ចិត្ត​ក្នុង​ចិត្ត។

លោក Mohammed និយាយ​ថា លោកចង់ទៅ​រៀន​ថ្នាក់ក្រោយ​បរិញ្ញាប័ត្រ​នៅសហរដ្ឋ​អាមេរិក ប៉ុន្តែ​ដោយ​សារការ​ហាមប្រាម​នេះ លោកគ្មាន​ជម្រើស​អ្វី​ក្រៅពីឈប់​ប៉ង​ប្រាថ្នា។

នៅ​ក្រុង Abuja ដែល​ស្ថិត​នៅចម្ងាយ​រាប់ពាន់​គីឡូម៉ែត្រ​ នៅភាគ​ខាង​ត្បូងប្រទេស​នីហ្សេរីយ៉ាលោក Wole Olaoye ដែលជា​អ្នក​កាសែត​នាំ​មុខ​ម្នាក់ក្នុងតំបន់ ​មិន​សូវខ្វល់​ខ្វាយ​ប៉ុន្មាន​ទេ។

កូន​ប្រុសលោក​ត្រូវ​បានទទួល​ឱ្យ​រៀន​ក្នុងកម្មវិធីក្រោយ​បរិញ្ញាប័ត្រ​មួយ​ក្នុង​រដ្ឋ California ខា​ងទ្រឹស្តី​និង​ការ​អនុវត្តន៍ប្រព័ន្ធ​កុំព្យូទ័រ សម្រាប់​បំពេញ​កិច្ចការ​ដែលជាធម្មតាត្រូវធ្វើ​បាន​ដោយបញ្ញារបស់មនុស្ស​ នៅ​ពេល​ប្រទេសនីហ្សេរីយ៉ា ត្រូវបានដាក់បញ្ចូលក្នុងបញ្ជីប្រទេស ដែលស្ថិតក្នុងការ​ហាមប្រាម​នោះ​ កាលពីដើមឆ្នាំ ២០២០។ កូនលោក​មិន​បានទៅ​រៀន​នៅ​សហរដ្ឋអាមេរិក​ទេ។

លោក​ថ្លែងថា៖ «ខ្ញុំ​យល់​ថា សហរដ្ឋ​អាមេរិក​ត្រូវ​សម្រេច​ចិត្ត​ថា​ តើ​ខ្លួន​ចង់​បាន​និស្សិត​បរទេស ​ឬ​មិនចង់។ លោកអ្នក​មិន​អាចឱ្យសាកលវិទ្យាល័យ​លោក​អ្នក សុំឯកសារ​ពិន្ទុពីសាកលវិទ្យាល័យពិនិត្យ​មើល​ពាក្យ​សុំ​ចូល​រៀនសម្រាប់និស្សិត យក​ប្រាក់​តំកល់​ដំបូង ហើយ​ទីបញ្ចប់​និយាយ​ថា ពួក​និស្សិត​ទាំង​នេះមិន​អាច​ទៅ​អាមរិក​បានទេ»។

នៅចម្ងាយ​ប្រមាណ​ ៤ពាន់​គីឡូម៉ែត្រ​ពីទីនេះ​ ក្នុង​ប៉ែក​ខាង​កើតនៃ​ប្រទេសស៊ូដង់ ការ​លុបចោល​ការហាម​ប្រាម​នេះ​ នាំ​ឱ្យ​មានការអបអរសាទរ​នៅ​ក្នុង​ប្រទេស​មួយ​ ដែលបានរងគ្រោះ​យូរ​មក​ហើយ​ដោយសារការដាច់​ទំនាក់​ទំនង​អន្តរជាតិ។

ជា​ច្រើន​ទសវត្សរ៍​មក​ហើយ ប្រទេស​ស៊ូដង់​មិន​គ្រាន់​តែ​ស្ថិត​ក្នុង​បញ្ជី​ប្រទេស​ហាម​មិន​ឱ្យ​ធ្វើដំណើរ​ទៅ​សហរដ្ឋ​អាមេរិក​តែ​ប៉ុណ្ណោះ​ទេ ​តែ​ថែមទាំង​ស្ថិតក្នុងបញ្ជី​រដ្ឋ ​ដែល​សហរដ្ឋ​អាមេរិក​បាននិយាយថា​ឧបត្ថម្ភ​ផ្ចុង​ផ្តើម​អំពើ​ភេរវកម្ម​ថែម​ទៀត​ផង។​ កាល​ពី​ខែ​ធ្នូ ប្រទេស​ស៊ូដង់ក៏​ត្រូវបាន​ដក​ចេញពី​បញ្ជី «ភេរវកម្ម»​ នេះ​ហើយ។

