ក្រុមជនសកម្មប្រយុទ្ធរដ្ឋឥស្លាមបានធ្វើការវាយប្រហារគ្រាប់បែកអត្តឃាតមួយនៅក្នុងតំបន់ជាយក្រុងខាងលិច និងខាងកើតនៃក្រុងបាកដាដកាលពីថ្ងៃអាទិត្យ ដោយបណ្តាលឲ្យមនុស្សរាប់សិបនាក់ស្លាប់។
នៅក្នុងការវាយប្រហារមួយដែលនាំឲ្យភ្ញាក់ផ្អើលយ៉ាងខ្លាំង ជនគ្រាប់បែកអត្តឃាតបីនាក់និងជនប្រដាប់អាវុធជិះក្នុងរថយន្តមួយបានធ្វើការវាយប្រហារក្នុងសង្កាត់ Abu Ghraib ឋិតនៅចម្ងាយ២៥គ.ម.ខាងលិចក្រុងបាកដាដ។
នៅពេលប៉ុន្មានម៉ោងបន្ទាប់មក ពួកជ្រុលនិយមទាំងនេះបានបំផ្ទុះគ្រាប់បែកពីរនៅក្នុងសង្កាត់ Shi'ite Sadr City នាប៉ែកឦសាននៃក្រុងបាកដាដ ដោយនាំឱ្យមនុស្សយ៉ាងតិចណាស់២៤នាក់បាត់បង់ជីវិត។
លោក Moqtar al Sadr មេដឹកនាំពួក Shi'ite បានអំពាវនាវដល់ពួកអ្នកដើរតាមលោកឲ្យការពារក្រុងបាកដាដ។
អ្នកស្រុកបាននិយាយថាតំបន់អន្តរជាតិហៅកាត់ថា IZ នៃក្រុងបាកដាដ ដែលជាតំបន់មានស្ថានទូតច្រើន និងមានផ្ទះបុគ្គលិកអន្តរជាតិនិងមន្ត្រីរដ្ឋាភិបាលអ៊ីរ៉ាក់ផងដែរនោះបានត្រូវដាក់ឲ្យឋិតនៅក្នុងការប្រុងប្រយ័ត្នខ្លាំងជាបណ្តោះអាសន្ន។
កងកម្លាំងសន្តិសុខអ៊ីរ៉ាក់ជាច្រើនបានត្រូវបញ្ជូនជាបន្ទាន់ទៅកាន់តំបន់ IZ នៃក្រុងបាកដាដ និងអាកាសយានដ្ឋានអន្តរជាតិរបស់រដ្ឋធានីនៃប្រទេសអ៊ីរ៉ាក់ដែលឋិតនៅខាងលិចក្រុងនេះ។
កាលពីរសៀលថ្ងៃអាទិត្យ ក្រុមមន្ត្រីអ៊ីរ៉ាក់បានប្រកាសថា ការប្រយុទ្ធនៅ Abu Ghraib បានចប់ហើយ ហើយអ្នកស្រុកក្រុងបាកដាដបាននិយាយថា ក្រុងនេះមានស្ថានភាពធម្មតាវិញហើយ៕
