ក្រុមមន្រ្តីស៊ើបការណ៍សម្ងាត់និយាយថា អ្នកផលិតគ្រាប់បែកអាយុ២៥ឆ្នាំម្នាក់របស់ក្រុមរដ្ឋឥស្លាមដែលមានការទាក់ទិននៅក្នុងការវាយប្រហារទីក្រុងប៉ារីសកាលពីខែវិច្ឆិកាឆ្នាំមុន ជាអ្នកដាក់គ្រាប់បែកក្នុងចំណោមអ្នកដាក់គ្រាប់បែកអត្តឃាត២នាក់ដែលបានវាយប្រហារនៅចំណតអាកាសយានទីក្រុងប្រ៊ុចសែល (Brussels)។
ក្រុមអាជ្ញាធរនិយាយថា Najim Laachraoui ដែលកើតនៅក្នុងប្រទេសម៉ារ៉ុក (Morocco) ក៏ប៉ុន្តែ បានធំដឹងក្តីនៅក្នុងទីក្រុងប្រ៊ុចសែលត្រូវបានគេកំណត់អត្តសញ្ញាណថា ជាអ្នកចូលរួមដ៏សំខាន់ម្នាក់នៅក្នុងការវាយប្រហារទីក្រុងប៉ារីសបន្ទាប់ពី DNA របស់ជននោះ បានត្រូវគេរកឃើញនៅលើអាវកាក់អត្តឃាតដែលបានប្រើប្រាស់នៅក្នុងកិច្ចប្រតិបត្តិការនោះ។ DNA របស់ជននោះ ក៏បានត្រូវគេរកឃើញនៅឯអាគារ Apartment ក្នុងទីក្រុងប្រ៊ុចសែលកាលពីថ្ងៃអង្គារដែលក្រុមអាជ្ញាធរ ជឿជាក់ថា ជាទីកន្លែងដែលគ្រាប់បែកត្រូវបានគេផលិតនៅទីនោះ។
ក្នុងខណៈនោះដែរ លោក Recep Tayyip Erdogan ប្រធានាធិបតីតួកគី បាននិយាយកាលពីថ្ងៃពុធថា បុរសទី២ដែលត្រូវគេកំណត់អត្តសញ្ញាណជាអ្នកដាក់គ្រាប់បែកអត្តឃាតនៅក្នុងការវាយប្រហារនៅក្នុងទីក្រុងប្រ៊ុចសែលបានត្រូវចាប់ខ្លួនដោយអាជ្ញាធរតួកគី ហើយបាននិរទេសខ្លួនទៅកាន់អឺរ៉ុប ដែលនៅទីនោះ ជននោះ បានត្រូវគេដោះលែងប្រហែល៨ខែមុន។
ប្រធានាធិបតី Erdogan នៃប្រទេសតួកគី បាននិយាយបន្តទៀតថា រដ្ឋាភិបាលរបស់លោកបានព្រមានអាជ្ញាធរនៅក្នុងរដ្ឋធានីប្រ៊ុចសែលអំពីជនឈ្មោះ Ibrahim el-Bakraoui ដែលត្រូវបានគេបញ្ឈប់នៅព្រំដែននៃតំបន់ Gaziantep នៃប្រទេសតួកគី និងប្រទេសស៊ីរី។ លោកប្រធានាធិបតីតួកគី បាននិយាយទៀតថា el-Bakraoui បានត្រូវនិរទេសខ្លួនកាលពីខែកក្កដា ឆ្នាំទៅ ក៏ប៉ុន្តែ បានត្រូវអាជ្ញាធរអឺរ៉ុប ដោះលែង «ថ្វីបើមានការព្រមានរបស់យើងថា មនុស្សនេះ ជាអ្នកប្រយុទ្ធភេរវជនបរទេសក៏ដោយ»។
ប្រធានាធិបតី Erdogan បាននិយាយបន្តទៀតថា អ្នកដែលឃុំខ្លួន el-Bakraoui មិនមានភស្តុតាងថា ជននោះមានជាប់ទាក់ទិននឹងភេរវកម្ម។ ដូច្នេះ ពួកគេ បានដោះលែងពលរដ្ឋជនជាតិប៊ែលហ្ស៊ិកអាយុ២៩ឆ្នាំនោះទៅ៕
