រុមរដ្ឋឥស្លាមបានប្រកាសថា សាយហ្វូឡូ សៃពៅ (Sayfullo Saipov) អាយុ២៩ឆ្នាំ ជាជនអន្តោប្រវេសន៍មកពីប្រទេសអ៊ូប៊ែរគីស្ថាន (Uzbekistan) ដែលបានសម្លាប់មនុស្ស៨នាក់ក្នុងទីក្រុងញូវយ៉កកាលពីដើមសប្តាហ៍នេះដោយប្រើរថយន្តនោះ គឺជាសមាជិករបស់ខ្លួន។
ក្រុមភេរវករបាននិយាយនៅក្នុងកាសែត អាល់ ណាបា (Al-Naba) ប្រចាំសប្តាហ៍របស់ក្រុមភេរវករនេះថា អ្នកវាយប្រហារភេរវកម្មនៅក្រុងញូវយ៉កនេះគឺជាទាហានម្នាក់របស់ខ្លួន ក៏ប៉ុន្តែគេមិនបានផ្តល់ភ័ស្តុតាងណាមួយដើម្បីគាំទ្រការអះអាងនោះទេ។
សៃពៅ ដែលបានចូលមកកាន់ប្រទេសអាមេរិកដោយស្របច្បាប់តាមរយៈកម្មវិធីទិដ្ឋាការឆ្នោតផ្សងសំណាងទៅរស់នៅអាមេរិក (DV) បានប្រឈមមុខនឹងការចោទប្រកាន់មួយចំនួនពីបទភេរវកម្ម ដែលទាក់ទងនឹងការបើករថយន្តជួលបុកសម្លាប់មនុស្សក្នុងទីក្រុងញូវយ៉កកាលពីថ្ងៃអង្គារ នៅលើផ្លូវជិះកង់។ បន្ថែមពីលើចំនួនមនុស្សស្លាប់ក៏មានមនុស្សរាប់សិបនាក់ដែលរងរបួសជាទម្ងន់ផងដែរ។
សៃពៅ ត្រូវប៉ូលិសបាញ់ឲ្យរបួស ហើយបានដឹកទៅកាន់មន្ទីរពេទ្យបន្ទាប់នោះ។ មន្ត្រីក្នុងមន្ទីរពេទ្យបាននិយាយថា អ្នកវាយប្រហារភេរវកម្មនេះ បានបញ្ជាក់ពីភក្តីភាពរបស់គាត់ចំពោះក្រុមរដ្ឋឥស្លាម (IS) ដោយបានស្នើសុំទង់ជាតិរដ្ឋឥស្លាមដាក់ក្នុងបន្ទប់ព្យាបាលរបស់គាត់។ ការស្នើសុំនោះត្រូវបានបដិសេធ។
ប្រធានាធិបតីប្រទេសអ៊ូប៊ែរគីស្ថាន បានថ្លែងកាលពីថ្ងៃពុធថា ការវាយប្រហារនោះជារឿងគ្មានមេត្តានិងសាហាវព្រៃផ្សៃ ហើយថារដ្ឋាភិបាលលោកនឹងត្រៀមខ្លួនរួចជាស្រេចដើម្បីប្រើគ្រប់មធ្យោបាយទាំងអស់ ជួយដល់ការស៊ើបអង្កេត៕
