កងទ័ពអ៊ីស្រាអែលបានធ្វើការវាយប្រហារកាលពីថ្ងៃព្រហស្បតិ៍នៅក្នុងតំបន់ហ្កាហ្សានិងភាគខាងត្បូងប្រទេសលីបង់ ខណៈដែលភាពមិនប្រាកដប្រជានៅតែមានអំពីការជំរុញនៅពេលថ្មីៗនេះដើម្បីធ្វើឱ្យសម្រេចបាននូវការឈប់បាញ់គ្នាមួយនៅក្នុងតំបន់ហ្កាហ្សានៅពេលដែលពួកអ្នកចរចាបានធ្វើការដើម្បីដោះស្រាយការខ្វែងគំនិតគ្នារវាងអ៊ីស្រាអែលនិងក្រុមសកម្មប្រយុទ្ធហាម៉ាស់។
ទីភ្នាក់ងារសារព័ត៌មានផ្លូវការប៉ាឡេស្ទីនWAFAបានរាយការណ៍កាលពីថ្ងៃព្រហស្បតិ៍ថាការវាយប្រហាររបស់អ៊ីស្រាអែលនៅក្នុងទីក្រុង Beit Lahiya ភាគខាងជើងតំបន់ហ្កាហ្សាបានសម្លាប់មនុស្សយ៉ាងតិចណាស់ក៏១១នាក់ដែរ។
យោធាអ៊ីស្រាអែលបានរាយការណ៍ថាការវាយប្រហារតាមអាកាសបានត្រូវចំឃ្លាំងផ្ទុកអាវុធមួយកន្លែងនៅជិតបន្ទាយយោធាហាម៉ាស់នៅក្នុងទីក្រុង Gaza City ហើយការវាយប្រហារនេះបានសម្លាប់ពួកសកម្មប្រយុទ្ធនៅក្នុងតំបន់ហ្កាហ្សាភាគកណ្តាល។
ការវាយប្រហារតាមអាកាសមួយទៀតបានដៅលើតំបន់ជាង១០នៅភាគខាងត្បូងប្រ ទេសលីបង់រយៈពេលមួយយប់។ នេះបើតាមកងទ័ពអ៊ីស្រាអែលបញ្ជាក់កាលពីថ្ងៃព្រហស្បតិ៍។ ការវាយប្រហារទាំងនោះបានដៅលើទីកន្លែងដែលត្រូវបានប្រើប្រាស់ដោយក្រុមសកម្មប្រយុទ្ធ Hezbollah។
ប្រធានាធិបតីសហរដ្ឋអាមេរិកលោក Joe Biden និងនាយករដ្ឋមន្ត្រីអ៊ីស្រាអែល លោក Benjamin Netanyahuបាននិយាយកាលពីថ្ងៃពុធអំពីការខំប្រឹងប្រែងដោយសហរដ្ឋអាមេរិកដើម្បីគាំទ្រអ៊ីស្រាអែល«ប្រឆាំងនឹងការគំរាមកំហែងទាំងអស់មកពីប្រទេសអ៊ីរ៉ង់ រួមមានក្រុមហាម៉ាស់ Hezbollah និងហ៊ូធីដែលរណបអ៊ីរ៉ង់ រួមមានការដាក់ពង្រាយយោធាសហរដ្ឋអាមេរិកដែលកំពុងបន្តធ្វើឡើង។ នេះបើតាមសេចក្តីថ្លែង ការណ៍របស់សេតវិមាន។
អង្គការសហប្រជាជាតិបានព្រមានកាលពីថ្ងៃពុធថាបទបញ្ជាជម្លៀសរបស់អ៊ីស្រាអែលនៅក្នុងតំបន់ហ្កាហ្សាកំពុងជំរុញជនស៊ីវិលប៉ាឡេស្ទីនឱ្យចូលក្នុងតំបន់ដែលមានមនុស្សរស់នៅណែនណាន់តាន់តាប់នៅតាមឆ្នេរសមុទ្រហ្កាហ្សា។
បទបញ្ជាថ្មីបំផុតរបស់អ៊ីស្រាអែលគឺឱ្យពលរដ្ឋចាកចេញពីតំបន់ដែលមានមនុស្សរស់នៅក្នុងទីក្រុង Deir al-Balahនៅជិតមន្ទីរពេទ្យដ៏សំខាន់មួយនៅតំបន់ហ្កាហ្សាភាគកណ្តាល និងនៅក្នុងទីក្រុងKhan Younis ក្នុងតំបន់ហ្កាហ្សាភាគខាងត្បូងដែលរួមមានមនុស្សជាង១សែន៥ម៉ឺននាក់។ នេះបើតាមអង្គការសហប្រជាជាតិ៕
ព័ត៌មានខ្លះនៃសេចក្តីរាយការណ៍នេះដកស្រង់ពីទីភ្នាក់ងារសារព័ត៌មាន AP, AFPនិង Reuters
