ប្រធានផ្នែកគោលនយោបាយការបរទេសសហភាពអឺរ៉ុបលោក Josep Borrell បាននិយាយនៅថ្ងៃចន្ទនេះថា វិធីដែលអ៊ីស្រាអែលកំពុងធ្វើសង្គ្រាមប្រឆាំងនឹងក្រុមហាម៉ាស់ (Hamas) នៅក្នុងតំបន់ហ្កាហ្សា (Gaza) គឺ «កំពុងបណ្ដុះគំនុំរាប់ជំនាន់»។
លោក Borrell បាននិយាយដូច្នេះនៅមុនកិច្ចប្រជុំដាច់ដោយឡែកពីគ្នាដែលសហភាពអឺរ៉ុបធ្វើឡើងនៅថ្ងៃចន្ទនេះជាមួយនឹងរដ្ឋមន្ត្រីការបរទេសអ៊ីស្រាអែលលោក Israel Katz និងមន្ត្រីការទូតកំពូលរបស់អាជ្ញាធរប៉ាឡេស្ទីនលោក Riyad al-Maliki។
លោក Borrell បានប្រាប់អ្នកកាសែតថា៖ «យើងគិតអំពីអ្វីដែលក្រុមហាម៉ាស់បានធ្វើ ហើយជាការពិត យើងប្រឆាំងនិងថ្កោលទោសទង្វើទាំងនេះ។ ប៉ុន្តែ សន្តិភាពនិងស្ថិរភាពមិនអាចកសាងបានដោយសារតែមធ្យោបាយយោធាតែមួយមុខនោះទេ និងមិនមែនតាមវិធីនៃការប្រើមធ្យោបាយយោធាបែបនេះនោះឡើយ»។
លោក Borrell ស្ថិតក្នុងចំណោមមន្ត្រីបស្ចិមប្រទេសនានាដែលបានរិះគន់លើចំនួននៃការស្លាប់និងរងរបួសរបស់ជនស៊ីវិលនៅក្នុងតំបន់ហ្កាហ្សា។
ក្រសួងសុខាភិបាលដែលគ្រប់គ្រងដោយក្រុមហាម៉ាស់នៅក្នុងតំបន់ហ្កាហ្សាបានបញ្ជាក់ថា ជនជាតិប៉ាឡេស្ទីនយ៉ាងតិច ២៥.១០៥ នាក់ត្រូវបានសម្លាប់ ដែលភាគច្រើនជាស្ត្រីនិងកុមារ។ ក្រសួងនេះមិនបានបញ្ជាក់ជាក់លាក់អំពីចំនួនជនស៊ីវិលនិងយុទ្ធជនហាម៉ាស់ក្នុងចំណោមអ្នកស្លាប់ទាំងនោះទេ។
អ៊ីស្រាអែលបានរិះគន់ក្រុមហាម៉ាស់ថាបានធ្វើឱ្យជនស៊ីវិលស្ថិតក្នុងស្ថានភាពគ្រោះថ្នាក់ ដោយបានបញ្ជាក់ថាក្រុមនេះធ្វើប្រតិបត្តិការដោយចេតនានៅក្នុងតំបន់រស់នៅរបស់ពលរដ្ឋនិងនៅក្នុងបណ្ដាញរូងក្រោមដី។
ការប្រយុទ្ធគ្នានៅក្នុងតំបន់ហ្កាហ្សាបានបន្តនៅថ្ងៃចន្ទនេះ ដោយអ៊ីស្រាអែលបានវាយប្រហារតាមអាកាសសំដៅលើក្រុមយុទ្ធជនហាម៉ាស់នៅតំបន់ភាគខាងជើង កណ្ដាល និងខាងត្បូង។
ការវាយប្រហារតាមអាកាសនិងការប្រយុទ្ធគ្នាខ្លាំងក្លាត្រូវបានគេរាយការណ៍ថាបានកើតឡើងនៅក្នុងទីក្រុង Khan Younis នៅភាគខាងត្បូងតំបន់ហ្កាហ្សា ដែលជាទីក្រុងធំជាងគេបង្អស់ទីពីរនៅក្នុងតំបន់នោះ។
នាយករដ្ឋមន្ត្រីអ៊ីស្រាអែលលោក Benjamin Netanyahu កាលពីថ្ងៃអាទិត្យបានច្រានចោលសំណើរបស់ក្រុមហាម៉ាស់ដែលចង់បញ្ចប់សង្គ្រាម៕
ព័ត៌មានខ្លះសម្រាប់សេចក្ដីរាយការណ៍នេះត្រូវបានដកស្រង់មកពីទីភ្នាក់ងារសារព័ត៌មាន AP ទីភ្នាក់ងារសារព័ត៌មាន AFP និងទីភ្នាក់ងារសារព័ត៌មាន Reuters។
វេទិកាបញ្ចេញមតិ