អ៊ីស្រាអែលបានរាយការណ៍ថាយោធារបស់ខ្លួនចំនួន ២៤នាក់ បានស្លាប់នៅថ្ងៃអង្គារនេះ ក្នុងតំបន់ហ្កាហ្សា ដែលជាថ្ងៃដែលមានទាហានអ៊ីស្រាអែលស្លាប់ច្រើនបំផុតក្នុងមួយថ្ងៃ ចាប់តាំងពីខ្លួនបានបើកយុទ្ធនាការវាយកម្ទេចក្រុមយុទ្ធជនហាម៉ាស់មក។
អ្នកនាំពាក្យកងយោធាអ៊ីស្រាអែលលោកឧត្តមនាវីទោ Daniel Hagari បានប្រាប់ក្រុមអ្នកសារព័ត៌មានថា ពេលទាហានអ៊ីស្រាអែលចំនួន ២១នាក់ កំពុងត្រៀមដាក់បំផ្ទុះអគារពីរកាលពីថ្ងៃចន្ទម្សិលមិញ ក៏មានគ្រាប់មីស៊ីលមួយគ្រាប់ត្រូវបានក្រុមហាម៉ាស់បាញ់ចំរថក្រោះមួយគ្រឿងដែលនៅក្បែរនោះ ដែលធ្វើឱ្យគ្រាប់ដែលបម្រុងដាក់បំផ្ទុះអគារនោះផ្ទុះឡើង ដោយរលំអគារបាក់ទៅលើទាហានអ៊ីស្រាអែល។ ចំណែកទាហានអ៊ីស្រាអែល ៣នាក់ផ្សេងទៀត បានស្លាប់ក្នុងការវាយប្រហារដាច់ដោយឡែកមួយ។
នាយករដ្ឋមន្ត្រីអ៊ីស្រាអែលលោក Benjamin Netanyahu និយាយថា យោធាអ៊ីស្រាអែលបានបើកការស៊ើបអង្កេតលើសោកនាដកម្មនេះហើយ។
រដ្ឋមន្ត្រីការពារជាតិអ៊ីស្រាអែលលោក Yoav Gallant បានបង្ហោះសារលើបណ្តាញសង្គម X ថា វាជា «ពេលព្រឹកដ៏លំបាកដែលពោរពេញដោយការឈឺចាប់»។
កងកម្លាំងអ៊ីស្រាអែលបានធ្វើយុទ្ធនាការបាញ់ផ្លោងយ៉ាងខ្លាំងលើតំបន់ហ្កាហ្សា ខណៈដែលក្រុមមន្ត្រីសុខាភិបាលក្នុងតំបន់នេះ បានចោទអ៊ីស្រាអែលថាបានវាយប្រហារលើអគារសុខាភិបាលជាច្រើនខ្នង។
អង្គការអឌ្ឍច័ន្ទក្រហមប៉ាឡេស្ទីននិយាយថា អ៊ីស្រាអែលបានផ្លោងចំទីស្នាក់ការធំរបស់ខ្លួននៅក្នុងទីក្រុង Khan Younis ស្របគ្នានឹងការវាយប្រហារតាមដ្រូនដ៏ខ្លាំងរបស់អ៊ីស្រាអែលផង ដោយធ្វើឱ្យជនដែលគ្មានទីជម្រកនិងកំពុងស្វែងរកសុវត្ថិភាពនៅក្នុងបរិវេណរបស់អង្គការនេះរងរបួសជាច្រើននាក់។
សហរដ្ឋអាមេរិកកាលពីថ្ងៃចន្ទ បានអំពាវនាវដល់អ៊ីស្រាអែលឱ្យការពារជនស៊ីវិលក្នុងមន្ទីរពេទ្យ៕
ព័ត៌មានខ្លះសម្រាប់សេចក្តីរាយការណ៍នេះត្រូវបានដកស្រង់ពីទីភ្នាក់ងារសារព័ត៌មាន Associated Press, Agence France-Presse និង Reuters ។
វេទិកាបញ្ចេញមតិ