កិច្ចព្រមព្រៀងបទឈប់បាញ់រយៈពេល៤ថ្ងៃ រវាងកងកម្លាំងអ៊ីស្រាអែលនិងក្រុមហាម៉ាស់ បានចូលជាធរមានកាលពីវេលាម៉ោង៧ព្រឹក ថ្ងៃសុក្រ ម៉ោងក្នុងស្រុក ដោយគេសង្ឃឹមថា នឹងមានការដោះលែងចំណាប់ខ្មាំងរាប់សិបនាក់ ដែលត្រូវបានចាប់ដោយក្រុមហាម៉ាស់ និងជនជាតិប៉ាឡេស្ទីនចំនួន១៥០នាក់ ដែលអ៊ីស្រាអែលបានឃុំខ្លួន។
កិច្ចព្រមព្រៀងឈប់បាញ់គ្នានេះ រួមមានការផ្អាកការបាញ់ក្នុងតំបន់ខាងជើងនិងខាងត្បូងនៃទីក្រុងហ្កាហ្សា។ នេះបើតាមអ្នកនាំពាក្យ Majed Al-Ansari ដែលបានប្រាប់ក្រុមអ្នកសារព័ត៌មានក្នុងរដ្ឋធានីដូហា ប្រទេសកាតា ក្នុងពេលកន្លងទៅ។
ផ្អែកលើកិច្ចព្រមព្រៀងនេះ ស្ត្រីនិងកុមារចំនួន៥០នាក់ ដែលត្រូវបានចាប់ពង្រត់ពីប្រទេសអ៊ីស្រាអែល ដោយក្រុមហាម៉ាស់ កាលពីថ្ងៃទី៧ ខែតុលាកន្លងទៅ នឹងត្រូវដោះលែង ជាថ្នូរនឹងស្ត្រីនិងមនុស្សមិនទាន់ពេញវ័យ១៥០នាក់ ដែលជាពលរដ្ឋប៉ាឡេស្ទីន ដែលកំពុងជាប់ពន្ធនាគារក្នុងប្រទេសអ៊ីស្រាអែល។
ចំណាប់ខ្មាំងចំនួន១៣នាក់ នឹងត្រូវដោះលែងពីតំបន់ហ្កាហ្សានៅថ្ងៃសុក្រនេះ ហើយចំណាប់ខ្មាំងបន្ថែមទៀតនឹងត្រូវដោះលែងជារៀងរាល់ថ្ងៃក្នុងអំឡុងពេលនៃបទឈប់បាញ់គ្នានេះ រហូតដល់ចំនួន៥០នាក់។
លោក Al-Ansari និយាយថា៖ «យើងសង្ឃឹមថា កិច្ចព្រមព្រៀងឈប់បាញ់ នឹងឆ្ពោះទៅរកឱកាសមួយ ក្នុងការចាប់ផ្តើមការងារធំជាងនេះមួយ ដើម្បីសម្រេចបានកិច្ចព្រមព្រៀងឈប់បាញ់ជាអចិន្ត្រៃយ៍»។
យោងទៅលើសំណើរបស់រដ្ឋាភិបាលអ៊ីស្រាអែល អ្នកជំនាញលើកុមារពីវិទ្យាស្ថាន Haruv នៃទីក្រុង Jerusalem បានដាក់ចេញសេចក្តីណែនាំមួយចំនួន អំពីរបៀបដែលក្រុមទាហានអ៊ីស្រាអែលត្រូវអនុវត្ត ពេលពួកគេទទួលបានអនីតិជនពេលដោះលែងពីតំបន់ហ្កាហ្សា។
អ៊ីស្រាអែលបានទទួលបញ្ជីឈ្មោះបណ្តោះអាសន្នមួយ ពីចំនួនចំណាប់ខ្មាំងដែលនឹងត្រូវដោះលែង ពីតំបន់ហ្កាហ្សានៅថ្ងៃសុក្រនេះ។ នេះបើតាមខុទ្ទកាល័យនាយករដ្ឋមន្ត្រីអ៊ីស្រាអែល ដែលបានឱ្យដឹងកាលពីថ្ងៃព្រហស្បតិ៍ម្សិលមិញ។
សេចក្តីថ្លែងការណ៍មួយរបស់ខុទ្ទកាល័យនាយករដ្ឋមន្ត្រីអ៊ីស្រាអែលបានឱ្យដឹងថា «អាជ្ញាធរពាក់ព័ន្ធកំពុងត្រួតពិនិត្យមើលសេចក្តីលម្អិត លើបញ្ជីអ្នកដែលនឹងត្រូវដោះលែងទាំងនោះហើយ កំពុងទាក់ទងក្រុមគ្រួសាររបស់ពួកគេទាំងអស់ផងដែរ»៕
ចំណាប់ខ្មាំងនិងអ្នកទោស នឹងត្រូវចាប់ផ្តើមដោះលែងនៅថ្ងៃសុក្រនេះ ក្រោមកិច្ចព្រមព្រៀងឈប់បាញ់រវាងអ៊ីស្រាអែលនិងក្រុមហាម៉ាស់