នៅ​ក្នុង​ហាង​កាហ្វេ​មួយ​ក្នុង​ក្រុង Gadarib លោក Mohammded Ahmed ដែល​ជា​បុគ្គលិករដ្ឋការ​អាយុ​ ៣៨ ​ឆ្នាំ​ ទទួល​ស្គាល់​ថា ការណ៍​នេះ​នឹង​ស៊ី​ពេលច្រើន​ តែ​លោកនិយាយ​ថា ចំណាត់ការទាំង​នេះអាច​បង្កើន​វិនិយោគ ការអភិវឌ្ឍន៍​និង​ភាពសំបូរ​រុងរឿងទូទៅ​ក្នុងប្រទេស​ស៊ូដង់។

លោក​ថ្លែងថា៖ «ខ្ញុំ​យល់​ឃើញ​ផ្សេង​វិញ ខ្ញុំ​អាច​ឃើញផល​ប៉ះពាល់ក្នុង​ពេល​យូរ»។

អ្នក​ស្រី Sarah Pierce ដែលជាអ្នក​វិភាគ​គោលនយោបាយ​នៅ​ឯវិទ្យាស្ថានទេសន្តរប្រវេសន៍​ និងដែលមានមូលដ្ឋាន​ក្នុង​រដ្ឋធានីវ៉ាស៊ីនតោន បាននិយាយ​ថា ​ការលុប​ចោល​ការ​ហាមប្រាមមិន​ឱ្យ​ធ្វើ​ដំណើរនេះ ​ក៏​អាច​កែប្រែ​សហរដ្ឋ​អាមេរិក​ឱ្យ​ល្អ​ជាង​មុនផង​ដែរ។

អ្នកស្រី​ថ្លែងថា៖ «អន្តោប្រវេសន៍​ជា​ធនធានធំ​ជាងគេបង្អស់សម្រាប់​សហរដ្ឋ​អាមេរិក។ ​វាជាប្រភព​ធន​ធាន​មួយ ដែលបាន​ជួយ​កសាងប្រទេស​ជាតិ​នេះ ដូច្នេះ​ការ​រារាំងមនុស្សពី​ប្រទេសខ្លះ​មិន​ឱ្យ​ចូល​ម ជា​ការខាតបង់​ធំមួយ​ដល់​សហរដ្ឋ​អាមេរិក។ ​វា​ជា​ការ​ខាតបង់ដល់​ការ​បង្រួប​បង្រួម​គ្រួសារ​ និងជា​ការ​ខាតបង់ដល់​ក្រុម​ពលករ​ និង​អ្វីៗ​ច្រើន​ទៀតដែល​យើង​មិន​អាច​វាស់​វែងបាន»។

អ្នក​ស្រី Pierce ថ្លែង​ថា ​សហរដ្ឋ​អាមេរិក​ត្រូវការពេលវេលា​ដើម្បី​ពិនិត្យ​ជា​ថ្មី​នូវ​ពាក្យសុំ​ទិដ្ឋាការដែល​ត្រូវ​បានបដិសេធនិងពិនិត្យ​មើល​ពាក្យសុំ​ថ្មីៗ ​មុននឹងអ្នក​ធ្វើដំណើរ​មាន​សិទ្ធ​អាច​ធ្វើ​ដំណើរ​មក​កាន់​សហរដ្ឋអាមេរិកបាន។

នៅក្នុង​ប្រទេស​នីហ្សេរីយ៉ាឯណោះវិញ អ្នក​សារព័ត៌មាន​ Olaoye និយាយ​ថា​ សហរដ្ឋ​អាមេរិក​ត្រូវការ​ពេល​ដើម្បី​ស្តារ​កេរ្តិ៍ឈ្មោះរបស់ខ្លួន ​ក្នុងចំណោមពួកអ្នក​ចង់ធ្វើ​ដំណើរ​មក​កាន់សហរដ្ឋអាមេរិក​ ដែលការ​ហាមប្រាម​នេះជា​ការប្រឆាំង​នឹង​ក្រុម​អ្នកកាន់សាសនា​ឥស្លាម ឬ​ជាការរើសអើងពូជសាសន៍។

ក៏ប៉ុន្តែ​លោក​បានថ្លែង​ថា នៅ​ពេល​ណា​ការរាតត្បាត​នៃជំងឺ​កូវីដ១៩ ​ថម​ថយ ហើយ​ពិភពលោក​ពិចារណា​ថា​មាន​សុវត្ថិភាព​ក្នុង​ការ​ធ្វើ​ដំណើរ​ជា​ថ្មី​ទៀត លោក​យល់ថា​ យ៉ាងហោចណាស់​ក្នុងប្រទេសនីហ្សេរីយ៉ា សហរដ្ឋ​អាមេរិក​នឹងក្លាយ​ជា​ប្រទេស​ដែល​អ្នក​ធ្វើ​ដំណើ​រ​ចូល​ចិត្តជា​ថ្មី​ឡើង​វិញ៕

ប្រែសម្រួលដោយលោក ឈឹម សុមេធ

ផែនទីលទ្ធផលការបោះឆ្នោតប្រធានាធិបតីអាមេរិកពីឆ្នាំ ១៩៩២-២០២០

XS
SM
MD
LG